សមាជិកបណ្ដាញសហគមន៍ការពារព្រៃឡង់ ប្រមាណ ៥០នាក់ បាននាំគ្នាចុះល្បាតការកាប់បំផ្លាញព្រៃឈើរយៈពេល ៤ថ្ងៃ ចាប់ពីថ្ងៃទី៨ ដល់ថ្ងៃទី១១ ខែមិថុនា ដើម្បីដាក់របាយការណ៍ទៅរដ្ឋាភិបាល។ ក្រុមសហគមន៍បានចាត់ទុកភាពអនាធិបតេយ្យ នៃបទល្មើសព្រៃឈើនេះ ថាបានធ្វើឡើងពីសំណាក់ប្រជាពលរដ្ឋសាមញ្ញ អ្នកមានលុយ អ្នកមានបុណ្យស័ក្ដិ និងក្រុមហ៊ុនមួយចំនួន។
សមាជិកបណ្ដាញការពារព្រៃឡង់ សហការគ្នាជាមួយអង្គការការពារធនធានធម្មជាតិ បានចុះល្បាតបទល្មើសព្រៃឈើ ហើយរកឃើញឈើដែលជនល្មើសកាប់គរទុករាប់រយម៉ែត្រគូប និងវត្ថុតាងជាច្រើននៅក្នុងទឹកដីស្រុកសណ្ដាន់ ខេត្តកំពង់ធំ។
សមាជិកបណ្ដាញព្រៃឡង់ លោក ហឿន សុភាព ថ្លែងនៅថ្ងៃទី១០ មិថុនា ថា សហគមន៍ដែលជាបណ្ដាញព្រៃឡង់ចំនួន ២ក្រុមមានគ្នាប្រមាណ ៥០នាក់ បានចុះល្បាតព្រៃឡង់ចំនួន ៤ថ្ងៃ គឺពីថ្ងៃទី៨ ដល់ថ្ងៃទី១១។ លោកថា ក្រុមទី១ចុះនៅចំណុចជុំវិញភ្នំជី ឃុំទំរីង ស្រុកសណ្ដាន់ ខេត្តកំពង់ធំ ដែលគេបានឃើញឈើអារច្រៀករួច និងឈើមូលគរទុកជាច្រើនគំនរ ដែលអាចប៉ាន់ប្រមាណថារាប់រយម៉ែត្រគូប។ ឯក្រុមទី២ សហគមន៍បានល្បាតនៅចំណុចវាលបឹង ឃុំដងកាំបិត ស្រុកសណ្ដាន់ ជាប់ព្រំប្រទល់ខេត្តកំពង់ធំ និងខេត្តព្រះវិហារ នោះ ប្រមូលបានភស្តុតាងជាច្រើន ដូចជា ឈើប្រណិតជាច្រើនប្រភេទជាឈើអារច្រៀករួច និងប្រភេទឈើមូលប្រហែល ៥០ម៉ែត្រគូប អាត្រាក់មួយគ្រឿង ម៉ាស៊ីនត្រង់ស៊ីន័រមួយគ្រឿង និងរថយន្តច្នៃប្រភេទគោយន្តចំណុះ ៦តោនមួយគ្រឿង ដែលសហគមន៍ស្គាល់ថាជារថយន្តរបស់អនុប៉ុស្តិ៍ឃុំសណ្ដាន់ លោក ចាន់ មានជ័យ។ រីឯជនប្រព្រឹត្តិផ្សេងទៀត បានរត់គេចខ្លួននៅពេលឃើញសហគមន៍ចុះទៅដល់។
លោក ហឿន សុភាព បញ្ជាក់ថា ឈើដែលចាប់បាននោះ សហគមន៍បានសម្រេចដុតកម្ទេចចោលខ្លះ ដោយសារមិនអាចរង់ចាំស្ថាប័នពាក់ព័ន្ធទៅប្រមូល ប៉ុន្តែសហគមន៍មួយចំនួនបានយាមភស្តុតាងទាំងនេះ ស្របពេលដែលលោកបានរាយការណ៍ជូនសមត្ថកិច្ចជំនាញផ្នែករដ្ឋបាលព្រៃឈើពាក់ព័ន្ធ និងអាជ្ញាធរខេត្តរួចហើយនោះ៖ «ខាងខ្ញុំចង់ឲ្យអាជ្ញាធររដ្ឋបាលព្រៃឈើ ដែលជាជំនាញអ្នកការពារព្រៃឈើ ជួយធ្វើអន្តរាគមន៍ និងជួយគាំទ្រសកម្មភាពរបស់សហគមន៍ ដែលគាត់ធ្វើនោះធ្វើម៉េចឲ្យទាន់សភាពការណ៍ កុំឲ្យថារាយការណ៍ទៅគេឆ្លើយយកតែរួចខ្លួន។ ប្រជាជនភ្នែកច្រើន គាត់មើលឃើញច្រើនមែនទែនហ្មងបទល្មើសនៅក្នុងតំបន់ព្រៃឡង់ ប៉ុន្តែសម្រាប់ជំនាញរដ្ឋបាលព្រៃឈើ អត់សូវមានការចុះ។ គាត់ដែរ ប៉ុន្តែបទល្មើសនៅតែកើតឡើងដដែល ធ្វើរួចសកម្មភាពវានៅតែកើតនៅតែចំណុចដដែលៗ អត់មានកាត់បន្ថយបានទេ មិនដឹងជាគាត់ធ្វើដើម្បីឲ្យល្អមើលឲ្យប្រជាជនមើលឃើញថាគាត់ធ្វើ»។
