ពលរដ្ឋនៅស្រុកចុងកាល់ ខេត្តឧត្តរមានជ័យ ដែលថ្លែងក្នុងលក្ខខណ្ឌសុំមិនបញ្ចេញឈ្មោះ នៅថ្ងៃទី១០ តុលា ថា ប្រភេទឡានយីឌុប ដែលមានសណ្ដោងរ៉ឺម៉កធំៗ បានដឹកជញ្ជូនឈើពេញៗឡានចូលទៅប្រទេសថៃ មិនក្រោម ៥ឡានទេជារៀងរាល់ថ្ងៃ។ លោកបន្តថា ឈើដែលដឹកចេញនោះ គឺឆ្លងកាត់តាមច្រកព្រំដែនអន្តរជាតិអូស្មាច់ ខេត្តឧត្តរមានជ័យ ឈមនឹងខេត្តសុរិន្ទ ប្រទេសថៃ។ ចំណែកប្រធានច្រកអូស្មាច់ និងមេព្រៃប្រចាំតំបន់ ហាក់មិនអើពើក្នុងការទប់ស្កាត់ឡើយ៖ «មន្ត្រីរាជការយើងនៅក្នុងនេះឥតមានអ្នកណាហ្នឹងអើពើ ឃើញឈើគេដឹងប៉ុណ្ណេះហើយ ឥតមានការសោកស្ដាយ។ ខ្ញុំនឹកឃើញដល់ពេលនេះ ថៃ គេខាងសុខាកន ថៃគេនិយាយគេថា ខ្ញុំបើសិនជនជាតិខ្មែរ ខ្ញុំនឹងអង្គុយយំនឹងមុខឡានដែលគេដឹកឈើច្រើនណាស់។ គេស្ដាយជំនួសយើងអ៊ីចេះ»។
ឈើដែលដឹកចេញពីប្រទេសកម្ពុជា ចូលទៅប្រទេសថៃ នេះ ត្រូវគេដឹងថា យកចេញពីចំណុចបាក់នឹម នៃឃុំកូនក្រៀល ស្រុកចុងកាល់ ខេត្តឧត្តរមានជ័យ។ ក្នុងនោះ ប្រភេទឈើដែលត្រូវដឹកចេញ មានធ្នង់ នាងនួន ផ្ចឹក សុក្រំ និងក្រឡាញ់ ជាដើម ដែលជាប្រភេទឈើនៅសេសសល់ចុងក្រោយគេរបស់ប្រទេសកម្ពុជា។
វិទ្យុអាស៊ីសេរី ពុំអាចទាក់ទងមន្ត្រីជំនាញ និងមេប៉ុស្តិ៍ប្រចាំច្រកព្រំដែនអន្តរជាតិអូស្មាច់ បានទេនៅថ្ងៃទី១០ ខែតុលា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។