ក្រុមល្បាតរកឃើញអន្ទាក់ចាប់សត្វព្រៃជាង១០០ក្នុងតំបន់ព្រៃការពារខេត្តមណ្ឌលគិរី
2015.05.07
ក្រុមសមត្ថកិច្ចចម្រុះរួមជាមួយប្រជាពលរដ្ឋសហគមន៍មូលដ្ឋាន និងមន្ត្រីអង្គការសង្គមស៊ីវិល បានបញ្ចប់បេសកកម្មល្បាតព្រៃការពារនៅខេត្តមណ្ឌលគិរី ដោយប្រើរយៈពេលជិត ១០ថ្ងៃ។ ក្នុងបេសកកម្មនេះ ក្រុមល្បាតបានរកឃើញបទល្មើសប្រមាញ់សត្វព្រៃកើតមានច្រើនគួរឲ្យបារម្ភ។
យុទ្ធនាការល្បាតព្រៃនេះ រៀបចំឡើងដោយរដ្ឋបាលព្រៃឈើថ្នាក់ជាតិ ដើម្បីពង្រឹងសមត្ថភាពមន្ត្រីព្រៃឈើ និងការអនុវត្តជាក់ស្តែងទាក់ទិនការបង្ក្រាប និងទប់ស្កាត់បទល្មើសនានាដែលធ្វើឲ្យប៉ះពាល់ធនធានធម្មជាតិ មានព្រៃឈើ សត្វព្រៃក្នុងតំបន់ព្រៃការពាររបស់ជាតិ។
អន្ទាក់ប្រភេទខ្សែកាបជាង ១០០អន្ទាក់ និងដងអន្ទាក់ជិត ២០០ដង ត្រូវបានក្រុមល្បាតព្រៃរកឃើញនៅក្នុងតំបន់ព្រៃការពារខេត្តមណ្ឌលគិរី។ ក្រុមល្បាតនេះរួមមាន មន្ត្រីជំនាញរដ្ឋបាលព្រៃឈើ កងកម្លាំងប្រដាប់អាវុធ និងមន្ត្រីអង្គការសង្គមស៊ីវិលពាក់ព័ន្ធ រួមជាមួយប្រជាសហគមន៍មូលដ្ឋានមានគ្នា ៧៧នាក់ បានសហការគ្នាចុះល្បាតព្រៃការពារខេត្តមណ្ឌលគិរី ចាប់ពីថ្ងៃទី២៨ ដល់ថ្ងៃទី៦ ខែឧសភា ក្នុងគោលបំណងបង្កើនសមត្ថភាពមន្ត្រីជំនាញ ដើម្បីទប់ស្កាត់បទល្មើសព្រៃឈើ និងជាយុទ្ធសាស្ត្រប្រមូលអន្ទាក់ ឧបករណ៍ឆក់គ្រប់ប្រភេទក្នុងព្រៃ និងជាការលើកទឹកចិត្តមន្ត្រីជំនាញដែលកំពុងបំពេញភារកិច្ច ទប់ស្កាត់បទល្មើសជាក់ស្តែងក្នុងព្រៃការពារនៅទូទាំងប្រទេស។
ប្រធានព្រៃការពារមណ្ឌលគិរី លោក ឡុង ប៊ុង ឲ្យដឹងនៅថ្ងៃទី៧ ខែឧសភា ថា អន្ទាក់ដែលរកឃើញទាំងអស់ជាប្រភេទអន្ទាក់អាចប្រមាញ់សត្វព្រៃពីតូចរហូតធំបាន។ ហេតុនេះ ក្រុមល្បាតបានដោះយកអន្ទាក់ទាំងនោះមករក្សាទុក ចំណែកដងអន្ទាក់ត្រូវដុតបំផ្លាញចោលនៅក្នុងព្រៃ។ លោកបន្តថា បទល្មើសព្រៃឈើមិនឃើញមានអ្វីគួរឲ្យកត់សម្គាល់នោះទេ ក៏ប៉ុន្តែសំណាកសពសត្វព្រៃមានដំរី និងទន្សោង ត្រូវបានរកឃើញបន្សល់ចោលក្នុងព្រៃ បន្ទាប់ពីសត្វទាំងនោះត្រូវបានគេបាញ់សម្លាប់៖ «មិនឃើញមានបទល្មើសព្រៃឈើទេខែនេះ វាភ្លៀង បញ្ហាសំខាន់បារម្ភខ្លាំង គឺបទល្មើសដាក់អន្ទាក់សត្វ។ ឥឡូវនេះ យើងដាក់កម្លាំងល្បាតនៅតាមចំណុចទាំង៥ របស់យើងក្នុងព្រៃហ្នឹង ប៉ុន្តែបញ្ហាប្រឈមទៅមុខហ្នឹង គឺរដូវភ្លៀង ការធ្វើដំណើរលំបាក។ អ៊ីចឹងបានតែដំណើរថ្មើរជើងសុទ្ធទេ ការជិះម៉ូតូក្នុងព្រៃមិនកើតទេ»។
