ក្រុមសហគមន៍អ្នកការពារព្រៃឈើភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី នៅថ្ងៃច័ន្ទ ទី១៤ ខែតុលា អំពាវនាវសុំឲ្យអាជ្ញាធរខេត្តចាត់វិធានការបន្ទាន់ ទប់ស្កាត់ចលនាកាប់រានព្រៃឈើហើយយកដីលក់អនាធិបតេយ្យ។
តំណាងសហគមន៍ លោក រម៉ាស ស្វាន មានប្រសាសន៍បញ្ជាក់ថា ព្រៃឈើសហគមន៍ការពារបានភ្លូ និងព្រៃមួងតូ នឹងត្រូវគេកាប់រានអស់នៅពេលដ៏ខ្លីខាងមុខនេះ ប្រសិនក្រុមសមត្ថកិច្ចពាក់ព័ន្ធ មិនចាត់វិធានការទាន់ពេលវេលាទេ។ លោកបន្តថា អ្នកកាប់រានព្រៃមួយផ្នែក គឺជាសមាជិកសហគមន៍ ៥០គ្រួសារ និងមួយផ្នែកទៀត គឺជាឈ្មួញអ្នកទិញដី បានជួលកម្មករកាប់រានព្រៃឈើនៅជាប់នឹងព្រំដីដែលទិញ ពង្រីកយកដីលក់បន្ថែមទៀត៖ «ហ្នឹងហើយ ពួកខ្ញុំទៅមើលជាក់ស្តែង គេកាប់រានគេពង្រីកទៅទៀត។ ហ្នឹងឃាត់ហើយ ពីមុនថាឃាត់ៗហើយ ប៉ុន្តែគេសំអាងដីវាស់ ហើយគេមានសិទ្ធិគេ ហើយខ្ញុំទប់ស្កាត់អត់ឈ្នះ»។
កាលពីថ្ងៃអាទិត្យ សហគមន៍ជនជាតិដើមភាគតិចចារ៉ាយ រស់នៅភូមិឡំ រួមនឹងមន្ត្រីអាជ្ញាធរភូមិ បានប្រជុំគ្នា និងរាយការណ៍ថា ប្រធានភូមិបាលស្រុកអូរយ៉ាដាវ លោក ឃិន សុផល គឺជាអ្នករត់ការប្រមូលទិញដីទាំងអស់នោះ ប្រគល់ទៅឲ្យលោកជំទាវមួយរូបក្នុងតម្លៃជាង ១ពាន់ដុល្លារក្នុងដីមួយហិកតារ។
ឆ្លើយតបសេចក្តីអះអាងនេះ លោក ឃិន សុផល មានប្រសាសន៍បដិសេធថា លោកមិនបានទិញដីដែលបានពីការកាប់រានព្រៃនោះទេ គឺលោកបានទិញដីជាង ១០០ហិកតារ ពីអ្នកភូមិមានប័ណ្ណកម្មសិទ្ធិស្របច្បាប់។ លោកបន្តថា ការទិញលក់ដីនេះ មានលិខិតស្នាមបញ្ជាក់ និងទទួលស្គាល់ដោយអាជ្ញាធរដែនដីត្រឹមត្រូវ។
ទាក់ទិនទៅនឹងករណីនេះដែរ នាយសង្កាត់ព្រៃឈើនៃខណ្ឌរដ្ឋបាលព្រៃឈើ ខេត្តរតនគិរី លោក ជា កុលណារ៉ា មានប្រសាសន៍បញ្ជាក់ថា លោកមិនបានដឹងពីករណីកាប់រានព្រៃឈើថ្មីនេះទេ។ លោកអះអាងថា នឹងចុះទៅពិនិត្យសេចក្តីរាយការណ៍នេះ៖ «នៅភូមិឡំ បាទ! ខ្ញុំចុះទៅមើល។ ម៉េចត្រូវទៅកាប់ម៉េច អាហ្នឹងខុសៗអត់ត្រូវទេ»។
ព្រៃឈើការពារសហគមន៍ភូមិឡំ មានទំហំប្រមាណ ៦គីឡូម៉ែត្រការ៉េ កាលពីឆ្នាំ២០១២ ព្រៃឈើនៅតំបន់នោះត្រូវក្រុមហ៊ុនសម្បទានរំលោភឈូសឆាយអស់រាប់រយហិកតារ។ ចំណែកសមាជិកសហគមន៍ខ្លះ ក៏បានឆ្លៀតឱកាសដណ្ដើមកាប់រានព្រៃនោះយកដីធ្វើចម្ការ អស់មួយចំណែកទៀត ដោយខ្លាចក្រុមហ៊ុនឈូសឆាយយកដីអស់។
មន្ត្រីឃ្លាំមើលបញ្ហាព្រៃឈើសមាគមអាដហុក ខេត្តរតនគិរី លោក ឆាយ ធី មានប្រសាសន៍កត់សម្គាល់ថា អំពើពុករលួយទាក់ទិនការទិញលក់ដីព្រៃខុសច្បាប់ ហើយពុំមានការផ្ដន្ទាទោសជាក់លាក់ដល់អ្នកប្រព្រឹត្តិ គឺជាហេតុផលនាំឲ្យមានអំពើអនាធិបតេយ្យកាប់រានព្រៃឈើ។ កន្លងទៅនេះ ជនឆ្លៀតឱកាសបានបំភិតបំភ័យឲ្យសហគមន៍ ចុះបញ្ជីដីធ្លីជាកម្មសិទ្ធិឯកជនលើដីដែលបានកាប់រាន ដើម្បីងាយយកដីនោះលក់ដូរ។ លោកបន្តថា ការលក់ដូរដីសហគមន៍ គឺជាកត្តាចម្បងនាំឲ្យអ្នកភូមិអស់ដី ហើយសកម្មភាពអនាធិបតេយ្យកាប់រានព្រៃឈើ ដើម្បីយកដីរបស់អ្នកភូមិនៅតែកើតមានបន្ត៖ «នៅសល់ក្បាលដីដែលបុកទៅព្រៃ និស្សិតអត់ព្រមវាស់ឲ្យហ្នឹង មានការកាប់រានកាប់ហើយបានគេទិញ។ មេភូមិបានបញ្ជាក់ហើយ គាត់ថាខ្លួនគាត់ផ្ទាល់បានសុំនិស្សិតវាស់បន្ថែម និស្សិតអត់វាស់ឲ្យទេ ឲ្យតែជាន់លើដីព្រៃ។ អ៊ីចឹង អាកន្លែងហ្នឹងហើយរងការកាប់»។
របាយការណ៍អង្កេតរបស់មន្ត្រីសមាគមអាដហុក ខេត្តរតនគិរី ឲ្យដឹងថា ប្រជាពលរដ្ឋសហគមន៍ភូមិឡំ មានសមាជិកជិត ២០០គ្រួសារ ក្នុងនោះសមាជិកសហគមន៍ជាង ១០០គ្រួសារ បានចុះបញ្ជីដីធ្លីជាកម្មសិទ្ធិឯកជនពីគោលនយោបាយចាស់ សកម្មភាពថ្មីរបស់រាជរដ្ឋាភិបាល កាលពីឆ្នាំ២០១២ និងជាង ៧៩គ្រួសារ រង់ចាំចុះបញ្ជីដីធ្លីជាកម្មសិទ្ធិសមូហភាព។ ហើយមកទល់នឹងបច្ចុប្បន្ន សមាជិកសហគមន៍អ្នកបានចុះបញ្ជីដីជាកម្មសិទ្ធិឯកជន ៥០គ្រួសារ បានលក់ដីអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។