ប្រជាពលរដ្ឋមួយចំនួននៅឃុំដា ស្រុកកំពង់លែង ខេត្តកំពង់ឆ្នាំង បានសម្ដែងក្ដីបារម្ភខ្លាចបាត់បង់ធនធានរ៉ែ ព្រៃឈើ និងទីគោរពសក្ការបូជារបស់អ្នកភូមិនៅទូទាំងឃុំ។ ពួកគាត់បញ្ជាក់ថា កម្មករជនជាតិវៀតណាម និងខ្មែរ ២ក្រុម មានគ្នាជាង ២០នាក់ ប្រដាប់ដោយឧបករណ៍ស្ទង់ដីដែកត្បែង និងចបជាដើម កំពុងធ្វើសកម្មភាពជីក និងស្ទង់រករ៉ែនៅលើភ្នំដា ត្រង់ចំណុចភ្នំទូក មាសតាំងពីព្រឹកថ្ងៃទី១៥ និងបន្តរហូតដល់ថ្ងៃទី១៧ ខែមករា ឆ្នាំ២០១៤ ទៀត។
ប្រជាពលរដ្ឋជាច្រើនគ្រួសារនៅឃុំដា រួមទាំងសកម្មជនគណបក្សប្រឆាំងនៅតំបន់នោះផង បានសម្ដែងក្ដីបារម្ភខ្លាចបាត់បង់សម្បត្តិធម្មជាតិ ក៏ប៉ុន្តែមិនហ៊ានបញ្ចេញមតិ ឬជំទាស់ទៅនឹងការរុក្ខរករ៉ែរបស់ក្រុមហ៊ុនមួយឈ្មោះ សុវណ្ណគិរី ឡើយ ពីព្រោះខ្លាចមានការគាបសង្កត់ពីសំណាក់អាជ្ញាធរ និងអ្នកមានអំណាច។
ប្រជាពលរដ្ឋម្នាក់ដែលថ្លែងក្នុងលក្ខខណ្ឌសុំមិនបញ្ចេញឈ្មោះឲ្យដឹងនៅថ្ងៃទី១៦ ខែមករា ថា ប្រជាពលរដ្ឋបានជួបជុំគ្នា និងនិយាយតៗគ្នាពីបញ្ហាធនធានរ៉ែ ព្រៃឈើ និងទីសក្ការបូជារបស់ពួកគាត់មិនដាច់ពីមាត់ ក្រោយពីបានឃើញសកម្មភាពរុករករ៉ែនេះ។
លោកបន្តថា ប្រជាពលរដ្ឋទាំង ៥ភូមិ នៃឃុំដា តែងតែទៅរកអនុផលព្រៃឈើ ដូចជា ជ័រ វល្លិ និងអុសដុតជាដើមនៅលើភ្នំនោះ៖ «ប្រជាពលរដ្ឋនៅទូទាំងភូមិឃុំនេះ មួយចំនួនធំដែលគេនិយាយជាមួយខ្ញុំ តែគេមិនហ៊ានចេញមុខ តែខ្ញុំហ៊ានចេញមុខតែបីនាក់ ឬ ៤នាក់ទេ។ ខ្ញុំចេញមុខខ្ញុំឡើងទៅដល់បណ្ដោយ ដល់ពេលទៅដល់ឃើញមានកញ្ច្រែងរែងមាស ឃើញដែកត្បែងជីកគាស់យករ៉ែហ្នឹង»។
ឆ្លើយតបនឹងបញ្ហានេះ មេឃុំដា លោក ជឹម ចុន មានប្រសាសន៍បញ្ជាក់ថា អាជ្ញាធរភូមិ-ឃុំ បានប្រជុំផ្សព្វផ្សាយដល់ប្រជាពលរដ្ឋនៅទូទាំងឃុំរួចហើយ មុននឹងមានអ្នកជំនាញ និងកម្មករចុះមកស្រាវជ្រាវរកប្រភពរ៉ែនៅលើភ្នំដានេះ ហើយពុំមានប្រជាពលរដ្ឋណាម្នាក់ប្រតិកម្មនឹងគម្រោងនេះឡើយ៖ «គេមកតែបីមួនប្រាំនាក់។ មានបាត់អី គឺគ្រាន់តែរុករក។ តាមរយៈមេឃុំ មេភូមិផ្សព្វផ្សាយបន្ត»។
ទាក់ទងនឹងបញ្ហានេះ ប្រធានមន្ទីរឧស្សាហកម្ម រ៉ែ និងថាមពល ខេត្តកំពង់ឆ្នាំង លោក អ៊ុក រស់ ថ្លែងថា ក្រុមហ៊ុនរុករករ៉ែរបស់ខ្មែរមួយឈ្មោះ សុវណ្ណគិរី បានទទួលអាជ្ញាប័ណ្ណពីរាជរដ្ឋាភិបាលកាលពីចុងឆ្នាំ២០១៣ ដើម្បីរុករករ៉ែគ្រប់ប្រភេទ នៅតំបន់ភ្នំទូកមាស ឬទឹកជ្រោះអូរដា សាលាទូកមាស។
លោកបញ្ជាក់ថា ដំណាក់កាលនេះ គឺគ្រាន់តែជាការសិក្សាស្រាវជ្រាវប៉ុណ្ណោះ ហើយនឹងពុំមានផលប៉ះពាល់អ្វីដល់ប្រជាពលរដ្ឋឡើយ បើទោះបីជាគម្រោងនេះត្រូវបានអនុវត្ត៖ «កន្លែងសក្ការៈកន្លែងទីគោរពបូជា វត្តអារាម ផ្ទះសម្បែង និងដំណាំកម្មសិទ្ធិអីផ្សេងៗ គឺហាមប៉ះពាល់ដាច់ខាត។ ការស្វែងរុករកនេះដោយមានអាជ្ញាប័ណ្ណពីរាជរដ្ឋាភិបាលដើម្បីស្វែងរុករកៗ ឃើញហើយត្រូវរាយការណ៍ជូនរាជរដ្ឋាភិបាលវិញ មិនមែនរុករកហើយ ក្រុមហ៊ុនហ្នឹងយកហើយ ធ្វើអីស្រេចចិត្តទេ»។
ក្រុមប្រជាពលរដ្ឋរស់នៅតំបន់នោះបានឲ្យដឹងបន្ថែមថា ទីតាំងដែលកម្មករខ្មែរនិងវៀតណាម កំពុងតែរុករករ៉ែនោះ គឺស្ថិតនៅក្នុងបរិវេណនៃទឹកជ្រោះអូរដា ដែលជាតំបន់ទេសចរពេញនិយមមួយសម្រាប់ប្រជាពលរដ្ឋនៅក្នុងស្រុក។ តំបន់នេះត្រូវបានគេដឹងតៗគ្នាថា ជាតំបន់សម្បូរទៅដោយព្រៃឈើ រ៉ែមាស និងត្បូងជាច្រើនប្រភេទ។ ពួកគាត់បន្តថា ប្រសិនបើគម្រោងរបស់ក្រុមហ៊ុនមួយនេះត្រូវបានអនុវត្តពិតមែននោះ ទីសក្ការបូជារបស់ពួកគាត់អាចនឹងត្រូវបានផ្លាស់ប្ដូរទីតាំង ឬមានការហាមឃាត់លែងឲ្យអ្នកភូមិទៅរកអុស ឬបោចវល្លិបន្តទៀតនៅលើភ្នំនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ៕