វិទ្យុអាស៊ីសេរី មិនអាចទាក់ទងនាយប៉ុស្តិ៍រដ្ឋបាលព្រៃឈើ ខេត្តកំពង់ធំ លោក តិប ញ៉ាតា បានទេនៅថ្ងៃទី១០ មិថុនា ដោយទូរស័ព្ទរបស់លោកជាប់រវល់រហូត។
យ៉ាងណាក៏ដោយ អភិបាលខេត្តកំពង់ធំ លោក អ៊ុត សំអន មានប្រសាសន៍ថា លោកបានទទួលព័ត៌មានអំពីការចុះល្បាតរបស់សហគមន៍ ដោយលោកបានបញ្ជាទៅជំនាញ និងអាជ្ញាធរស្រុក ឲ្យចុះអនុវត្តតាមច្បាប់ចំពោះករណីនេះ។ ប៉ុន្តែលោកពុំបានដឹងទេថា រថយន្តច្នៃដែលសហគមន៍ចាប់បាននោះជារបស់អនុប្រធានប៉ុស្តិ៍រដ្ឋបាលឃុំសណ្ដាន់៖ «ខ្ញុំនឹងស្រាវជ្រាវមើល ហើយបើសិនជាថាគាត់មានឡានហ្នឹងមែន បើសិនជាឡានហ្នឹងគាត់ទៅរកស៊ីដឹកវត្ថុតាងបទល្មើស វាពិតជាខុសឆ្គង យើងនឹងមានវិធានការ»។
ទាក់ទងបញ្ហានេះ នាយកអង្គការការពារធនធានធម្មជាតិ លោក ឈឹម សាវុធ ដែលបានចូលល្បាតជាមួយសហគមន៍ការពារព្រៃឡង់ដែរនោះ ឲ្យដឹងថា សហគមន៍មានគំនាបពីអាជ្ញាធរមូលដ្ឋានអំពីកិច្ចការចុះល្បាត ត្រូវតែជូនដំណឹងអាជ្ញាធរឲ្យដឹងជាមុន ដើម្បីបង្ហាញការសហការជាមួយអាជ្ញាធរ។ ដូច្នេះ លោកមិនអាចសន្និដ្ឋានបានទេ ពីព្រោះបទល្មើសនេះឃើញនៅតែវត្ថុតាង មិនបានជួបជនល្មើសដូចមុនឡើយ។ លោកថា មូលហេតុនៃការចុះល្បាតលើកនេះ សហគមន៍ និងអង្គការលោក នឹងធ្វើរបាយការណ៍ទៅរដ្ឋាភិបាលជាថ្មីទៀត។
លោក ឈឹម សាវុធ៖ «ថ្ងៃទី៨ មួយ ហើយថ្ងៃ៩ យើងតាមឈើដែលរដ្ឋបាលព្រៃឈើចូលទៅចាប់ប្រហែលជា ៣០០គូបហ្នឹង យកអត់អស់ពាក់កណ្ដាលផង ដឹកយកមកដាក់នៅទំរីង ចូលមកទំរីង ជួបជាមួយរដ្ឋបាលព្រៃឈើ គេអត់ឲ្យជួបទៀត។ ដល់តែក្រោយមក ណាត់ព្រះរាជអាជ្ញាជួបឡើងមកកំពង់ធំ ក៏គេអត់ឲ្យជួបទៀត។ ហើយឈើអាក្រៅពីចាប់ពីនៅគ្រប់កន្លែងទាំងអស់នៅតាមផ្ទះប្រជាពលរដ្ឋ នៅស្នងអននៅអីគ្រប់កន្លែងទាំងអស់។ យូរៗទៅយើងមិនដឹងទៅធ្វើរបាយការណ៍យ៉ាងម៉េចទេ វាច្រើនពេក អ៊ីចឹងកន្លែងណាក៏កាប់ៗដែរ»។
លោក ឈឹម សាវុធ មានមតិថា ការចុះល្បាតរបៀបនេះគ្រាន់តែជាការទប់ស្កាត់បទល្មើសម្ដងម្កាលតែប៉ុណ្ណោះ។ លោកថា ចង់ទប់ស្កាត់បទល្មើសឲ្យអស់ លុះត្រាតែអាជ្ញាធរ និងកម្លាំងជំនាញមានវិធានការជាក់លាក់ ទើបមានប្រសិទ្ធភាព។ ប៉ុន្តែយ៉ាងហោចណាស់ ជាការបង្ហាញពីឆន្ទៈរបស់សហគមន៍ដែលស្រឡាញ់ធនធានធម្មជាតិ ហ៊ានចំណាយកម្លាំងចិត្ត កម្លាំងកាយ និងថវិកា ដើម្បីចូលរួមការពារធនធានធម្មជាតិ។ ព្រៃឡង់ មានទំហំលាតសន្ធឹងពីខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។