លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជា មួយក្រុម ទៅចូលរួមកិច្ចប្រជុំកំពូលលើកទី២ នៃគណៈកម្មការទន្លេមេគង្គ នៅទីក្រុងហូជីមិញ ប្រទេសវៀតណាម រយៈពេល ២ថ្ងៃ គឺចាប់ពីថ្ងៃទី៤ ដល់ថ្ងៃទី៥ ខែមេសា ឆ្នាំ២០១៤។
អមដំណើរ លោក ហ៊ុន សែន មាន លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា និងលោក សាយ សំអាល់ រដ្ឋមន្ត្រីក្រសួងបរិស្ថាន និងសមាជិកនៃរាជរដ្ឋាភិបាលច្រើនរូបទៀត។
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា ថ្លែងនៅមុនពេលចេញដំណើរថា កិច្ចប្រជុំនោះស្ដីពី៖ «ទឹក ថាមពល និងសន្តិសុខស្បៀងនៅក្នុងបរិបទបម្រែបម្រួលអាកាសធាតុ សម្រាប់អាងទន្លេមេគង្គ»។
លោកបន្តថា ចំពោះគម្រោងទំនប់វារីអគ្គិសនីដនសាហុង ទាំងកម្ពុជា ក៏ដូចប្រទេសវៀតណាម និងថៃ ដែរ បានស្នើទៅភាគីឡាវ អោយផ្អាកគម្រោងសាងសង់ និងផ្តល់លទ្ធផលនៃការសិក្សាផលប៉ះពាល់អោយគ្រប់ភាគីពិចារណា និងសម្រេច។
កិច្ចប្រជុំនេះ ក៏នឹងពិភាក្សាលើបញ្ហាប្រឈមសម្រាប់អាងទន្លេមេគង្គ និងតួនាទីរបស់គណៈកម្មការទន្លេមេគង្គ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។