អាកាសធាតុក្ដៅខ្លាំង និងគ្មានភ្លៀងធ្លាក់កក់ខែនៅឆ្នាំនេះ កំពុងបង្កការលំបាកកាន់តែខ្លាំងដល់ការរស់នៅរបស់មនុស្ស និងសត្វ។ ប្រភពទឹកបឹង អូរ ព្រែក និងអណ្ដូងលូ ដែលពលរដ្ឋរស់នៅតាមជនបទធ្លាប់ប្រើប្រាស់ប្រចាំថ្ងៃ ត្រូវរីងស្ងួតដោយសារបញ្ហាអាកាសធាតុនេះ។ នៅស្រុកបរិបូរណ៍ ខេត្តកំពង់ឆ្នាំង មានពលរដ្ឋជាច្រើនកំពុងខ្វះខាតទឹកប្រើប្រាស់ និងសម្រាប់គោក្របីផឹក។
ពលរដ្ឋស្ទើរគ្រប់ឃុំ នៃស្រុកបរិបូរណ៍ ខ្វះទឹកប្រើប្រាស់តាំងពីអំឡុងខែមីនា ឆ្នាំ២០១៦ បន្ទាប់ពីទឹកស្ទឹងបរិបូរណ៍រីងរាក់ និងទឹកអណ្ដូងស្នប់ ឬដាក់លូលែងចេញទឹក។ បច្ចុប្បន្នអ្នកភូមិកំពុងខ្វះទឹកប្រើប្រាស់ខ្លាំង ហើយបង្ខំចិត្តទិញទឹកមិនសូវមានអនាម័យដែលគេដឹកលក់តាមឡាន ឬគោយន្តដែលបូមចេញពីបឹង ឬត្រពាំងតាមតំបន់ទំនាបនៃស្រុកនេះ ដើម្បីយកមកប្រើប្រាស់ដោយសន្សំសំចៃ។
ពលរដ្ឋម្នាក់រស់នៅភូមិក្បាលថ្នល់ នៃឃុំផ្សារ គឺលោកស្រី ប៊ិន ហឹម មានប្រសាសន៍ថា អណ្ដូងយោងជម្រៅ ១២លូ ដែលគាត់ធ្វើតាំងពីឆ្នាំ១៩៩២ ហើយធ្លាប់ប្រើប្រាស់ពេញមួយឆ្នាំៗនោះ ទើបរីងឃើញបាតដីនៅរដូវប្រាំងឆ្នាំនេះ។ សព្វថ្ងៃលោកស្រីទិញទឹកដែលគេដឹកលក់តាមឡាន និងសម្រេងទឹកពីក្នុងអណ្ដូងខ្លះដើម្បីប្រើផ្សំគ្នា ប៉ុន្តែមិនដែលបោកខោអាវ ឬងូតទឹកខ្ជះខ្ជាយនោះឡើយ៖ «...ទើបមកពីដងទឹកនៅអណ្ដូងផ្ទះប្អូន ព្រោះអណ្ដូងខ្លួនឯងរីង។ ខំសន្សំសំចៃអត់ហ៊ានប្រើច្រើន គ្រាប់តែសម្រាប់ងូត និងដាំបាយ»។
លោកស្រីបញ្ជាក់ថា ទឹកសម្រាប់ងូត បោកខោអាវ គោផឹក និងដាំស្លជាដើម កំពុងខ្វះខាតខ្លាំង ប៉ុន្តែចំពោះទឹកផឹកវិញមិនសូវលំបាកចំពោះពលរដ្ឋទេ ព្រោះនៅតាមផ្ទះភាគច្រើនមានធុងចម្រោះ។ ត្បិតនៅក្នុងមូលដ្ឋានគាត់មិនទាន់មានបណ្ដាញទឹកស្អាតប្រើប្រាស់ ប៉ុន្តែគ្រួសារគាត់បានយកទឹកដែលទិញតាមឡាន ឬទឹកដែលសម្រេងចេញពីអណ្ដូងនោះមកចាក់ចូលធុងសម្រោះ ឬដាំឲ្យពុះទើបផឹក។
ចំណែកពលរដ្ឋទៀតម្នាក់រស់នៅភូមិស្រះកែវ ឃុំមេលំ លោក ប៊ន សុភាព ឲ្យដឹងថា លោក និងអ្នកភូមិជាច្រើនគ្រួសារទៀត ប្រើទឹកទិញពីតាមឡាន ឬគោយន្តអស់រយៈពេលជាង ១ខែហើយ។ ទឹកដែលមានចំណុះប្រហែល ១២០លីត្រ តម្លៃ ១ម៉ឺនរៀល ហើយក្នុងមួយខែៗលោកចំណាយលុយទិញទឹកជាង ១០ម៉ឺនរៀល។ ខែខ្លះលោកទៅដងទឹកពីរណ្ដៅគ្រឿងចក្រកាយនៅក្បែរភូមិមកប្រើដែរ៖ «ខ្វះខាតទឹកច្រើន សម្រាប់ប្រើប្រាស់ដូចជា ងូតអីហ្នឹង! ជួនកាលយើងអាចទៅដងទឹកស្រះ (មកប្រើបន្ថែម) តែទឹកស្រះមិនសូវល្អ។ យើងប្រើប្រាស់សន្សំសំចៃដូចងូតមិនបានបរិបូរណ៍ ងូតចាក់តែពីរ ឬបីផ្តិលទៅ»។
