អាជ្ញាធរស្រុកអណ្ដូងមាស ខេត្តរតនគិរី រួមជាមួយពលរដ្ឋសហគមន៍ការពារព្រៃឈើ បានចុះបង្ក្រាបកន្លែងកាប់ឈើខុសច្បាប់លើដីខ្មែរ បង្កឡើងដោយពលរដ្ឋវៀតណាម រួមទាំងប្រើប្រាស់អាវុធសម្រាប់ការពារបទល្មើសឆ្លងដែនទៀតផង។
អភិបាលស្រុកអណ្ដូងមាស លោក នង ដារិទ្ធ មានប្រសាសន៍បញ្ជាក់ថា កងកម្លាំងមួយក្រុម រួមជាមួយសហគមន៍ នៅថ្ងៃទី៦ ខែវិច្ឆិកា កំពុងធ្វើដំណើរចូលព្រៃបង្ក្រាបសកម្មភាពលួចកាប់ឈើរបស់ពលរដ្ឋវៀតណាម និងស្រាវជ្រាវរកជនសង្ស័យពាក់ព័ន្ធក្នុងបញ្ហានេះ។ លោកបន្តថា ពលរដ្ឋវៀតណាម ប្រើប្រាស់អាវុធ ហើយគំរាមតដៃជាមួយក្រុមសហគមន៍ការពារព្រៃឈើថែមទៀត៖ «ត្រូវការចាប់មនុស្ស បើខ្មោចក្នុងមិនឲ្យដៃ ខ្មោចក្រៅចេញមិនបាន ចូលមិនបានទេណា! ទាំងក្នុងទាំងក្រៅហ្នឹង។ ហើយឥឡូវតាមស្តាប់ទៅ មិនមែនធម្មតាឯណា! មានកាំភ្លើងកែច្នៃមានកាំបិតមានផ្គាក់»។
កាលពីថ្ងៃទី៥ ខែវិច្ឆិកា សហគមន៍ជនជាតិដើមភាគតិចភូមិកែត ស្នើសុំទៅអាជ្ញាធរឃុំញ៉ាង ឲ្យជួយទប់ស្កាត់សកម្មភាពពលរដ្ឋវៀតណាម មួយក្រុមមានគ្នា ៨នាក់ ប្រដាប់ដោយអាវុធវែងមួយដើម ម៉ាស៊ីនកាត់ឈើ ៦គ្រឿង អមដោយរថយន្តពីរគ្រឿង បានចូលមកកាប់ឈើមូលក្នុងដីខ្មែរ ហើយដឹកជញ្ជូនចូលទៅដីវៀតណាម តាំងពីដើមខែវិច្ឆិកា រហូតមក។ ក្រុមពលរដ្ឋវៀតណាម ទាំងនោះ បានគំរាមតតាំងជាមួយក្រុមល្បាតសហគមន៍ការពារព្រៃឈើ បន្ទាប់ពីសហគមន៍ចាប់រឹបអូសម៉ាស៊ីនកាត់ឈើពួកគេចំនួនពីរគ្រឿង។ ដោយឡែកទាក់ទិនបទល្មើសឆ្លងដែននេះ ក្រុមសហគមន៍សង្ស័យទៅលើសមត្ថកិច្ចប៉ូលិសការពារព្រំដែននៅតំបន់នោះ ជាអ្នកឃុបឃិតជាមួយពលរដ្ឋវៀតណាម ទាំងនោះទៀតផង។
ឆ្លើយតបការអះអាងនេះ មេបញ្ជាការប៉ូលិសការពារព្រំដែនវរៈ២០៣ លោក បុត្រ ពីលី បញ្ជាក់ថា លោកទើបចុះត្រួតពិនិត្យនៅតំបន់ផ្សេង មិនបានដឹងរឿងនេះទេ។ ទោះយ៉ាងនេះក៏ដោយ លោកអះអាងថា នឹងត្រួតពិនិត្យករណីនេះឡើងវិញ៖ «ខ្ញុំទើបមកពីល្បាតខាងបាក់កែ ខ្ញុំទើបមកពីព្រៃដែរ ចាំមើលខ្ញុំទូរស័ព្ទទៅវិញ។ អាហ្នឹងអូរសេដ្ឋីមានពីរ»។
ចំណែកមេបញ្ជាការយោធាការពារព្រំដែន លោក លី សុវណ្ណារ៉ា បញ្ជាក់ដូចគ្នាថា លោកមិនទាន់ទទួលបានសេចក្តីរាយការណ៍ករណីនេះនៅឡើយ។ លោកអះអាងដូចគ្នាថា នឹងចាត់កងយោធាប៉ុស្តិ៍ការពារព្រំដែននៅតំបន់នោះ ត្រួតពិនិត្យសេចក្តីរាយការណ៍នេះ៖ «មានកម្លាំងពីរនាក់នៅហ្នឹង អត់ឮផង។ ព្រៃហ្នឹងអូរសេដ្ឋីហ្នឹង វាមានកន្លែងគេហៅបង្គោលបីអាហ្នឹង ២៥មួយ ២៥ពីរ ២៥បី អ៊ីចឹងចាំមើលចាំខ្ញុំបញ្ជាឲ្យកម្លាំង គេចុះទៅមើលកន្លែងហ្នឹង»។
រហូតមកទល់នឹងរសៀលម៉ោង៤ថ្ងៃដដែល វិទ្យុអាស៊ីសេរី មិនទាន់ទទួលព័ត៌មានពីលទ្ធផលចុះបង្ក្រាបករណីនេះនៅឡើយ។ មន្ត្រីអភិបាលស្រុក និងតំណាងសហគមន៍ភូមិកែត បញ្ជាក់ថា ក្រុមបង្ក្រាបមិនទាន់ត្រឡប់មកវិញទេ ដោយសារកន្លែងកាប់ឈើនៅឆ្ងាយផ្លូវ ពិបាកធ្វើដំណើរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។