សកម្មភាពកាប់បំផ្លាញព្រៃឈើនៅតំបន់មួយចំនួននៃស្រុកក្រគរ ខេត្តពោធិ៍សាត់ កាន់តែកើតមានច្រើនឡើងពីមួយថ្ងៃទៅមួយថ្ងៃ។ ប្រជាពលរដ្ឋក្នុងមូលដ្ឋានអះអាងថា សកម្មភាពកាប់ឈើនេះមានប្រើរណារង៉ោងរាប់សិបគ្រឿង លាន់កងរំពងពេញព្រៃ ប៉ុន្តែខាងអាជ្ញាធរ និងមន្ត្រីជំនាញមានសមត្ថកិច្ចមិនអើពើ ឬមិនមានវិធានការទប់ស្កាត់ចំពោះបញ្ហានេះឡើយ។
ប្រជាពលរដ្ឋរស់នៅស្រុកក្រគរ ឲ្យដឹងនៅថ្ងៃទី២៩ ខែតុលា ថា រទេះគោយន្តប្រដាប់ដោយម៉ាស៊ីនអារឈើ ឬរណារយន្ត ឬរណារង៉ោងប្រមាណជា ២០គ្រឿងក្នុងមួយថ្ងៃៗ បានសម្រុកចូលកាប់ឈើគ្រប់ប្រភេទ នៅចំណុចភ្នំតាកុច ភ្នំអូរធំ និងចំណុចភ្នំខុស នៃឃុំស្វាយស ស្រុកក្រគរ។ ក្រុមអ្នកកាប់ឈើ ភាគច្រើនមកពីខេត្តកំពង់ឆ្នាំង កំពង់ស្ពឺ និងពីតាមស្រុកនានានៃខេត្តពោធិ៍សាត់។
ពលរដ្ឋម្នាក់ដែលថ្លែងក្នុងលក្ខខណ្ឌសុំមិនបញ្ចេញឈ្មោះបញ្ជាក់ថា សកម្មភាពកាប់បំផ្លាញ និងធ្វើអាជីវកម្មប្រភេទឈើផ្ចឹក ធ្នង់ ឧសស្ទែរ និងប្រភេទឈើដំសម្បក បានកើតឡើងជាច្រើនឆ្នាំមកហើយនៅក្នុងមូលដ្ឋានរបស់គាត់ ប៉ុន្តែក្នុងរយៈពេលចុងក្រោយនេះ ក្រុមឈ្មួញបានបង្កើតដេប៉ូទិញប្រភេទឈើចម្រុះចំនួន ១០កន្លែងទៀត នៅក្នុងទឹកដីឃុំស្វាយស និងឃុំឈើតុំ។
លោកបន្តថា កន្លងទៅលោកធ្លាប់ប្ដឹងបញ្ហានេះដល់អាជ្ញាធរមូលដ្ឋានដែរ ប៉ុន្តែត្រូវគេបដិសេធ និងឆ្លើយតបថាពុំមានសមត្ថភាពអាចទប់ស្កាត់បាន។ អ្នកភូមិកំពុងព្រួយបារម្ភចំពោះការបាត់បង់ព្រៃឈើអាស្រ័យផល និងឈើសម្រាប់ធ្វើផ្ទះសម្បែងនាថ្ងៃអនាគត៖ «សំខាន់ ខ្ញុំទាក់ទងជាមួយអាជ្ញាធរខ្លាំងជាងគេ ខ្ញុំមានការអី។ ខ្ញុំក៏ក្នុងនាមខ្ញុំធ្វើការ តែខ្ញុំទៅសុំគាត់ៗ មួយឆ្លើយដាក់មួយៗអ៊ីចឹងទៅ ម្ល៉ោះហើយខ្ញុំមិនដឹងទៅគិតយ៉ាងម៉េច ចង់បបួលពលរដ្ឋធ្វើបាតុកម្មក៏មិនហ៊ាន ម្ល៉ោះហើយខ្ញុំនឹកឃើញមានតែឲ្យបងជួយផ្សព្វផ្សាយទៅប្រមុខរដ្ឋាភិបាល ដើម្បីដាក់កម្លាំងមកជួយបង»។
ទាក់ទងបញ្ហានេះ ប្រធានមន្ទីរបរិស្ថានខេត្តពោធិ៍សាត់ លោក ថៃ ចន្ថា មិនធ្វើអត្ថាធិប្បាយអ្វីឡើយ ក្រោមហេតុផលទូរស័ព្ទពិបាកទាក់ទង រួចក៏ចុចផ្ដាច់ការសន្ទនាតែម្ដង។
ប៉ុន្តែ ជំទប់ទី១ឃុំស្វាយស លោក ចាន់ សៃ ទទួលស្គាល់ថា សកម្មភាពកាប់ឈើពិតជាកើតមានខ្លះមែននៅក្នុងឃុំរបស់លោក តែពុំមានច្រើននោះទេ ដោយអ្នកកាប់ភាគច្រើន សម្រុកហួសទៅកាប់នៅចំណុចរាំងខ្វាវ នៃឃុំសន្ទ្រែ ស្រុកភ្នំក្រវាញ។ លោកថា កាលពីពេលថ្មីៗនេះ អាជ្ញាធរបានចុះធ្វើកិច្ចសន្យាបញ្ឈប់សកម្មភាពកាប់បំផ្លាញព្រៃឈើដោយរណារយន្ត ឬរណារង៉ោងចំនួន ៣៦គ្រឿង។
ប្រធានអង្គការការពារធនធានធម្មជាតិ លោក ឈឹម សាវុធ ធ្លាប់បញ្ជាក់ថា សកម្មភាពកាប់បំផ្លាញព្រៃឈើ ពិតជាបានប្រព្រឹត្តដោយប្រជាពលរដ្ឋមែន ប៉ុន្តែក្រុមឈ្មួញ ឬអ្នកមានលុយ និងមានអំណាចទេ ដែលជាអ្នកផ្ដើមក្នុងការកាប់បំផ្លាញធនធានធម្មជាតិ តាមរយៈការផ្ដល់សម្ភារៈ ឬដើរប្រមូលទិញឈើទាំងនោះពីប្រជាពលរដ្ឋ។ សកម្មភាពទាំងនេះ អាជ្ញាធរ និងមន្ត្រីពាក់ព័ន្ធ ទប់ស្កាត់ពុំមានប្រសិទ្ធភាពឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។