តំណាងសហគមន៍ការពារព្រៃឈើភូមិពូញ៉ាវ ឃុំមេម៉ង់ ស្រុកកែវសីមា ខេត្តមណ្ឌលគិរី អំពាវនាវសុំឲ្យអាជ្ញាធរមានសមត្ថកិច្ចពាក់ព័ន្ធបទល្មើសព្រៃឈើ ចុះដោះស្រាយករណីបទល្មើសព្រៃឈើបង្កឡើងដោយមន្ត្រីយោធានៅមូលដ្ឋាន និងទទួលយកវត្ថុតាងម៉ាស៊ីនកាត់ឈើដែលសហគមន៍រឹបអូសបាន។
ប្រធានសហគមន៍លោក ហឺយ មីវ នៅថ្ងៃអង្គារ ទី៥ ខែវិច្ឆិកា មានប្រសាសន៍បញ្ជាក់ថា សុវត្ថិភាពសហគមន៍ឋិតក្នុងការគំរាមកំហែង ដោយសារតែមន្ត្រីយោធានៅតែព្យាយាមទាមទារយកម៉ាស៊ីនកាត់ឈើដែលសហគមន៍រឹបអូស។
លោកបន្តថា នេះជាបទល្មើសព្រៃឈើជាក់ស្ដែង ដូច្នេះសហគមន៍មិនយល់ព្រមសម្របសម្រួលទទួលយកប្រាក់ពីយោធាដែលបានប្រព្រឹត្តបទល្មើសព្រៃឈើនោះទេ ដូច្នេះសហគមន៍ស្នើសុំមន្ត្រីជំនាញពាក់ព័ន្ធចុះមកដោះស្រាយបញ្ហា និងទទួលយកវត្ថុតាង និងចាត់វិធានការផ្លូវច្បាប់ចំពោះជនប្រព្រឹត្តខុស៖ «រឿងម៉ាស៊ីនហ្នឹងគេចង់យករាល់ថ្ងៃៗ ខ្ញុំអត់ហ៊ានឲ្យដែរម៉ាស៊ីនហ្នឹង។ ម៉ាស៊ីនមួយគេថាឲ្យ ១០ម៉ឺន»។
កាលពីចុងខែតុលា សមាជិកសហគមន៍មានគ្នា ១២នាក់ បានចុះល្បាតព្រៃ ហើយប្រទះឃើញក្រុមយោធាស្រុកកែវសីមា មានគ្នា ៥នាក់ កំពុងលួចអារឈើនៅតំបន់ព្រៃការពារចំណុចអូរអន្ទ្រះ ទើបអ្នកភូមិនាំគ្នាចាប់រឹបអូសម៉ាស៊ីនកាត់ឈើនាំមករក្សាទុកនៅរោងប្រជុំសហគមន៍ និងបានរាយការណ៍ជូនអាជ្ញាធរឃុំ។
ចំណែកមន្ត្រីយោធាឈ្មោះ វណ្ណ បានព្យាយាមសម្របសម្រួលឲ្យសហគមន៍ប្រគល់ម៉ាស៊ីនកាត់ឈើវិញជាថ្នូរនឹងការបង់ប្រាក់ជូនសហគមន៍ ប៉ុន្តែសហគមន៍មិនយល់ព្រម និងបានរាយការណ៍ករណីនេះជូនមន្ត្រីការពារសិទ្ធិមនុស្សអន្តរាគមន៍ទៅស្ថាប័នពាក់ព័ន្ធចាត់វិធានការដោះស្រាយបញ្ហាជូនសហគមន៍។
មន្ត្រីសម្របសម្រួលសមាគមអាដហុក ខេត្តមណ្ឌលគិរី លោក សុក រដ្ឋា មានប្រសាសន៍បញ្ជាក់ថា លោកបានអន្តរាគមន៍ពាក្យប្ដឹងរបស់សហគមន៍ទៅអាជ្ញាធរខេត្ត ស្ថាប័នអយ្យការតុលាការខេត្ត ខណ្ឌរដ្ឋបាលព្រៃឈើ មន្ទីរបរិស្ថាន មន្ទីរទំនាក់ទំនងព្រឹទ្ធសភារដ្ឋសភា និងអធិការកិច្ចស្ដីពីករណីនេះហើយ ប៉ុន្តែរហូតបច្ចុប្បន្ន លោកមិនបានដឹងថា តើស្ថាប័នពាក់ព័ន្ធទាំងនោះចាត់វិធានការបែបណានៅឡើយ។
