ក្នុងពេលកន្លងទៅ រដ្ឋាភិបាលបានប្រកាសដាច់ខាតថា ត្រូវទប់ស្កាត់បទល្មើសព្រៃឈើ ជាពិសេសប្រឆាំងរាល់កុងត្រូលជជុះដែលនាំឲ្យរំខានដល់ការប្រកបការងាររបស់ប្រជាពលរដ្ឋ។ ទោះបីរដ្ឋាភិបាលបានចេញបម្រាម ប្រឆាំងការដាក់កុងត្រូលជជុះដូចនេះក្ដី ប៉ុន្តែកុងត្រូលជជុះនៅតែត្រូវបានដាក់យ៉ាងព្រោងព្រាតនៅឡើយ។
លោក ម៉ម មុនីរតន៍ ដែលបានចុះទៅដល់ទីតាំងនៃការដាក់ពង្រាយកងកម្លាំងចម្រុះក្នុងព្រៃ មានសេចក្ដីរាយការណ៍អំពីស្ថានភាពដែលប្រជាពលរដ្ឋក្នុងតំបន់អះអាងថា ជាកម្លាំងដែលត្រូវបានគេដាក់ដើម្បីការពារឲ្យឈ្មួញរកស៊ីឈើដូចតទៅ៖
សំឡេងពលរដ្ឋ៖ «ប្រជាពលរដ្ឋនៅទីនេះ គ្រាន់បានរកបានតក់ៗចិញ្ចឹមគ្រួសារ ដល់ពេលនេះគេចូលមកច្រើនមានអីគេ។ បើបីបួនប្រាំប្រាំពីរប្រាំបីស្ថាប័នហើយ មកនៅចាំកាក់យកលុយហ្នឹង»។
បុរសដែលមានវ័យជិត ៤០ឆ្នាំ និយាយបណ្ដើរ ហើយយកដៃចង្អុលជួរភ្នំដែលជាទីតាំងប្រជាពលរដ្ឋតែងឡើងប្រមូលអនុផលបណ្ដើរ ឲ្យដឹងថា ឥឡូវនេះប្រជាពលរដ្ឋនៅក្នុងឃុំចំបក់ ពិតជាមិនអាចចូលព្រៃ ដើម្បីប្រមូលអនុផលដោយស្រួលបានដូចមុនទៀតឡើយ ចាប់តាំងពីកម្លាំងចម្រុះដាក់ប៉ុស្តិ៍ប្រមូលលុយពីអ្នកភូមិ ក្រោមហេតុផលបង្ក្រាបបទល្មើសព្រៃឈើរួចមក។
ពលរដ្ឋម្នាក់រស់នៅភូមិក្រាំងចេក ឃុំចំបក់ ស្រុកភ្នំស្រួច ខេត្តកំពង់ស្ពឺ លោក ឯក ងួន ឲ្យដឹងថា សព្វថ្ងៃនេះ កម្លាំងចម្រុះត្រូវគេដាក់ពង្រាយជាច្រើនទីតាំងនៅក្នុងព្រៃ ស្ថិតនៅផ្នែកខាងលើនៃជួរភ្នំ ដែលមានចម្ងាយពីផ្ទះរបស់អ្នកភូមិប្រហែលពី ៨ ទៅ ១០គីឡូម៉ែត្រ។ លោកឲ្យដឹងទៀតថា នៅពេលពួកគាត់ដឹកឧស ឬបង្គោលរបងឆ្លងកាត់ប៉ុស្តិ៍ត្រួតពិនិត្យនីមួយៗ ត្រូវបង់ក្នុងតម្លៃមួយដ៏ខ្ពស់៖ «បរិស្ថានក៏មិនដែលរស់នៅហ្នឹងដែរ។ ឥឡូវស្រាប់តែទៅហ្នឹងយកលុយគេដែរ។ ចាំកាក់យកលុយអ៊ីចឹងដែរ ហើយប្រជាពលរដ្ឋនៅទីនេះរកអីបានច្រើន។ វានៅខាងលើហ្នឹងវាដាក់នៅចាំនេះហ្នឹង។ វានាំផ្លូវៗណា ក៏ប្រជាពលរដ្ឋលែងគេចរួចដែរ។ បើវាវាស់គីបមួយរទេះ ហាសិបរៀល ហើយបើអាទាននៅលើហ្នឹង វាវាស់គីបមួយគីប ៣៥០ដុល្លារ ហើយមួយរទេះវាយកក្នុង ៦០ម៉ឺនរៀល ហើយប្រជាពលរដ្ឋដឹកមួយដុំពីរដុំហ្នឹងវាបានប៉ុន្មាន?»។
