ក្រសួងរ៉ែ និងថាមពល ចេញអាជ្ញាប័ណ្ណសិប្បកម្មរ៉ែមាស ឲ្យសហគមន៍ចុងផ្លាស់ ដើម្បីការពារសកម្មភាពជីកមាសអនាធិបតេយ្យ គ្មានច្បាប់ទម្លាប់។ នេះជាលើកដំបូងហើយដែលក្រសួងបានផ្ដល់អាជ្ញាប័ណ្ណសិប្បកម្មរ៉ែមាស់ដល់សហគមន៍សម្រាប់រយៈពេល១ឆ្នាំ ក្រោយពីពលរដ្ឋតំបន់ព្រៃមាស បង្កើតបានសហគមន៍មួយឈ្មោះ "សហគមន៍សិប្បករចុងផ្លាស់"។
ប្រជាពលរដ្ឋក្នុងភូមិពូទង់ ឃុំចុងផ្លាស់ ស្រុកកែវសីមា ខេត្តមណ្ឌលគិរី នាំគ្នាជីកដីនៅមុខផ្ទះដើម្បីរករ៉ែមាស ខណៈក្រសួងរ៉ែ និងថាមពល បានផ្ដល់អាជ្ញាប័ណ្ណឲ្យពួកគេធ្វើអាជីវកម្មស្របច្បាប់កាលពីថ្ងៃទី២៣ ខែមិថុនា ឆ្នាំ២០១៥។
ពលរដ្ឋភូមិពូទង់ លោក ឌីម ឌឿន ឲ្យដឹងថា អាជ្ញាប័ណ្ណសហគមន៍សិប្បករចុងផ្លាស់ ផ្ដល់ឲ្យដោយក្រសួងរ៉ែ និងថាមពល នេះ អនុញ្ញាតឲ្យពលរដ្ឋក្នុងសហគមន៍តំបន់ព្រៃមាស ជីកដីទំហំ ១ហិកតារក្នុង១គ្រួសារ ធ្វើអាជីវកម្មរ៉ែមាសបានដោយស្របច្បាប់ ក្នុងរយៈពេល ១ឆ្នាំ៖ «ប្រយោជន៍មួយគេអត់មករករឿងថា យើងអនាធិបតេយ្យអ៊ីចឹង។ ទោះយ៉ាងម៉េចក៏ខ្ញុំអរគុណដែរ ព្រោះអាជ្ញាប័ណ្ណហ្នឹងធ្វើស្របច្បាប់ គឺអរគុណចំពោះ (ក្រសួង) រ៉ែ និងថាមពល គេផ្ដល់ឲ្យ»។
ដូចគ្នាដែរ លោក អាន ឆូយ នៅតំបន់ព្រៃមាស ថ្លែងថា ២ថ្ងៃក្រោយពីទទួលបានអាជ្ញាប័ណ្ណ គាត់រៀបចំដំឡើងម៉ាស៊ីន និងស្វែងរកកម្មករ ដើម្បីជីកមាសឡើងវិញ បន្ទាប់ពីក្រសួងរ៉ែ និងថាមពល ផ្អាកមិនឲ្យជីកច្រើនខែមកនោះ។
លោកថា គាត់ទើបមានឈ្មោះក្នុងអាជ្ញាប័ណ្ណសហគមន៍សិប្បករចុងផ្លាស់ ទើបគាត់រៀបចំការជីកមាសឡើងវិញ៖ «កំពុងរៀបចំចុះសាថ្មី។ កម្មករនិងម៉ាស៊ីនអីធ្វើឲ្យព្រមគ្នា ត្រៀមយកក្នុង ១ថ្ងៃឲ្យបានមួយតោនអីឡើង ឬក៏ ២ថ្ងៃមួយតោនអីហ្នឹង»។
ប្រធានមន្ទីររ៉ែ និងថាមពល ខេត្តមណ្ឌលគិរី លោក សាន់ ដារិទ្ធ ថ្លែងថា ពលរដ្ឋ ៣២គ្រួសារ បានចុះឈ្មោះក្នុងសហគមន៍សិប្បករចុងផ្លាស់ ដើម្បីឲ្យការជីកមាសតាមគ្រួសារមានការទទួលស្គាល់ស្របច្បាប់។ លោកថា អាជ្ញាប័ណ្ណនេះមានសុពលភាព ១ឆ្នាំ ហើយសហគមន៍សិប្បករចុងផ្លាស់ ត្រូវគោរពតាមច្បាប់ចែងក្នុងអាជ្ញាប័ណ្ណ ដែលកំណត់ឲ្យជីកដីក្នុងជម្រៅចុះក្រោមមិនឲ្យលើស ២០ម៉ែត្រ ហើយ១គ្រួសារជីកបានក្នុងទំហំដី ១ហិកតារ។ ច្បាប់នោះក៏ហាមប្រាមប្រើសារធាតុគីមីយករ៉ែដែរ តែអាចឲ្យប្រើរំសេវបាន ដោយមុនបំផ្ទុះរំសេវ ត្រូវជម្រាបសមត្ថកិច្ចមូលដ្ឋានឲ្យបានដឹងជាមុន។
