ឈើហ៊ុបជ្រុងយ៉ាងតិច ១៥រថយន្ត ត្រូវបានដឹកជញ្ជូនចេញពីដេប៉ូស្តុកឈើរបស់ក្រុមម៉ៅការសម្អាតផ្ទៃអាងស្តុកទឹកនៅចំណុចញឺន ក្នុងឃុំស្រែគរ២ ស្រុកសេសាន ខេត្តស្ទឹងត្រែង។
អ្នកដឹងពីសកម្មភាពដឹកជញ្ជូនឈើសុំមិនឲ្យបញ្ចេញឈ្មោះ ឲ្យដឹងនៅថ្ងៃព្រហស្បតិ៍ ទី២៣ ខែឧសភា ឆ្នាំ២០១៣ ថា ឈើប្រណិតប្រភេទធ្នង់ និងឈើប្រភេទលេខ១ មានឈើក្រំ ផ្ចឹក ត្រូវបានដឹកជញ្ជូនតាមទូក និងសាឡង់ពីត្រើយម្ខាងទន្លេក្នុងភូមិស្រែគរ២ ហើយរថយន្តរង់ចាំដឹកជញ្ជូនចេញពីត្រើយម្ខាងទន្លេក្នុងភូមិស្រែគរ១ កាលពីរាត្រីថ្ងៃពុធ ទី២២ ខែឧសភា និងចេញតាមផ្លូវភូមិស្រែគរ១ មកផ្លូវជាតិលេខ៧៨ និងបន្តនាំចេញទៅប្រទេសវៀតណាម។
ប្រជាពលរដ្ឋដដែលឲ្យដឹងថា ឈើទាំងអស់នោះមួយចំណែកធំកាប់ចេញពីតំបន់ភ្នំក្រឡាពស់ ក្រៅផ្ទៃសម្អាតអាងស្តុកទឹកដោយខុសច្បាប់។ បច្ចុប្បន្ន ឈើប្រមាណ ១ម៉ឺនម៉ែត្រគូប ត្រូវបានដឹកមកស្តុកទុកនៅដេប៉ូស្តុកឈើនោះ និងមួយចំណែកធំលាក់ទុកនៅព្រៃ៖ «គេចាប់ផ្ដើមសម្រុកប្រមូលប្រហែលជាកន្លះខែនេះ សម្រុកប្រមូលខ្លាំង។ ហើយបួនប្រាំថ្ងៃនេះ សម្រុកដឹកចេញច្រើន ហើយឡាននៅក្នុងហ្នឹងសរុបជិត ១០០គ្រឿង ចាំដឹកឈើនៅក្នុងព្រៃហ្នឹង ទើបចាប់ផ្ដើមសម្រុកដឹកចូល ហើយយប់មិញសម្រុកដឹកចេញប្រហែង ១៥ឡាន»។
កាលពីសប្ដាហ៍មុន ប្រជាពលរដ្ឋសហគមន៍ភូមិស្រែគរ ឃុំស្រែគរ ស្រុកសេសាន ខេត្តស្ទឹងត្រែង រាយការណ៍ថា ឈើមូលប្រមាណ ៤ម៉ឺនម៉ែត្រគូប ត្រូវបានគេកាប់នៅក្នុងព្រៃក្រៅតំបន់បោសសម្អាតអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោម២។ ក្រុមអ្នកកាប់ឈើដឹកនាំដោយឧកញ៉ាឈ្មោះ លឹម ប៊ុនណា ហៅ ខ្នារ និងមេការពីរនាក់មានឈ្មោះ សាន ចយ និងឈ្មោះ ធន។
ទាក់ទិនសេចក្តីរាយការណ៍នេះ លោក សាន ចយ បានឆ្លើយបដិសេធថា ក្រុមហ៊ុនបោសសម្អាតអាងមិនបានដឹកជញ្ជូនឈើនាំចេញអ្វីនោះទេ។ ចំណែកឈើដែលស្តុកទុកក្នុងដេប៉ូ គឺជាឈើកាប់ក្នុងផ្ទៃអាងបានប្រមាណ ៦០០ ទៅ ៨០០ម៉ែត្រគូប រង់ចាំមន្ត្រីជំនាញព្រៃឈើវាស់វែងបង់ពន្ធចូលរដ្ឋ។ លោកទទួលស្គាល់ថា មានប្រជាពលរដ្ឋនៅតំបន់នោះខ្លះកាប់ឈើនៅក្រៅផ្ទៃអាង ប៉ុន្តែមិនមានជាប់ពាក់ព័ន្ធក្រុមហ៊ុនបោសសម្អាតអាងនោះទេ៖ «ពាក្យចចាមអារ៉ាមទេ កន្លែងអាងនេះមានដឹកឈើឯណាចេញ កំពុងតែប្រមូលរៀបចំបង់ពន្ធជូនរដ្ឋ។ មិនទាន់បានស្អីៗទេ អ្នកណានិយាយនេះភូតទាំងអស់»។