នៅពេលនេះ កម្លាំងត្រូវបានគេដាក់សម្រាប់ប្រមូលលុយនៅតាមគោលដៅខុសៗគ្នា ក្រៅពីមន្ត្រីបរិស្ថាននៃឧទ្យានជាតិគិរីរម្យ ក៏នៅមានយោធានៃយុទ្ធភូមិភាគ៣ ប៉ូលិសសេដ្ឋកិច្ចខេត្តកោះកុង និងកងរាជអាវុធហត្ថខេត្តកំពង់ស្ពឺ ថែមទៀតផង។ មុននឹងទៅដល់គោលដៅដែលប្រជាពលរដ្ឋអះអាងថា ជាប្រភេទកុងត្រូលជជុះនោះ គឺគេត្រូវធ្វើដំណើរឆ្លងកាត់ផ្លូវដែលមានភក់ជ្រាំ ដុំថ្មរដូករណែល ហើយមានអូរធម្មជាតិកាត់ដោយអន្លើនៅតាមជ្រលងភ្នំទៀតផង។ នៅទីនោះហើយ ដែលកុងត្រូលជជុះត្រូវគេដាក់ពង្រាយដូចខ្យង សម្រាប់ប្រមូលលុយពីអ្នកភូមិដែលមានមុខរបរចូលក្នុងព្រៃ៖ «បើបរិស្ថានផង ប៉េអិមផង ទាហានផង យើងមានលុយណាបង់ឲ្យវា។ មានតែយើងងាប់។ អ៊ីចឹងបានថា បើមិននេះទេ សម្លាប់ប្រជាពលរដ្ឋចោលឲ្យអស់ហ្មងទៅអ្ហី។ បាញ់ចោលហ្មងទៅ បើមកគាបសង្កត់អ៊ីចឹងនោះ។ ទាហានត្រូវនៅក្នុងបន្ទាយ ប៉េអិមត្រូវនៅក្នុងទីក្រុង។ ហេតុអីត្រូវមកជំរិតប្រជាពលរដ្ឋតាមព្រៃតាមសៃ»។
បើទោះជាក្រុមសមត្ថកិច្ចទាំងនោះបានអះអាងថា មូលហេតុដែលពួកគេត្រូវដាក់ឲ្យឈរជើងនៅទីនោះ ដើម្បីចុះបង្ក្រាបបទល្មើសព្រៃឈើខុសច្បាប់ក៏ដោយ ក៏អ្នកភូមិនិយាយថា ការពិត គឺជាក្រុមដែលប្រព្រឹត្តបទល្មើសព្រៃឈើ ហើយយកលេសក្រោមស្លាកបង្ក្រាបបទល្មើសព្រៃឈើដ៏សកម្មទៅវិញ។
បច្ចុប្បន្ន ប្រជាពលរដ្ឋនៅក្នុងឃុំចំបក់ និងពលរដ្ឋមកពីខាងក្រៅ គឺពឹងផ្អែកទាំងស្រុងពីអនុផលព្រៃឈើនៅទីនោះ។ ស្របពេលឆ្នាំនេះ ស្រូវរដូវវស្សាត្រូវជួបគ្រោះរាំងស្ងួត សន្ទូងត្រូវងាប់ និងមួយផ្នែកទៀតក្រៀមស្វិតផងនោះ បានបង្ខំចិត្តឲ្យពួកគេត្រូវសម្រុកចូលទៅព្រៃ ដើម្បីដងជ័របោចវល្លិ និងកាប់ឈើបែបជាលក្ខណៈគ្រួសារ ដោយប្រើប្រាស់មធ្យោបាយដឹករទេះគោ ដើម្បីដោះស្រាយជីវភាពរស់នៅប្រចាំថ្ងៃ៖ «មិនដឹងជាពីណាទេ បើឃើញបាំងក្ដារបាំងអីនៅហ្នឹង។ មើលទាហាន ប៉េអិម ទាហានប៉េអិមហ្មង នៅកន្លែងផ្ទះអាណូកថ្ងៃមុន។ បរិស្ថានអីគគុកក្ដី មេព្រៃអីគគុកក្ដី»។
ពាក់ព័ន្ធរឿងនេះ មេឃុំចំបក់ មកពីគណបក្សប្រជាជនកម្ពុជា លោក ជ័យ ហ៊ីម ទទួលស្គាល់ថា ពេលខ្លះ ប្រជាពលរដ្ឋបានអនុវត្តលើសគោលការណ៍ដែលច្បាប់បានកំណត់ពិតមែន។ ក៏ប៉ុន្តែ លោកថ្លែងថា ដោយសារពួកគាត់ពុំមានជម្រើស ហេតុនេះត្រូវបង្ខំចិត្តចូលព្រៃ ដើម្បីប្រមូលអនុផលព្រៃឈើដោះស្រាយជីវភាពប្រចាំថ្ងៃ។ ម្យ៉ាងវិញទៀត មុខរបរចូលព្រៃរបស់អ្នករស់នៅព្រៃភ្នំនេះ គឺមានប្រវត្តិរាប់ពាន់ឆ្នាំមកហើយ ដែលវាពុំមែនជារឿងថ្មីនោះទេ៖ «មូលដ្ឋានខ្ញុំទោះបីគាត់ប្រព្រឹត្តបទល្មើសខុសច្បាប់មែន ក៏ប៉ុន្តែយោងទៅតាមតំបន់ដែលនៅជាប់នឹងព្រៃភ្នំ។ គាត់តែងតែប៉ះពាល់តិចតួច ហើយខាងស្រុកខេត្ត ក៏ដូចជាឃុំ មិនអនុញ្ញាតឲ្យគាត់ប្រព្រឹត្តទេ ប៉ុន្តែសូមឲ្យសមត្ថកិច្ចឲ្យយុត្តិធម៌»។
លោកថ្លែងបន្តថា អ្វីដែលចម្លែកនៅពេលនេះ គឺថា កម្លាំងចម្រុះត្រូវគេដាក់ពង្រាយក្នុងព្រៃភ្នំជាច្រើនកន្លែងទៅវិញ ដើម្បីចាំយកលុយពីអ្នកភូមិ។ ដោយឡែករបាយការណ៍ដែលវិទ្យុអាស៊ីសេរី ទទួលបាន ឲ្យដឹងថា កម្លាំងប្រដាប់ដោយអាវុធគ្រប់ដៃ ត្រូវគេបញ្ជូនចេញពីអង្គភាពខុសៗគ្នា។ ក្នុងនោះ មកពីកងទ័ពជើងគោកនៃយុទ្ធភូមិភាគទី៣ ដឹកនាំកម្លាំងដោយឈ្មោះ ម៊ូ ម៊ូ និងឈ្មោះ ហ៊ឹង ម៉េងលី។ ក្រៅពីនេះ នៅមានប៉ូលិសសេដ្ឋកិច្ចមកពីខេត្តកោះកុង។ អ្នកដឹកនាំកម្លាំងនៃប៉ូលិសសេដ្ឋកិច្ចនេះ គឺឈ្មោះ វ៉ាង វិចិត្រ ដែលត្រូវជាកូនរបស់ឈ្មោះ ជរ វ៉ាងលី នាយខណ្ឌរដ្ឋបាលព្រៃឈើ ខេត្តកោះកុង។