លោក សាន់ ដារិទ្ធ៖ «គឺមន្ទីររ៉ែនិងថាមពល ខេត្តមណ្ឌលគិរី បានចុះបង្ក្រាបអស់ហើយ គ្រប់កន្លែង គឺបង្ក្រាបមិនឲ្យមានការជីករ៉ែអនាធិបតេយ្យទៀតទេ។ ប្រជាពលរដ្ឋក៏ត្រេកអរដែរ បានក្រសួង ក៏ដូចមន្ទីរ បានរៀបចំអាជ្ញាប័ណ្ណឲ្យនេះ»។
បន្ថែមលើនោះ រដ្ឋលេខាធិការក្រសួងរ៉ែ និងថាមពល លោក ម៉េង សក្តិធារ៉ា ឲ្យដឹងថា ជាលើកទី១ ហើយ ដែលក្រសួងរ៉ែ និងថាមពល បានចេញអាជ្ញាប័ណ្ណរ៉ែមាស ជូនពលរដ្ឋសហគមន៍សិប្បករចុងផ្លាស់ ដើម្បីធ្វើអាជីវកម្មរ៉ែមាសស្របច្បាប់។ លោកបន្តថា អាជ្ញាប័ណ្ណនេះគឺកាត់យកដីសម្បទានសេដ្ឋកិច្ចទំហំ ៤៣ហិកតារពីក្រុមហ៊ុនចិន ឈ្មោះ រ៉ុង ឆេង កាលពីខែឧសភា ឆ្នាំ២០១៥ ដើម្បីឲ្យពលរដ្ឋនៅសហគមន៍ចុងផ្លាស់ ប្រកបរបរសិប្បកម្មរ៉ែមាស។
លោកបន្តថា ក្រៅពីឲ្យពួកគេធ្វើអាជីវកម្មរ៉ែស្របច្បាប់ ក៏ទុកឲ្យសហគមន៍ជួយរាយការណ៍ និងការពារសកម្មភាពជីកមាសអនាធិបតេយ្យនៅទីនោះដែរ៖ «គឺក្នុងគោលបំណងតែមួយគត់ ដើម្បីបម្រើឲ្យសេដ្ឋកិច្ចសង្គមរបស់ក្រុមគ្រួសារគាត់ផ្ទាល់ ក៏ដូចជាសហគមន៍ដែលយើងជួយបង្រៀនជំនាញគាត់ អ៊ីចឹងទៅការដែលខិតខំអនុវត្តទៅទាមច្បាប់ អនុវត្តទៅតាមកាតព្វកិច្ច ហិរញ្ញវត្ថុ និងកាតព្វកិច្ចខាងបច្ចេកទេសនេះ សំដៅឲ្យយើងអាចធានាបាននូវការបង្កើតផលប្រយោជន៍សេដ្ឋកិច្ចសង្គម សម្រាប់ទាំងខ្លួនយើងផ្ទាល់ផង ទាំងសង្គមជាតិយើង ទាំងសហគមន៍របស់យើងទាំងអស់គ្នាផង»។
លោក ម៉េង សក្តិធារ៉ា អះអាងថា នៅពេលអាជ្ញាប័ណ្ណផុតសុពលភាព បើពលរដ្ឋទាំង ៣២គ្រួសារនោះចង់បន្តអាជ្ញាប័ណ្ណ ក្រសួងអាចចុះសិក្សាឡើងវិញ ថាអាចបន្តអាជ្ញាប័ណ្ណឲ្យបាន ឬមិនបាន។ ប៉ុន្តែបើទីតាំងអនុញ្ញាតឲ្យជីករ៉ែមាសនោះ ត្រូវបានជីកលើសពីការកំណត់ដោយច្បាប់ ក្រសួងនឹងដកអាជ្ញាប័ណ្ណសិប្បកម្មនោះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។