បណ្ដាញការពារព្រៃឡង់ក្នុងខេត្តកំពង់ធំ ជាង ២០នាក់ បានចុះល្បាតបទល្មើសព្រៃឈើរយៈពេល ៣ថ្ងៃ ចាប់ពីថ្ងៃទី២៧ ដល់ថ្ងៃទី២៩ ខែតុលា។
ការល្បាតបទល្មើសព្រៃឈើក្នុងតំបន់ព្រៃឡង់នេះ ពួកគាត់ចាប់បានវត្ថុតាងមួយចំនួន ដូចជា ឈើរាប់សិបម៉ែត្រគូបដែលគេកាប់គរទុកក្នុងព្រៃ និងម៉ាស៊ីនរណារយន្ត ជាដើម។ ប៉ុន្តែអាជ្ញាធរ បានចោទសកម្មជនទាំងនោះថា បណ្ដាញការពារព្រៃឡង់ធ្វើការខុសតួនាទីរបស់ខ្លួន និងខុសច្បាប់។
សហគមន៍ការពារព្រៃឡង់ កំពុងព្រួយបារម្ភចំពោះបញ្ហាប្រឈមនឹងការចាប់ខ្លួន ដោយសារអាជ្ញាធរចោទថា សកម្មភាពល្បាតបទល្មើសព្រៃឈើ ធ្វើឡើងមិនបានជូនដំណឹងទៅអាជ្ញាធរ និងពុំមានលិខិតចុះបេសកកម្មត្រឹមត្រូវ។
បណ្ដាញសហគមន៍ការពារព្រៃឡង់ខេត្តកំពង់ធំ លោក ហឿន សុភាព ថ្លែងនៅថ្ងៃទី២៩ តុលា ថា ចាប់តាំងពីយប់ថ្ងៃទី២៨ តុលា រហូតមកដល់ព្រឹកថ្ងៃទី២៩ តុលា កងកម្លាំងសមត្ថកិច្ចជាង ២០នាក់ ដឹកនាំដោយអធិការស្រុកសណ្ដាន់ លោក អួង ម៉ាលី បានសួរនាំសហគមន៍ជាច្រើន ជុំវិញសកម្មភាពចុះល្បាតបទល្មើសព្រៃឈើ ដែលថាបានធ្វើឡើងដោយមិនបានសហការជាមួយអាជ្ញាធរ និងស្ថាប័នជំនាញ ហើយថាការដុតវត្ថុតាងដែលចាប់បាន គឺខុសច្បាប់។ ប៉ុន្តែលោកបារម្ភខ្លាចមានការឃាត់ខ្លួន លោកក៏សុខចិត្តឆ្លើយទទួលកំហុសថា ចាប់ពីពេលនេះតទៅ សហគមន៍នឹងសហការជាមួយអាជ្ញាធរឡើងវិញ។
ប៉ុន្តែផ្ទុយទៅវិញ លោកថា សកម្មភាពល្បាតពីរយប់បីថ្ងៃនៅចំណុចជាំក្ដារ និងចំណុចដំណាក់កកោះ ឃុំមានរិទ្ធ ស្រុកសណ្ដាន់ ពួកគាត់ចាប់បានឈើដែលគេកាប់រលំរួច មានដូចជា កកោះ ផ្ដៀក ឈើទាល និងដួងចែម ប្រមាណ ៥០ម៉ែត្រគូប និងម៉ាស៊ីនរណារយន្តចំនួន ៥គ្រឿង គឺពួកគាត់បានប្រគល់ជូននាយផ្នែករដ្ឋបាលព្រៃឈើទំរីង។ រីឯការចុះបេសកកម្មនេះទៀតសោត គឺមិនមែនជាលើកទី១ទេ ហើយពួកគាត់ក៏បានជូនដំណឹងអាជ្ញាធរដែនដីដែរ៖ «ការងារនេះ គឺជាការងាររដ្ឋបាលព្រៃឈើ និងសមត្ថកិច្ចទាំងអស់ទេ ប៉ុន្តែយើងមានឆន្ទៈចង់ជួយ ដោយសារបទល្មើសនេះវាកើតឡើងខ្លាំងពេកនៅក្នុងតំបន់ព្រៃឡង់។ អ្នកដែលជួយទៅជាអ្នកដែលមានទោស ហើយអ្នកដែលបំផ្លាញទៅជាមនុស្សល្អ គិតថាវាផ្ទុយខុសស្រឡះជាមួយនឹងច្បាប់ វាអស់កម្លាំងធ្វើការ។ យើងខំប្រឹងប្រែងចាប់ម៉ាស៊ីនបាន វាផ្ទុយទៅវិញ គឺសមត្ថកិច្ចដែលគេមកសាកសួរ សម្រាប់ក្រុមពួកខ្ញុំនេះមានតែការបន្ទោស មានតែការរារាំងពួកខ្ញុំទៅវិញ»។