ក្រសួងកសិកម្មបានអនុញ្ញាតឲ្យក្រុមហ៊ុនក្នុងស្រុកមួយឈ្មោះ អាំង អេន អាសូស៊ីអេត ឡយ័រ (ANG & ASSOCIATES LAWYER) កាប់ឈើសម្អាតផ្ទៃអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង មានផ្ទៃដី ៣ម៉ឺន ៦ពាន់ហិកតារ។ កាលពីខែមករា ឆ្នាំ២០១៣ ប្រធានក្រុមហ៊ុនលោកឧកញ៉ា គិត ម៉េង ចេញលិខិតឲ្យលោក លឹម ប៊ុណ្ណា និងលោក ហាស វិបុល ចាត់ចែងតំបន់ព្រៃឈើក្នុងអាងស្តុកទឹកនោះ។
មេឃុំស្រែគរ លោក សៀក មេគង្គ មានប្រសាសន៍បញ្ជាក់ថា អ្នកភូមិក៏បានរាយការណ៍ពីសកម្មភាពដឹកជញ្ជូនឈើចេញពីច្រាំងទន្លេនៅវេលាយប់។ លោកបន្តថា ក្រុមអ្នកម៉ៅការបោសសម្អាតអាង បានបង្កើតទីតាំងស្តុកឈើពីរកន្លែងនៅចំណុចពោន និងមួយកន្លែងទៀតនៅចំណុចខ្ទមអ្នកតាការ៉ាកាន់ ផ្លូវចូលទៅភូមិស្រែគរ១ និងមានសមត្ថកិច្ចនគរបាលដាក់ប៉ុស្តិ៍ឃ្លាំមើលនៅទីនោះ៖ «ដកកម្លាំងប៉ុស្តិ៍ម្នាក់ពីរនាក់ទៅយាមក្រុមហ៊ុន អត់រាយការណ៍ខ្ញុំផង។ គេយាមហ្នឹងមានន័យថា ខ្លាចមានក្រុមអ្នកផ្សេងៗប្លែកៗចូល គេរឹតបន្តឹងហើយមានអ្នកសារព័ត៌មានចូលមកគេវាយ»។
នាយខណ្ឌរដ្ឋបាលព្រៃឈើខេត្តស្ទឹងត្រែង លោក អ៊ីឯក សាវត្តី មានប្រសាសន៍បញ្ជាក់ថា សមត្ថកិច្ចព្រៃឈើមិនបានអនុញ្ញាតឲ្យក្រុមហ៊ុនបោះសម្អាតអាងនាំឈើចេញនៅឡើយ។ លោកបដិសេធថា សេចក្តីរាយការណ៍ខាងលើជាការមិនពិត៖ «អត់មានទេនៅពេលគេប្រមូល ហើយបានទៅវាស់វែងបង់ពន្ធ»។
យ៉ាងនេះក្តី អ្នកឃ្លាំមើលបញ្ហាព្រៃឈើសមាគមអាដហុក (Adhoc) ខេត្តស្ទឹងត្រែង លោក ហូ សំអុល ឲ្យដឹងថា អ្នកភូមិបានផ្តល់ព័ត៌មានជាច្រើនស្ដីពីការកាប់ឈើខុសច្បាប់ ដោយក្រុមហ៊ុនបោសសម្អាតអាង។ លោកអំពាវនាវឲ្យអាជ្ញាធរថ្នាក់ជាតិស៊ើបអង្កេតករណីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។