សមាជិកភូមិកំពង់ព្រះ ឃុំឆ្នុកទ្រូ ស្រុកបរិបូរណ៍ ខេត្តកំពង់ឆ្នាំង ប្រតិកម្មចំពោះសកម្មភាពកាប់បំផ្លាញព្រៃលិចទឹកក្នុងបឹងទន្លេសាប។ តំណាងពលរដ្ឋរូបនេះបញ្ជាក់ថា ការបំផ្លាញព្រៃលិចទឹកដែលជាជម្រកត្រីពងកូន និងជារនាំងទប់កម្លាំងខ្យល់បក់បោកផ្ទះអ្នកភូមិបណ្ដែតនៅតំបន់នោះ ជាបញ្ហាធ្ងន់ធ្ងរ ប៉ុន្តែអាជ្ញាធរ និងមន្ត្រីជំនាញ ហាក់មិនសូវអើពើរឿងនេះឡើយ។
សកម្មភាពទន្ទ្រានដីព្រៃលិចទឹកប្រមាណជាង ២ហិកតារ ទៅធ្វើជាកម្មសិទ្ធិរបស់អ្នកភូមិ ១គ្រួសារ បានធ្វើឲ្យអ្នកភូមិផ្សេងទៀតរិះគន់អាជ្ញាធរមានសមត្ថកិច្ច ថាខ្លាចអំណាច ឬខ្នងបង្អែកបុគ្គលនោះ ព្រោះសកម្មភាពបំផ្លាញព្រៃប្រព្រឹត្តតាំងពីអំឡុងខែឧសភា ឆ្នាំ២០១៤ តែពុំមានការទប់ស្កាត់។ យ៉ាងណា អាជ្ញាធរស្រុក និងមន្ត្រីជំនាញជលផលបដិសេធថា មិនទាន់ទទួលបានព័ត៌មាននេះនៅឡើយ។
សមាជិកភូមិកំពង់ព្រះ លោក ថែង ចាន់ធី ថ្លែងនៅថ្ងៃទី៧ ខែមករា ថា រូបលោក និងពលរដ្ឋក្នុងភូមិជាច្រើនទៀត បារម្ភពីបញ្ហាខ្យល់បក់រំលើងផ្ទះ និងហិនហោចធនធានមច្ឆជាតិ បន្ទាប់ពីមានអ្នកកាប់បំផ្លាញព្រៃលិចទឹកនៅចំណុចលាងគ្រូផ្លូវតាសៅ ឋិតនៅភូមិកំពង់ព្រះ។ កាលពីឆ្នាំ២០០៤ ក៏ធ្លាប់មានពលរដ្ឋ ៣គ្រួសារចូលទៅទន្ទ្រានព្រៃលិចទឹកនៅតំបន់នោះដែរ ប៉ុន្តែកាលណោះ អាជ្ញាធរ និងមន្ត្រីជំនាញ ទៅហាមក៏បញ្ឈប់ទៅវិញ។ លោកថា លើកនេះមានពលរដ្ឋ ១គ្រួសារសោះ អាជ្ញាធរ និងមន្ត្រីជំនាញ មិនហ៊ានចាត់វិធានការដែលធ្វើឲ្យលោកសង្ស័យថា បុគ្គលនោះមានខ្នងបង្អែកក្រាស់៖ «គាត់ធ្វើ (អ្នកទន្ទ្រានដីព្រៃលិចទឹក) ប្រហែលមានខ្សែឧកញ៉ា ឬឯកឧត្ដមដឹង បានជាសមត្ថកិច្ចជំនាញគ្រប់ថ្នាក់អត់មានធ្វើការអីសោះ។ នៅរដូវទឹកសម្រក អ្នកដែលកាប់បំផ្លាញនៅបន្តដាំដុះទៀត»។
វិទ្យុអាស៊ីសេរី មិនអាចទាក់ទងពលរដ្ឋដែលអ្នកភូមិចោទថាទន្ទ្រានដីព្រៃលិចទឹក និងមេឃុំឆ្នុកទ្រូ លោក សំរិទ្ធិ ផេង ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី៧ ខែមករា។
ចំណែកអភិបាលស្រុកបរិបូរណ៍ លោក ឃួន សៅរុំ និងនាយខណ្ឌរដ្ឋបាលជលផលខេត្តកំពង់ឆ្នាំង លោក សេង ប៊ុនឈឿន ឆ្លើយតបថា មិនទាន់ដឹងព័ត៌មាននេះនៅឡើយ ប៉ុន្តែថានឹងចុះពិនិត្យ ឬមានវិធានការភ្លាមៗ។
