ប្រជាពលរដ្ឋនៅឃុំផាត់សណ្ដាយ ស្រុកកំពង់ស្វាយ ខេត្តកំពង់ធំ ឱ្យដឹងថា ស្ថានភាពបទល្មើសនេសាទដូចជាការដាក់លូស្បៃមុង លបឡុក ឬលបណរ៉ាវ គឺថយចុះបានមួយរយៈពេលខ្លីនៅតំបន់ខ្លះ។ ការថយចុះនេះ ក្រោយពេលអាជ្ញាធរខេត្ត និងរាជរដ្ឋាភិបាលប្រកាសចាត់វិធានការក្ដៅចំពោះបទល្មើសនេសាទនៅតំបន់បឹងទន្លេសាបជាបន្តបន្ទាប់។ យ៉ាងនេះក្ដី ពលរដ្ឋបញ្ជាក់ថា បទល្មើសមួយចំនួនដូចជារបាំងលបនៅតែកើតមាន ក្រោយអាជ្ញាធរខេត្តអនុញ្ញាតឱ្យពលរដ្ឋអាចដាក់របាំងលបប្រវែងក្រោម ២០០ម៉ែត្របាន។
ប្រជាពលរដ្ឋស្នើឱ្យអាជ្ញាធរខេត្ត ឬរាជរដ្ឋាភិបាលចុះចាត់វិធានការបទល្មើសនេសាទដល់ទីតាំងបឹងទន្លេសាបផ្ទាល់ និងចុះជាប្រចាំ ទើបមានប្រសិទ្ធភាពច្រើនជាង។ ការស្នើនេះ ដោយពួកគាត់អះអាងថា បទល្មើសនេសាទមួយចំនួនបានថយចុះបន្តិចនៅតំបន់ខ្លះ និងបានតែមួយរយៈពេលខ្លី ក្រោយមកគឺកើតឡើងវិញដដែល ដោយប្រជានេសាទមួយចំនួនមិនបានគោរពតាមអ្វីដែលអាជ្ញាធរខេត្តកំណត់ទេ។
ពលរដ្ឋនៅឃុំផាត់សណ្ដាយ មួយរូប សុំមិនបញ្ចេញឈ្មោះមានប្រសាសន៍ថា បទល្មើសនេសាទ ដូចជាដាក់របាំងលប លូស្បៃមុង ពិសេសនៅតាមព្រែក គឺអាជ្ញាធរបង្ក្រាបគ្មានលស់ ប៉ុន្តែនៅក្នុងបឹងទន្លេសាបវិញ នៅតែកើតមាន។ លោកអះអាងថា របាំងលបឡុក ឬណរ៉ាវ គឺមិនមានលើផ្ទៃទឹកទេ ព្រោះក្រុមជនល្មើសដាក់ពន្លិចក្នុងទឹកមិនឱ្យគេមើលឃើញឡើយ៖ «តែអ្នកធ្វើការបើបើកធម្មតា គឺអត់ឃើញទេ អត់ឃើញមានរបាំងទេ គឺឃើញតែទឹកទេ»។
មិនខុសគ្នានេះ ពលរដ្ឋនៅឃុំចំណារលើ ដែលតែងតែទៅនេសាទនៅតំបន់បឹងមួយចំនួននៅឃុំផាត់សណ្ដាយ ដូចជាបឹងប៉ោង បឹងស្មៅជាដើម និយាយថា បទល្មើសនៅតំបន់បឹងទាំងនេះថយចុះបន្តិច ពោលគឺពីមុនមានរបាំងលប ឬណរ៉ាវ ប្រវែងប្រមាណ ១គីឡូម៉ែត្រ ឬលើសពីនេះ។ លោកថា បទល្មើសទាំងនេះបាត់ប្រហែល ១សប្ដាហ៍ ក្រោយមកឃើញមានកើតឡើងវិញ ប៉ុន្តែមានប្រវែងប្រហែល ៥០០ម៉ែត្រ ឬខ្លីជាងនេះ និងដាក់ក្នុងព្រៃ គឺមិនបានដាក់នៅតាមប្រឡាយដូចពេលមុនទេ។
អាស៊ីសេរី មិនអាចទាក់ទងនាយខណ្ឌរដ្ឋបាលជលផលខេត្តកំពង់ធំ លោក ប៉ែន វណ្ណរិទ្ធ បានទេ នៅថ្ងៃទី៩ ខែកុម្ភៈ ដោយលោកថា ជាប់ប្រជុំ។
