ពលរដ្ឋជនជាតិចាម ចំនួន ១៨នាក់ ត្រូវបានមន្ត្រីអភិរក្សព្រៃឈើស្រុកកែវសីមា ខេត្តមណ្ឌលគិរី ចាប់ខ្លួននៅថ្ងៃទី១៨ ខែវិច្ឆិកា ពីបទកាប់រានព្រៃឈើខុសច្បាប់។
មន្ត្រីឃ្លាំមើលសិទ្ធិមនុស្សនៃសមាគមអាដហុក (adhoc) ខេត្តមណ្ឌលគិរី លោក សុក រដ្ឋា ឲ្យដឹងថា មន្ត្រីអយ្យការតុលាការខេត្តមណ្ឌលគិរី បានដោះលែងពលរដ្ឋ ៩នាក់ក្នុងចំណោម ១៨នាក់ ឲ្យវិលទៅលំនៅឋានវិញ បន្ទាប់ពីសាកសួរពួកគេរួចរាល់។ ចំណែកពលរដ្ឋ ៩នាក់ទៀត បានបញ្ជូនទៅរក្សាទុកជាបណ្ដោះអាសន្ននៅពន្ធនាគារខេត្តនារសៀលថ្ងៃដដែល ដើម្បីសាកសួរបន្តនៅថ្ងៃស្អែក៖ «វាខុសច្បាប់ហើយអាហ្នឹង! ជាក់ស្តែងរដ្ឋាភិបាលកំពុងរឹតបន្តឹងករណីកាប់បំផ្លាញព្រៃឈើផង។ ករណីនេះយើងបានសួរទៅគាត់បំភ្លឺមកថាជាលើកដំបូងទេ ដែលគាត់មកទីនេះ ទើបបាន ១សប្ដាហ៍ ២សប្ដាហ៍អ្នកខ្លះហ្នឹង។ បើសិនករណីហ្នឹងគួរអប់រំគាត់ទៅ ហើយដោះលែងគាត់ទៅ បើសិនគាត់មិនទាន់កាប់ជាលក្ខណៈទ្រង់ទ្រាយធំ»។
ជនជាតិចាម ទាំង ៩នាក់ដែលត្រូវឃុំខ្លួនបណ្ដោះអាសន្នមានឈ្មោះ ម៉ាប់មី ហៃរ៉ៃ ជូនម៉ាច ម៉ាចយ៊ូដេះ ឡមឡេះ សុះម៉ាច យ៉ារីន អឹមយ៉ូលីន និង យ៊ូសុះ។ ពួកគេមានទីលំនៅនៅខេត្តត្បូងឃ្មុំ ហើយត្រូវចាប់ខ្លួននៅចំណុចព្រៃអភិរក្សក្នុងភូមិពូគង់ ឃុំស្រែឈូក ស្រុកកែវសីមា ខណៈកំពុងកាប់រានព្រៃយកដីធ្វើកសិកម្ម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។