សកម្មជនការពារព្រៃឈើបានឲ្យដឹងនៅថ្ងៃទី២២ សីហា ថា សកម្មជនភាពកាប់ព្រៃឈើនៅតំបន់ព្រៃឡង់ ក្នុងខេត្តព្រះវិហារ កំពុងតែកើតមានយ៉ាងអានាធិបតេយ្យ ដោយគ្មានអាជ្ញាធរមូលដ្ឋានគ្មានការទប់ស្កាត់នោះឡើយ។
មន្ត្រីស៊ើបអង្កេតជាន់ខ្ពស់នៃមជ្ឈមណ្ឌលសិទ្ធិមនុស្សកម្ពុជា លោក ឈឹម សាវុធ មានប្រសាសន៍ថា នៅក្នុងរយៈពេលប៉ុន្មានថ្ងៃកន្លងមកនេះ លោកបានចុះស្រាវជ្រាវនៅខេត្តព្រះវិហារ រកឃើញថា ក្រុមហ៊ុនរបស់លោកឧកញ៉ា ទ្រី ភាព កំពុងធ្វើសកម្មភាពដឹកឈើចេញពីតំបន់ព្រៃឡង់ ជារៀងរាល់ថ្ងៃ ហើយសមត្ថកិច្ចគ្មានទប់ស្កាត់។ លោក ឈឹម សាវុធ បញ្ជាក់ថា សកម្មភាពកាប់ឈើលើកនេះ មិនមែនជារូបភាពរដ្ឋាភិបាលផ្ដល់ដីសម្បទានសេដ្ឋកិច្ចឲ្យនោះទេ គឺក្រុមហ៊ុនបានប្រើប្រាស់ប្រជាពលរដ្ឋចូលទៅកាប់ព្រៃយកមកលក់ឲ្យក្រុមហ៊ុន។
លោក ឈឹម សាវុធ អះអាងថា តំបន់ដែលមានកាប់ព្រៃឈើខ្លាំងនោះ ស្ថិតនៅស្រុករវៀង ស្រុកឆែប ពិសេសស្រុកជ័យសែន និងនៅតំបន់ព្រំប្រទល់ខេត្តព្រះវិហារ ស្ទឹងត្រែង ក្រចេះ និងខេត្តកំពង់ធំ ដែលជាតំបន់ព្រៃស្រោងធំៗ ត្រូវបានក្រុមហ៊ុនកាប់យកទៅលក់នៅបរទេស។
ប្រជាពលរដ្ឋមួយរូបនៅស្រុករវៀង ឈ្មោះ ឡូញ សុផន់ បានរៀបរាប់ថា សកម្មភាពកាប់ព្រៃឈើនេះ កើតមាននៅមុនពេលបោះឆ្នោត និងក្រោយពេលបោះឆ្នោត ដែលគេធ្វើសកម្មភាពខ្លាំង។ លោកបញ្ជាក់ថា សកម្មភាពកាប់ឈើនេះ គឺមានការឃុបឃិតជាមួយអាជ្ញាធរខេត្ត ពីព្រោះថា សមត្ថកិច្ចពុំបានចុះបង្ក្រាប ឬទប់ស្កាត់ឡានដឹកឈើទាំងនោះទេ។
វិទ្យុអាស៊ីសេរី មិនអាចទាក់ទង លោកឧកញ៉ា ទ្រី ភាព និងអភិបាលខេត្តព្រះវិហារ លោក អ៊ំ ម៉ារ៉ា ដើម្បីសួរអំពីការចោទប្រកាន់នេះបានទេ នៅថ្ងៃទី២២ សីហា ឆ្នាំ២០១៣។
អនុប្រធាននាយកដ្ឋាននីតិកម្ម និងពង្រឹងការអនុវត្តច្បាប់នៃរដ្ឋបាលព្រៃឈើ ក្រសួងកសិកម្ម លោក ឡាវ សេដ្ឋាផល បានឲ្យដឹងថា លោកកំពុងចុះទៅស្រាវជ្រាវនៅខេត្តព្រះវិហារ អំពីការកាប់ឈើនេះ បន្ទាប់ពីខាងក្រសួងទទួលបានព័ត៌មានអំពីករណីកាប់ឈើនេះ និងចាត់វិធានការតាមវិធីច្បាប់។
នៅក្នុងយុទ្ធនាការឃោសនាបោះឆ្នោតកន្លងមកនេះ គ្រប់គណបក្សនយោបាយបានធ្វើការឃោសនា និងប្ដេជ្ញាចិត្តក្នុងការថែរក្សាធនធានធម្មជាតិ ពិសេសព្រៃឈើ ក្នុងនោះមានទាំងគណបក្សកាន់អំណាចផង។ ប៉ុន្តែ ក្រុមសកម្មជនការពារព្រៃឈើ បានលើកឡើងថា រដ្ឋាភិបាលអាណត្តិទី៤ បានបរាជ័យក្នុងការទប់ស្កាត់បទល្មើសព្រៃឈើនេះ។ ការផ្ដល់ដីសម្បទានសេដ្ឋកិច្ចរបស់រដ្ឋាភិបាលឲ្យទៅក្រុមហ៊ុនឯកជននោះ ក៏ជាកត្តាមួយធ្វើឲ្យមានការកាប់ព្រៃឈើនៅតំបន់ព្រៃឡង់ នេះដែរ។
ព្រៃឡង់ មានទំហំប្រមាណ ៣.៦០០គីឡូម៉ែត្រក្រឡា ជាព្រៃធម្មជាតិចុងក្រោយ ហើយធំជាងគេនៅអាស៊ីអាគ្នេយ៍ គ្របដណ្ដប់ភាគខាងជើងនៃប្រទេសកម្ពុជា លើខេត្តចំនួន៤ គឺខេត្តកំពង់ធំ ព្រះវិហារ ក្រចេះ និងខេត្តស្ទឹងត្រែង។
សហគមន៍ព្រៃឡង់ ជាជនជាតិដើមភាគតិចក្នុងខេត្តក្រចេះ ស្ទឹងត្រែង ព្រះវិហារ និងខេត្តកំពង់ធំ បាននាំគ្នាធ្វើពិធីសែនព្រេនតាមទំនៀមទម្លាប់ ដោយបួងសួងឲ្យអារុក្ខអារក្ខជួយការពារព្រៃឡង់ ជាច្រើនលើកកន្លងមក។ ការសែនព្រេននោះ ដោយសារពួកគាត់អស់ជំនឿទៅលើអាជ្ញាធរមានសមត្ថកិច្ច ក្នុងការបង្ក្រាបបទល្មើសកាប់ព្រៃឈើ ក្នុងនោះមានទាំងការកាប់ដើមជ័រច្បោះដែលពួកគាត់អាស្រ័យផលជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។