ឆ្លើយតបបញ្ហានេះ អធិការស្រុកសណ្ដាន់ លោក អួង ម៉ាលី បានបដិសេធថា កម្លាំងសមត្ថកិច្ចគ្រាន់តែសាកសួរ មិនមានបំណងឃាត់ខ្លួនអ្វីនោះទេ។ លោកថា សហគមន៍នេះគ្មានការទទួលស្គាល់តាមច្បាប់ឡើយ ដែលទាមទារឲ្យពួកគាត់ផ្អាកសកម្មភាពចុះល្បាតក្នុងព្រៃមួយរយៈសិន៖ «គាត់ធ្វើអីកុំឲ្យវាហួសហេតុ ឈើដែលបានតាមផ្លូវគ្របទុកយករបស់គេ ចូលភាពបំផ្លិចបំផ្លាញទ្រព្យសម្បត្តិអ្នកដទៃ។ តាមពិត យើងប្រជុំជាមួយគាត់កន្លងមក គាត់ត្រូវសហការជាមួយយើងហើយ ប៉ុន្តែធ្វើនេះឲ្យមានក្របខ័ណ្ឌ កុំឲ្យធ្វើអត់មានការដឹកនាំ ចេះតែនឹកឃើញធ្វើវាខុសច្បាប់ណា»។
ទាក់ទងបញ្ហានេះ មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ (Licadho) លោក អំ សំអាត មានមតិថា ការចោទប្រកាន់របស់អាជ្ញាធរទៅលើសហគមន៍នេះ គឺមិនត្រឹមត្រូវទេ។ លោកថា នេះ គឺជាការរារាំងសកម្មភាព និងគំរាមកំហែងសហគមន៍ តែផ្ទុយទៅវិញ គួរតែលើកទឹកចិត្តប្រជាពលរដ្ឋ។
បណ្ដាញការពារព្រៃឡង់ដដែល លោក ហឿន សុភាព អះអាងថា ម៉ាស៊ីនរណារយន្តចំនួន ៥គ្រឿង ដែលពួកគាត់ចាប់បាននៅពេលនេះ គឺលោកដឹងថាជាប់ពាក់ព័ន្ធមន្ត្រីប៉ូលិស និងប៉េអិមនៅស្រុកសណ្ដាន់។ រីឯឈើ និងវត្ថុតាងផ្សេងៗដែលចាប់បាន នៅពេលសហគមន៍ប្រគល់ជូនស្ថាប័នជំនាញ ច្រើនទៅដល់ដៃជនល្មើសវិញ។ ជាងនេះទៅទៀត សហគមន៍អស់ជំនឿទៅលើការបង្ក្រាបបទល្មើសព្រៃឈើរបស់កម្លាំងជំនាញថាគ្មានប្រសិទ្ធភាព ដោយសារតែក្រុមនោះបានការពារ និងយកលុយពីក្រុមអ្នករកស៊ីឈើទាំងនោះទៅវិញ។
ក្រៅអំពីបណ្ដាញសហគមន៍ការពារព្រៃឡង់ខេត្តកំពង់ធំ ដែលបានចុះល្បាតព្រៃឈើនេះ សហគមន៍ក្នុងខេត្តចំនួនបីទៀត គឺខេត្តក្រចេះ ស្ទឹងត្រែង និងខេត្តព្រះវិហារ ក៏បានចុះធ្វើសកម្មភាពដូចគ្នាដែរក្នុងរយៈពេលបីថ្ងៃ ចាប់ពីថ្ងៃទី២៧ ដល់ថ្ងៃទី២៩ ខែតុលា។
បណ្ដាញការពារព្រៃឡង់ទាំងបួនខេត្ត ក៏កំពុងមានគម្រោងហែក្បួនក្នុងបំណងផ្សព្វផ្សាយ និងជំរុញឲ្យរដ្ឋាភិបាល ទប់ស្កាត់ការកាប់បំផ្លាញព្រៃឈើនៅកម្ពុជា ដែលកំពុងរងគ្រោះ និងហិនហោចទៅៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។