ស្របពេលគ្នានេះដែរ ប្រជាពលរដ្ឋសហគមន៍នៅតំបន់នោះ អះអាងថា សកម្មភាពលួចកាប់ឈើពីព្រៃក្រៅតំបន់បោសសម្អាតអាង ក៏កំពុងកើតមានអនាធិបតេយ្យដែរ។
មន្ត្រីក្រុមប្រឹក្សាឃុំចំនួនពីរ នៅស្រុកសេសាន នៅថ្ងៃពុធ ទី៥ ខែមិថុនា អំពាវនាវឲ្យមន្ត្រីជំនាញពាក់ព័ន្ធផែនការសម្អាតអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោម២ នៅខេត្តស្ទឹងត្រែង បោះបង្គោលកំណត់ផ្ទៃអាងឲ្យបានរួសរាន់ និងចាត់វិធានការទប់ស្កាត់សកម្មភាពកាប់ឈើមូលពីព្រៃក្រៅតំបន់បោសសម្អាតអាងដោយបំពានច្បាប់។
សេចក្តីអំពាវនាវនេះ ធ្វើឡើងបន្ទាប់ពីប្រជាពលរដ្ឋសហគមន៍នៅឃុំស្រែគរ និងឃុំតាឡាត រាយការណ៍ថា ឈើមូលរាប់ម៉ឺនដើម ត្រូវគេកាប់ពីព្រៃក្រៅបរិវេណអាងតាំងពីខែមេសា រហូតបច្ចុប្បន្ន។ ឈើមូលរាប់ម៉ឺនដើមនេះ ត្រូវគេដឹកជញ្ជូនពីព្រៃមកស្តុកទុកនៅដេប៉ូស្តុកឈើរបស់ក្រុមហ៊ុនកាប់ប្រមូលឈើ ដោយគ្មានការត្រួតពិនិត្យ។
មេឃុំស្រែគរ លោក សៀក មេគង្គ មានប្រសាសន៍បញ្ជាក់ថា រហូតមកទល់នឹងបច្ចុប្បន្ននេះ ក្រុមអាជ្ញាធរជំនាញមិនទាន់បានបោះបង្គោលកំណត់បរិវេណអាងស្តុកទឹកនៅឡើយ ហេតុនេះ ឈើមូលត្រូវគេសម្រុកកាប់ពីព្រៃភ្នំក្រឡាពស់ ដែលស្ថិតនៅក្រៅតំបន់ផ្ទៃអាង ហើយដឹកជញ្ជូនមកស្តុកទុកនៅដេប៉ូប្រមូលឈើរបស់ក្រុមហ៊ុនកាប់ឈើសម្អាតអាងនោះ៖ «កង្វល់ក្នុងឃុំ គឺមេឃុំត្រូវលើកឡើងព្រៃឈើ គឺខ្លាំងណាស់ ឲ្យដឹងថា គឺសម្អាតត្រឹមនេះបាញ់ថ្នាំទៅ គឺវាសល់ខ្លះ មានព្រំដែនរបៀបនេះជាក់លាក់ពិតប្រាកដ។ ៣ម៉ឺន ៦ពាន់ហិកតារ យើងសម្អាតត្រឹមហ្នឹងចូលមកទន្លេមក»។
ចំណែកមេឃុំតាឡាត លោក សឿន ខង មានប្រសាសន៍បញ្ជាក់ដែរថា លោកក៏ស្នើសុំឲ្យមានការបោះបង្គោលកំណត់ផ្ទៃបោសសម្អាតអាងដូចគ្នា ដើម្បីប្រជាពលរដ្ឋជាសហគមន៍ងាយស្រួលចូលរួមឃ្លាំមើល កុំឲ្យមានសកម្មភាពកាប់ឈើក្រៅផ្ទៃអាងបន្ថែមទៀត៖ «ខាងលើសួរខ្ញុំៗក៏មិនស្គាល់ដែរ ប៉ុន្តែគាត់កាប់តាមមាត់អូរតាមទំនាបមិនដឹងត្រូវប្រឡោះគាត់ ឬមិនត្រូវ។ ចំអាង ឬក្រៅអាង»។