ទំព័រហ្វេសប៊ុក (Facebook) របស់រដ្ឋបាលសាលាខេត្តកំពង់ធំ បញ្ជាក់ថា កាលពីថ្ងៃទី៥ ខែកុម្ភៈ អាជ្ញាធរខេត្ត និងតំណាងក្រសួងកសិកម្ម បានរៀបចំវេទិកាសាធារណៈនៅឃុំផាត់សណ្ដាយ ស្ដីពីការគ្រប់គ្រង និងអភិរក្សធនធានជលផល ដើម្បីពន្យល់ពលរដ្ឋឱ្យបញ្ឈប់ការនេសាទដោយឧបករណ៍ខុសច្បាប់ និងស្ដាប់ពីបញ្ហាប្រឈម ឬសំណូមពររបស់ពួកគាត់។ ពលរដ្ឋក៏បានស្នើឱ្យអាជ្ញាធរជួយទប់ស្កាត់បទល្មើសនេសាទគ្រប់ប្រភេទ និងស្នើឱ្យពួកគាត់អាចដាក់របាំងលបឡុក ឬលបណរ៉ាវ ប្រវែង ២០០ ទៅ ៣០០ម៉ែត្រ និងមានក្រឡា ២ហ៊ុន។
រដ្ឋបាលសាលាខេត្តបញ្ជាក់ថា នៅក្នុងវេទិកានោះ អាជ្ញាធរសម្រេចមិនបង្ក្រាប និងរុះរើលបឡុក និងលបណរ៉ាវ ប្រវែងក្រោម ២០០ម៉ែត្រ និងមានក្រឡា ៣ហ៊ុនទេ ប៉ុន្តែត្រូវដាក់នៅទីតាំងដែលកំណត់ក្នុងប្រកាស និងមិនត្រូវកាប់ព្រៃលិចទឹកធ្វើគន្លងឡើយ ហើយត្រូវដាក់ឆ្ងាយពីច្រាំង ៤គីឡូម៉ែត្រ និងឆ្ងាយពីតំបន់អភិរក្សប្រវែង ១គីឡូម៉ែត្រ។ ក្នុងនោះ អភិបាលខេត្តស្នើឱ្យពលរដ្ឋរួមគ្នាស្រលាញ់ធនធានធម្មជាតិ និងគោរពច្បាប់លុបបំបាត់បទល្មើសនេសាទ និងផ្ដល់ព័ត៌មានពិតដល់អាជ្ញាធរដើម្បីចាត់វិធានអ្នកនៅពីក្រោយខ្នងបទល្មើសទាំងនោះ ព្រមទាំងព្រមានដល់មន្ត្រីពាក់ព័ន្ធបទល្មើសឱ្យដកខ្លួនចេញ។
ប្រធានអង្គការអភិរក្សធនធានជលផល និងព្រៃឈើ លោក កែវ សុខុម មានប្រសាសន៍ថា បទល្មើសនៅតំបន់ខ្លះដូចជាតាមព្រែក គឺបាត់អស់ ប៉ុន្តែបទល្មើសនៅក្នុងបឹងទន្លេសាប នៅតែកើតមាន។ កើតមានក្រោយពេលអាជ្ញាធរខេត្តអនុញ្ញាត ឱ្យពលរដ្ឋអាចដាក់របាំងលបឡុក ឬលបណរ៉ាវ ប្រវែងក្រោម ២០០ម៉ែត្រ ប៉ុន្តែជាក់ស្ដែងគឺពួកគេដាក់លើសពីនេះ។ ក្រៅពីបទល្មើសដាក់របាំងលបរាប់ពាន់ម៉ែត្រ គឺមានបទល្មើសអូសឈិប និងរុញស៊ីបនៅពេលយប់ជាដើម៖ «វាមិនសល់ទេបង ម្ល៉ោះហើយគឺកាន់តែខ្សោយហើយត្រី កាន់តែអស់ទៅហើយ»។
លោកយល់ថា ដើម្បីឱ្យវិធានការរបស់រាជរដ្ឋាភិបាលមានប្រសិទ្ធភាព អាជ្ញាធរត្រូវបញ្ជូនកម្លាំងចុះអនុវត្តច្បាប់ជាប្រចាំនៅលើផ្ទៃបឹងទន្លេសាបតែម្ដង។ លោកថា ប្រសិនបើប្រើកម្លាំងអាជ្ញាធរ ឬមន្ត្រីជំនាញថ្នាក់មូលដ្ឋានឱ្យអនុវត្តវិធានការបង្ក្រាប គឺមិនមានប្រសិទ្ធភាពឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។