ប្រជាពលរដ្ឋជាង ៦០គ្រួសារ រស់នៅភូមិសូវង្ស នៃឃុំតាជេស ដែលធ្លាប់ប្រើប្រាស់ទឹកខួបប្រាំងខួបវស្សានៅក្នុងបឹងមួយឈ្មោះ បឹងខ្នារ ដែលមានទំហំប្រហែល ៣ហិកតារ បានបញ្ជាក់នៅថ្ងៃទី១១ សីហា ថា ពួកគាត់កំពុងតែប្រឈមនឹងបញ្ហាសុខភាពទាំងមនុស្ស និងសត្វ ដោយសារតែប្រើប្រាស់ទឹកកខ្វក់។
តំណាងប្រជាពលរដ្ឋម្នាក់ឈ្មោះ ស៊ិន ឃីម មានប្រសាសន៍ថា ប្រជាពលរដ្ឋស្ទើរទូទាំងភូមិ បានត្អូញត្អែរអំពីបញ្ហាទឹកស្អុយ ហើយពួកគាត់ព្រមានថានឹងនាំគ្នាផ្ដិតមេដៃប្ដឹងម្ចាស់ក្រុមហ៊ុន ទៅក្រសួងបរិស្ថាន ប្រសិនបើក្រុមហ៊ុនមិនព្រមបញ្ឈប់ ឬបញ្ចៀសលូទឹកស្អុយចេញពីបឹង៖ «ហើយគាត់ធ្លាប់ជីកអណ្ដូងដៃតាមហ្នឹង គាត់លែងហ៊ានហូបហើយ ឥឡូវបាទមានគេត្អូញត្អែរចង់នាំគ្នាមកវាយលូហ្នឹងបំបិទចោល»។
ប្រជាពលរដ្ឋម្នាក់ទៀតរស់នៅភូមិសូវង្ស លោក យ៉ង វុទ្ធី បញ្ជាក់ថា ប្រជាពលរដ្ឋមានផលប៉ះពាល់ខ្លាំងផ្នែកសុខភាពទាំងមនុស្ស សត្វ និងបរិស្ថាន៖ «ប៉ះពាល់វាហូរពីនេះទៅតាមមុខផ្ទះខ្ញុំហ្នឹងណា ប៉ះពាល់ផ្ទាល់វាទៅលើបឹងខ្នារ អាផ្លូវខ្ញុំចេញចូលវាក្លិនអាក្រក់»។
លោកបញ្ជាក់ថា ក្រុមអ្នកភូមិដែលធ្លាប់ប្រើប្រាស់ទឹកបឹងនោះ លែងហ៊ានទៅច្រូតស្មៅឲ្យគោក្របី ឬរកត្រីបានដូចមុនទៀតហើយ ពីព្រោះតែទឹកស្អុយ ហើយត្រីនៅក្នុងបឹងក៏លែងសូវសម្បូរដូចមុនទៀតដែរ។
ប្រធានរដ្ឋបាលរោងចក្រ ប៊្លូម ហ្វៀល លោក ជុំ សុង បានបញ្ជាក់យ៉ាងខ្លីថា រោងចក្រមិនបានបង្ហូរទឹកស្អុយចូលទៅក្នុងបឹងប្រើប្រាស់របស់អ្នកភូមិនោះទេ ហើយក៏បានចុចផ្ដាច់ទូរស័ព្ទតែម្ដង៖ «អត់មានទេ អត់មានរឿងហ្នឹង អត់មានបាតុភាពអីកើតឡើងផង។ ខ្ញុំក៏មិនដឹងថាប្អូនឯងលើកពីណាមកដែរ»។
ទោះជាយ៉ាងណា ប្រធានមន្ទីរបរិស្ថាន ខេត្តកំពង់ឆ្នាំង លោក ពៅ ប៊ុនថន មានប្រសាសន៍ថា ក្រោយពីទទួលបានព័ត៌មាននេះ លោកនឹងចាត់ឲ្យមន្ត្រីជំនាញចុះទៅពិនិត្យមើលផ្ទាល់ និងដោះស្រាយក្នុងពេលឆាប់ៗ៖ «អាហ្នឹងត្រូវដាក់កំណត់ច្បាប់ ឬបង្វែរទិសដៅយ៉ាងម៉េចអីយ៉ាងម៉េចទេឲ្យតែដឹងអីចឹងបាទ អគុណច្រើនណាស់បានផ្ដល់ដំណឹង»។
លោក ស៊ិន ឃីម បញ្ជាក់ថា ក្រុមកម្មករសំណង់ និងផ្នែកកាត់ដេរនៃរោងចក្រ ប៊្លូម ហ្វៀល មួយចំនួន បានសម្ដែងការមិនពេញចិត្ដចំពោះរដ្ឋបាលរោងចក្រ ដែលបានបញ្ឈប់កម្មករខ្លះ ដោយគ្មានមូលហេតុ និងមានកម្មករខ្លះទៀតត្រូវចំណាយលុយចាប់ពី ៥ ទៅ ១០ម៉ឺនរៀល ដើម្បីបានចូលធ្វើការនៅក្នុងរោងចក្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។