លើសពីនេះទៀត ក៏មានកម្លាំងកងរាជអាវុធហត្ថស្រុកភ្នំស្រួច ខេត្តកំពង់ស្ពឺ ដែលដឹកនាំកម្លាំងដោយឈ្មោះ យស ឌីណា។ ទន្ទឹមនឹងនេះ នៅមានមន្ត្រីបរិស្ថាននៃឧទ្យានជាតិគិរីរម្យ ៣នាក់ថែមទៀត ក្រោមបញ្ជារបស់ប្រធានមន្ទីរបរិស្ថានខេត្តកំពង់ស្ពឺ គឺលោក ហេង គួន។ លិខិតបន្តថា ក្រៅពីមានកម្លាំងទាំងនោះហើយ នៅមានកម្លាំងមកពីអង្គភាពដឺបេនៃកងយោធភូមិភាគទី៣ ដឹកនាំកម្លាំងដោយឈ្មោះ ធឹង។
អាជ្ញាធរក្នុងតំបន់អះអាងថា កម្លាំងចម្រុះទាំងនេះ គឺត្រូវបានគេជួលដើម្បីការពារឲ្យឈ្មួញរកស៊ីឈើ ហើយឈើដែលប្រមូលបានមួយផ្នែកពីស្រុកឱរ៉ាល់ ខេត្តកោះកុង និងខេត្តកំពង់ស្ពឺ ហើយត្រូវដឹកចេញទៅតាមច្រកនៃស្រុកឱរ៉ាល់។ ចំណែកតម្លៃដែលត្រូវគេជួលក្នុងកម្លាំងម្នាក់ សម្រាប់ថ្លៃម្ហូបក្នុងមួយថ្ងៃវិញ គឺ ១ម៉ឺនរៀល ក្រៅពីនេះ នៅមានប្រាក់ខែ ១០០ដុល្លារបន្ថែមទៀត។
ជាញឹកញយ លោកនាយករដ្ឋមន្ត្រី ហ៊ុន សែន តែងព្រមានដល់មន្ត្រីក្រោមបង្គាប់របស់ខ្លួន ប្រឆាំងការទារលុយតាមផ្លូវ ក្រោមរូបភាពបង្កើតកុងត្រូលជជុះនេះដែរ ក៏ប៉ុន្តែយូរៗគេសង្កេតឃើញរូបភាពបែបនេះ កើតឡើងជាថ្មីវិញ។
លិខិតបេសកកម្មមួយចំនួនដែលវិទ្យុអាស៊ីសេរី ទទួលបាន ចុះថ្ងៃទី៨ ខែតុលា របស់អគ្គស្នងការរង និងជាប្រធាននាយកដ្ឋានកណ្ដាលនគរបាលយុត្តិធម៌ នៃនាយកដ្ឋាននគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃ ឧត្ដមសេនីយ៍ឯក ជា សុមេធី ឲ្យដឹងថា នាយកដ្ឋាននគរបាលប្រឆាំងបទល្មើសសេដ្ឋកិច្ច អនុញ្ញាតឲ្យលោកវរសេនីយ៍ទោ ម៉ៅ ច័ន្ទវិជ្ជា ឋានៈនាយរងការិយាល័យ ដឹកនាំកម្លាំង ៣នាក់ ក្នុងនោះមានវរសេនីយ៍ត្រី យ៉ត ឈាន អនុសេនីយ៍ទោ វ៉ាង វិចិត្រ កូនប្រុសរបស់ លោក ជរ វ៉ាងលី និងអនុសេនីយ៍ត្រី រស់ កុសល។ លិខិតអនុញ្ញាតនេះ ដើម្បីចុះណែនាំការងារជំនាញស៊ើបអង្កេត និងស្រាវជ្រាវសម្ងាត់បទល្មើសសេដ្ឋកិច្ចនៅខេត្តកោះកុង។