ទាក់ទងបញ្ហានេះអភិបាលស្រុកបរិបូរណ៍លោក ឃួន សៅរុំ ថ្លែងថា ឃុំចំនួន ១១ នៃស្រុកបរិបូរណ៍ ស្ទើរខ្វះខាតទឹកប្រើប្រាស់ទឹកទាំងអស់ ប៉ុន្តែពុំមានស្ថានភាពធ្ងន់ធ្ងរនោះទេ ព្រោះអណ្ដូងនៅតាមផ្ទះមួយចំនួននៅអាចប្រើកើត។ លោកថា បច្ចុប្បន្ននៅស្រុកបរិបូរណ៍ មិនទាន់មានបណ្ដាញទឹកស្អាតប្រើនោះទេ ប៉ុន្តែប្រជាពលរដ្ឋគ្រប់ផ្ទះមានធុងចម្រោះទឹកស្អាតពីអង្គការក្រៅរដ្ឋាភិបាលនានា៖ «ក្នុងរដូវប្រាំងនេះបងប្អូនយើងមានការខ្វះខាត ប៉ុន្តែយើងបានជួយរំលែកទុក្ខ ឬចលនាឲ្យក្រុមការងារយើងដឹកទឹកពីកន្លែងដែលមានទៅជួយគាត់សម្រាប់ប្រើប្រាស់។ គាត់មានអណ្ដូងគ្រប់ៗ ផ្ទះហើយ តែអណ្ដូងហ្នឹងវារីងហ្មង ហើយមានចំនួនតូចអាចប្រើប្រាស់បាន។ នៅក្នុងភូមិគាត់នីមួយៗ មានអ្នកបង្កើតមុខរបរលក់ទឹក ប៉ុន្តែមិនថ្លៃធូរថ្លៃល្មមអាចយកបានទាំងអស់គ្នា»។
ពលរដ្ឋរស់នៅតំបន់ខ្ពង់រាប នៃស្រុកទឹកផុស ស្រុកសាមគ្គីមានជ័យ និងស្រុកបរិបូរណ៍ ក្នុងខេត្តកំពង់ឆ្នាំង កំពុងខ្វះទឹកប្រើប្រាស់ដែរ ហើយសត្វក្របីខ្លះបានឈឺងាប់ បន្ទាប់ពីលែងចូលព្រៃអត់ទឹកផឹក។
លោកនាយករដ្ឋមន្ត្រី ហ៊ុន សែន ដែលជាប្រធានគណៈកម្មការជាតិគ្រប់គ្រងគ្រោះមហន្តរាយ កាលពីថ្ងៃទី២៦ ខែមេសា ប្រកាសបើកយុទ្ធនាការសង្គ្រោះប្រជាពលរដ្ឋដែលខ្វះខាតទឹកប្រើប្រាស់ ដោយប្រើទាំងកងកម្លាំងប្រដាប់អាវុធបើកឡានទឹក និងឡានពន្លត់អគ្គីភ័យគ្រប់ប្រភេទ ដើម្បីយកទឹកទៅចែកជូនពលរដ្ឋ។ លោកក៏អំពាវនាវដល់សប្បុរសជន ឬស្ថាប័នឯកជនជួយលើការងារសង្គ្រោះនេះ។
លោក ហ៊ុន សែន បន្ថែមថា ក្រសួងសេដ្ឋកិច្ច និងហិរញ្ញវត្ថុ ត្រូវទម្លាក់កញ្ចប់ថវិកាបន្ថែមដល់គណៈកម្មការគ្រប់គ្រងគ្រោះមហន្តរាយ នៅក្នុងស្ថានភាពពលរដ្ឋខ្វះទឹកប្រើប្រាស់កាន់តែធ្ងន់ធ្ងរឡើង។ លោកថា តាមការព្យាករ ទាល់តែដល់ខែមិថុនា ឆ្នាំ២០១៦ ទើបមានភ្លៀងធ្លាក់ ដូច្នេះនេះពេលវេលាមួយដែលស្ថាប័នពាក់ព័ន្ធ ជាពិសេសក្រុមការងារគណបក្សប្រជាជនត្រូវជួយពលរដ្ឋ៖ «សូមយកចិត្តទុកដាក់ ជាពិសេសទៅលើស្ត្រីមេម៉ាយ ចាស់ជរា និងជនពិការ ដែលគាត់អត់មានលទ្ធភាពមកទទួលទឹកពីយើង ត្រូវនាំទឹកនេះទៅផ្ទះរបស់គាត់ បើគាត់ខ្វះពាងយើងជួយទិញពាងឲ្យគាត់ដើម្បីស្ដុកទឹក»។
បញ្ហាគ្រោះរាំងស្ងួត ឬការប្រែប្រួលអាកាសធាតុខ្លាំងពីមួយឆ្នាំទៅមួយឆ្នាំនេះ ត្រូវគេមើលឃើញថា បណ្ដាលមកពីអស់ព្រៃឈើ កំណើនចំនួនមនុស្ស និងការសាយភាយជាតិពុលពីយានយន្តទៅលើអាកាស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។