ក្រសួងកសិកម្ម កាលពីខែមីនា ឆ្នាំ២០១៣ បានអនុញ្ញាតឲ្យក្រុមហ៊ុន អាំង អែន អាសូស៊ីអេត ឡយ័រ (ANG & Associates Lawyer) កាប់ឈើសម្អាតអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោម២។
មេការទទួលខុសត្រូវកាប់ឈើសម្អាតអាង លោក សាន ចយ បដិសេធថា ក្រុមហ៊ុនមិនជាប់ពាក់ព័ន្ធកាប់ឈើក្រៅផ្ទៃអាងនោះទេ។ លោកបន្តថា ឈើដែលប្រមូលបានក្នុងអាង ត្រូវរក្សាទុកនៅដេប៉ូស្តុកឈើក្រុមហ៊ុន ទុកឲ្យគណៈកម្មការជំនាញត្រួតពិនិត្យកំណត់វាយតម្លៃ ដើម្បីវាស់វែងបង់ពន្ធមុននឹងអនុញ្ញាតឲ្យនាំចេញ៖ «រដ្ឋបាលព្រៃឈើពីលើមក គេកំណត់មានផែនទីរួចហើយ ប៉ុន្តែគេកំណត់ព្រំឲ្យយើងធ្វើ។ ក្រុមហ៊ុនខ្ញុំប្រមូលតែក្នុងអាងនេះ មិនទាន់ដល់ ១០% ផង»។
នាយខណ្ឌរដ្ឋបាលព្រៃឈើ ខេត្តស្ទឹងត្រែង លោក អ៊ី ឯកសាវត្តី មានប្រសាសន៍ថា មន្ត្រីជំនាញនៃក្រសួងឧស្សាហកម្ម មានតួនាទីបោះបង្គោលកំណត់ផ្ទៃអាង។ ចំណែកមន្ត្រីជំនាញព្រៃឈើ មានតួនាទីត្រួតពិនិត្យការប្រមូលផលព្រៃឈើក្នុងផ្ទៃអាង ដើម្បីកំណត់ឲ្យក្រុមហ៊ុនកាប់ និងបង់ពន្ធចូលថវិកាជាតិ។
ចំណែកនាយខុទ្ទកាល័យសាលាខេត្តស្ទឹងត្រែង លោក ដូង ពៅ មានប្រសាសន៍ទទួលស្គាល់ថា សកម្មភាពកាប់ឈើក្រៅបរិវេណសម្អាតអាងពិតជាកើតមាន។ លោកមិនប្រាកដថា តើក្រុមជំនាញបានបោះបង្គោលកំណត់បរិវេណអាង ឬយ៉ាងណាទេ? ប៉ុន្តែ លោកថា អាជ្ញាធរខេត្តបានចាត់វិធានការបង្ក្រាបករណីកាប់ឈើក្រៅផ្ទៃអាងជាបន្តបន្ទាប់ហើយ៖ «ពិតជាមានការលួចពីណាពីណីមកដាក់ចូល យកលេសថាជាឈើសម្អាតពីបាតអាង។ យើងបានឲ្យរដ្ឋបាលព្រៃឈើលើសមត្ថកិច្ចគេៗចាប់បង្ក្រាបបានជនខិលខូច ដែលបានយកភូមិសាស្ត្រក្បែរៗហ្នឹង ទៅធ្វើជាលេសប្រព្រឹត្តបទល្មើសព្រៃឈើ»។
យ៉ាងនេះក្តី មេការក្រុមហ៊ុន អាំង អែន អាសូស៊ីអេត ឡយ័រ លោក សាន ចយ ឲ្យដឹងថា មន្ត្រីព្រៃឈើបានវាយតម្លៃបរិមាណផលព្រៃឈើ ដែលត្រូវប្រមូលក្នុងផ្ទៃអាងមានចំនួន ៦៥ម៉ឺនម៉ែត្រគូប៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។