លោក សុក រដ្ឋា៖ «ខាងសមាគមខ្ញុំក៏មានការព្រួយបារម្ភពីសុវត្ថិភាពនៃការរស់នៅរបស់ប្រជាពលរដ្ឋនៅក្នុងភូមិហ្នឹងដែរ។ គាត់តែងតែត្អូញត្អែរ ទូរស័ព្ទមកសុំជួយអន្តរាគមន៍ ដើម្បីឲ្យមន្ត្រីជំនាញចុះទៅដោះស្រាយឲ្យពួកគាត់តាមនីតិវិធីច្បាប់។ ពួកបទល្មើសចេះតែមកគំរាមគាត់រៀងរាល់ថ្ងៃទារយកម៉ាស៊ីនវិញ។ ឲ្យឃុំហ្នឹងជួយដោះស្រាយ ឃុំថាអត់ដឹងទេរឿងហ្នឹង។ គេថា បើសហគមន៍ទៅចាប់ទេ អ៊ីចឹងខ្ញុំមិនទៅដោះស្រាយឲ្យទេ»។
យោងឯកសារដែលវិទ្យុអាស៊ីសេរី ទទួលបានពីមន្ត្រីអាដហុក ដដែលឲ្យដឹងថា នាយខណ្ឌរដ្ឋបាលព្រៃឈើខេត្តបានចារលើពាក្យប្ដឹងរបស់សហគមន៍ កាលពីថ្ងៃទី២៥ ខែតុលា ថាតំបន់ព្រៃសហគមន៍កើតមានបទល្មើសព្រៃឈើ គឺឋិតក្នុងដែនជម្រកសត្វព្រៃភ្នំព្រេច ក្រោមការគ្រប់គ្រងរបស់មន្ត្រីជំនាញបរិស្ថាន។
ចំណែកប្រធានមន្ទីរបរិស្ថាន ខេត្តមណ្ឌលគិរី លោក ឈិត សុផល មានប្រសាសន៍ទទួលស្គាល់ថា លោកបានទទួលលិខិតអន្តរាគមន៍ពីមន្ត្រីអាដហុក រួចហើយក្នុងករណីនេះ។
លោកបញ្ជាក់ថា នឹងចាត់មន្ត្រីចុះទៅដោះស្រាយបញ្ហានេះ៖ «មន្ត្រីខ្ញុំមាន ម៉េចៗឲ្យគាត់ទាក់ទងមកខ្ញុំភ្លាមមក ពីណាហ្នឹងក៏ថ្លើមពាសមេឃម្ល៉េះ? ដំណាក់កាលស្រុកទេសប៉ុណ្ណេះហើយ។ ឥឡូវបើខ្លាចយប់ ទុកមិនបានទេ ថ្ងៃឡើងយកគ្នា ១០នាក់ យកម៉ាស៊ីនបីមកខេត្ត សួររកខ្ញុំប្រធានមន្ទីរបរិស្ថាន ខ្ញុំទទួល ហើយបើទាហានណាចង់បាញ់ខ្ញុំ មកចង់យកម៉ាស៊ីនវិញ ឲ្យមក»។
មេឃុំមេម៉ង់ លោក ចាន់ សាមេន បានទទួលស្គាល់ថា មន្ត្រីយោធាស្រុកឈ្មោះ វណ្ណ ពិតជាមានពាក់ព័ន្ធអារឈើក្នុងព្រៃការពារមែន។ ប៉ុន្តែលោកមានបំណងសម្របសម្រួលអប់រំ និងធ្វើកិច្ចសន្យាឲ្យក្រុមយោធាឈប់ប្រព្រឹត្តបទល្មើសព្រៃឈើនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។