ដោយឡែករបាយការណ៍ពីកងទ័ពជើងគោកនៃយោធភូមិទី៣ឯណេះវិញ ចុះថ្ងៃទី៥ ខែកក្កដា ឲ្យដឹងដែរថា កម្លាំងចំនួន ១១នាក់ ត្រូវបានបញ្ជូនទៅជាមួយដែរ ដោយមានអាវុធគ្រប់ដៃ។ បន្ថែមលើបញ្ជីរាយនាមនៃកងកម្លាំងប្រដាប់អាវុធទាំងនេះ មេបញ្ជាការយោធភូមិភាគទី៣ លោក យឿង សុខុន ក៏បានចេញលិខិតបេសកកម្មបន្ថែមពីលើនេះទៀត ដើម្បីសម្រួលកិច្ចការក្នុងភូមិសាស្ត្រយោធភូមិភាគ ដើម្បីស្រាវជ្រាវបទល្មើសនានា។
បើទោះជាបែបណា ទាំងអាជ្ញាធរក្នុងតំបន់ និងប្រជាពលរដ្ឋអះអាងថា ការពិតកម្លាំងចម្រុះដែលដាក់នៅពេលនេះ គឺជាក្រុមដែលការពារផលប្រយោជន៍ឲ្យឈ្មួញ និងរកស៊ីដោយផ្ទាល់ដៃទៅវិញទេ។
តំណាងឲ្យ លោក ជរ វ៉ាងលី នាយខណ្ឌរដ្ឋបាលព្រៃឈើខេត្តកោះកុង និងជាអ្នកចាត់ចែងទូទៅ គឺលោក ហ៊ឹង ម៉េងលី បដិសេធថា កម្លាំងយោធារដ្ឋាភិបាល និងមេព្រៃ មិនបានដាក់កម្លាំងដើម្បីចាប់យកលុយ ឬរកស៊ីឈើនោះទេ។ ផ្ទុយទៅវិញ កម្លាំងដែលដាក់នោះ គឺដើម្បីចុះបង្ក្រាបបទល្មើសព្រៃឈើប៉ុណ្ណោះ៖ «អាហ្នឹងកម្លាំងដាក់ដើរល្បាតកាប់បទល្មើសព្រៃឈើព្រៃអីហ្នឹងណាបង ជួបចាប់ៗ ឥតទេបង អូរៗឥតទេបង សូម្បីតែប្រាំពាន់ ឬមួយម៉ឺន ក៏ឥតប៉ះពាល់ដែរ»។
ដោយឡែក ប្រធានមន្ទីរបរិស្ថានខេត្តកំពង់ស្ពឺ គឺលោក ហេង គួន និយាយថា ជំនាញរបស់លោកមិនបានប្រព្រឹត្តបទល្មើសដូចការរកឃើញឡើយ ហើយថែមទាំងមិនបានស្ថិតនៅក្រោមបង្គាប់របស់រដ្ឋបាលព្រៃឈើខេត្តកោះកុង ក្រោមរូបភាពជួលថែមទៀតផង៖ «ខ្ញុំបាននិយាយប្រាប់ហើយថា កុំច្រឡំថាខ្ញុំកុងត្រូល ខ្ញុំកុងត្រូលជជុះ។ មិនមែនទេ ខ្ញុំស្នាក់ការរងដែលស្របច្បាប់ មានលិខិតបទដ្ឋានអីត្រឹមត្រូវច្បាស់លាស់»។
ប្រជាពលរដ្ឋនិយាយថា បើកម្លាំងចម្រុះនៅតែបន្តដាក់ពង្រាយដូចនៅពេលនេះ នោះការប្រកបការងារនៅក្នុងសហគមន៍ឃុំចំបក់ នឹងរងផលប៉ះពាល់ជីវភាព ដោយសារពួកគេពឹងផ្អែកទាំងស្រុងពីអនុផលព្រៃឈើ ដើម្បីដោះស្រាយការរស់នៅប្រចាំថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។