កាលពីខែសីហា ឆ្នាំ២០១១ រាជរដ្ឋាភិបាលកម្ពុជា បានចេញអនុក្រឹត្យកំណត់ដែនព្រៃលិចទឹកទំហំជាង ៦សែនហិកតារ (៦៤៧.៤០៦ហិកតារ) ឋិតនៅក្នុងខេត្តចំនួន៦ ជុំវិញបឹងទន្លេសាប រួមមាន ខេត្តកំពង់ឆ្នាំង ពោធិ៍សាត់ បាត់ដំបង បន្ទាយមានជ័យ សៀមរាប និងខេត្តកំពង់ធំ។ ក្រោយពីចេញអនុក្រឹត្យនេះ នៅមានសកម្មភាពរបស់ក្រុមហ៊ុន និងប្រជាពលរដ្ឋកាប់បំផ្លាញជាហូរហែដូចនៅខេត្តពោធិ៍សាត់ ត្រូវពលរដ្ឋកាប់បំផ្លាញជាង ៣០០ហិកតារ នៅចំណុចឃុំអន្សាចំបក់ ស្រុកក្រគរ និងខេត្តកំពង់ឆ្នាំង នៅចំណុចឃុំច្រណូក ស្រុកកំពង់លែង ប៉ុន្តែដីទាំងនេះត្រូវអាជ្ញាធរដកហូតវិញនៅអំឡុងខែឧសភា ឆ្នាំ២០១៤។
មន្ត្រីសម្របសម្រួលសហគមន៍នៃអង្គការសម្ពន្ធភាពដើម្បីអភិរក្សធនធានជលផល (Fact) ប្រចាំខេត្តកំពង់ឆ្នាំង និងខេត្តបាត់ដំបង អ្នកស្រី នូ សារឹម ថ្លែងបញ្ជាក់ថា រហូតមកដល់បច្ចុប្បន្នក៏នៅមានតំបន់ព្រៃលិចទឹកខ្លះ នៃខេត្តទាំង៦ ជុំវិញបឹងទន្លេសាប នៅមានសកម្មភាពកាប់បំផ្លាញដែរ ប៉ុន្តែក្នុងទ្រង់ទ្រាយតូច ហើយអាជ្ញាធរ និងមន្ត្រីជំនាញពាក់ព័ន្ធ មានវិធានការជាបន្តបន្ទាប់ទៅលើជនល្មើសទាំងនោះ៖ «ខ្ញុំគិតថា ការព្រួយបារម្ភរបស់គាត់ (តំណាងពលរដ្ឋ) ហើយបើអាជ្ញាធរអត់ចូលរួមទប់ស្កាត់ ឬការពារព្រៃលិចទឹកទេ ធ្វើឲ្យមានផលប៉ះពាល់ដល់ពួកគាត់ដូចជា ការចងផ្ទះ ទូក ឬកាណូតនៅពេលទឹកឡើង»។
នៅក្នុងអនុក្រឹត្យលេខ១៩៧ របស់រាជរដ្ឋាភិបាល ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី២៩ ខែសីហា ឆ្នាំ២០១១ បានសម្រេចឲ្យអភិបាលនៃគណៈអភិបាលខេត្តទាំង៦ ជាប់បឹងទន្លេសាប មានភារកិច្ចគ្រប់គ្រងដោយផ្ទាល់ និងមានកាតព្វកិច្ចការពារឲ្យខាងតែបាននូវដែនព្រៃលិចទឹក និងព្រៃលិចទឹកក្នុងដែនដីរបស់ខ្លួនដែលបានកំណត់។ ការបាត់បង់ដែនព្រៃលិចទឹក និងព្រៃលិចទឹក ឋិតនៅក្នុងដែនសមត្ថកិច្ចរបស់ខេត្តណាមួយ គណៈអភិបាលខេត្តនោះត្រូវទទួលខុសត្រូវទាំងស្រុងចំពោះមុខរាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។