តំបន់ព្រៃការពារមណ្ឌលគិរី មានផ្ទៃដីជាង ៣៧ម៉ឺនហិកតារ មានព្រៃល្បោះ ព្រៃពាក់កណ្ដាលស្រោង និងព្រៃស្រោង ដែលមានលក្ខណៈដ៏សមស្របបំផុតសម្រាប់ការរស់នៅរបស់ពពួកសត្វព្រៃគ្រប់ប្រភេទ ក្នុងនោះមានថនិកសត្វប្រមាណ ៨០ប្រភេទរស់នៅ មានសត្វស្លាបប្រមាណ ៣៧ប្រភេទ និងឧរង្គសត្វប្រមាណ ៥០ប្រភេទ ក្នុងនោះក៏មានប្រភេទសត្វជិតផុតពូជប្រមាណ ១៨ប្រភេទផងដែរ។
ទាក់ទិនលទ្ធផលនៃការចុះល្បាតនេះ មន្ត្រីផ្នែកអង្កេតសមាគមអាដហុក (adhoc) ខេត្តមណ្ឌលគិរី លោក អ៊ាង ម៉េងលី ចាត់ទុកថា ការរកឃើញអន្ទាក់ដ៏ច្រើនក្នុងព្រៃនេះ សបញ្ជាក់ថា បទល្មើសប្រមាញ់សត្វព្រៃពិតជាកើតមានគួរឲ្យព្រួយបារម្ភ។ លោកសង្ស័យខណៈក្រុមល្បាតរកមិនឃើញទីតាំងកាប់បំផ្លាញព្រៃឈើ ដែលកន្លងទៅនេះសហគមន៍មូលដ្ឋានបានបង្ក្រាបសកម្មភាពកាប់ឈើជាច្រើនករណីនៅក្នុងព្រៃការពារនេះ៖ «សហគមន៍តំបន់ការពារនៅប៊ូស្រា កន្លងទៅ កាត់ចាប់បានម៉ាស៊ីនជាហូរហែ ពេលនេះបើប្រៀបធៀបកម្លាំងរដ្ឋបាលព្រៃឈើដែលចុះល្បាត អាចមានជនប្រព្រឹត្តិដឹងខ្លួនទាន់ គឺហាក់ដូចជាមានមន្ទិលសង្ស័យ។ អ្វីដែលសំខាន់ គឺអាជ្ញាធរត្រូវចាត់វិធានការផ្លូវច្បាប់ផ្ដន្ទាទោសអ្នកប្រព្រឹត្តិខុស»។
ទោះជាយ៉ាងនេះក៏ដោយ ប្រធានព្រៃការពារមណ្ឌលគិរី លោក ឡុង ប៊ុង ថ្លែងថា មន្ត្រីព្រៃឈើ ១០នាក់ និងប៉ូលិស ១១នាក់ ត្រូវបានចាត់ឲ្យអភិរក្សនៅស្នាក់ការចំនួន៥ ក្នុងព្រៃការពារ ដើម្បីទប់ស្កាត់បទល្មើសជាបន្ត ក៏ប៉ុន្តែលោកថា នៅរដូវវស្សា ការធ្វើដំណើរល្បាតក្នុងព្រៃជួបការលំបាកខ្លាំង និងជាពិសេសការដឹកជញ្ជូនស្បៀងសម្រាប់ក្រុមល្បាត ត្រូវដឹកជញ្ជូនដោយមធ្យោបាយសត្វដំរី ទើបអាចធ្វើទៅបាន។
ក្រៅពីរកឃើញអន្ទាក់ប្រមាញ់សត្វព្រៃ ក្រុមល្បាតក៏បានប្រទះឃើញសំណាកក្បាលដំរីពីរក្បាល ទន្សោងពីរក្បាល ដែលត្រូវបានគេបាញ់សម្លាប់ និងឃាត់ខ្លួនប្រជាពលរដ្ឋជាព្រានប្រមាញ់សត្វព្រៃ ១៧នាក់ រួមជាមួយវត្ថុតាងអន្ទាក់ ២២ បន្ថែមទៀត នៅកន្លែងផ្សេងៗគ្នាក្នុងតំបន់ព្រៃការពារ ក៏ប៉ុន្តែមន្ត្រីជំនាញបានតម្រូវឲ្យព្រានប្រមាញ់ទាំងនោះ ធ្វើកិច្ចសន្យាបញ្ឈប់ការបរបាញ់ ហើយអប់រំឲ្យវិលទៅលំនៅឋានវិញ។ ក្រៅពីនេះ ក្រុមល្បាតបានធ្វើការអប់រំប្រជាពលរដ្ឋ ៦នាក់ផ្សេងទៀត ដែលបានចូលមកកាន់កាប់ដីព្រៃការពារខុសច្បាប់៕