អាជ្ញាធរខេត្ត និងមន្ត្រីជំនាញខេត្តកំពង់ធំ កំពុងចាត់វិធានការទប់ស្កាត់បញ្ហាត្រីងាប់នៅតំបន់អភិរក្សបឹងទន្លេឆ្មា។ ការលើកឡើងនេះ ក្រោយពេលត្រីនៅក្នុងតំបន់អភិរក្សបឹងទន្លេឆ្មា ចេះតែបន្តងាប់រហូត ចាប់តាំងពីថ្ងៃទី២២ ខែមេសា មក។ អាជ្ញាធរថា វិធានការទាំងនោះ រួមមានស្វែងរកប្រភពទឹកដើម្បីបូមបញ្ចូលបឹងជាបណ្តើរៗ យករុក្ខជាតិរស់នៅលើទឹក ដូចជាកំប្លោក ទៅដាក់ពង្រាយលើផ្ទៃទឹកបឹង ដើម្បីឱ្យត្រីបានជ្រកការពារកម្ដៅថ្ងៃជាដើម។
ត្រីប្រមាណជាង ៦០តោន នៅបឹងអភិរក្សទន្លេឆ្មា ស្ថិតនៅក្នុងឃុំពាមបាង ស្រុកស្ទោង ខេត្តកំពង់ធំ បានងាប់ជាបន្តបន្ទាប់នៅប៉ុន្មានថ្ងៃមកនេះ។ អាជ្ញាធរ និងមន្ត្រីជំនាញខេត្តកំពង់ធំ សន្និដ្ឋានជាជំហានដំបូងថា ត្រីងាប់ទាំងនោះដោយសារតែអាកាសធាតុក្ដៅខ្លាំង ស្របពេលកម្រិតទឹកបឹងកាន់តែរាក់រហូតដល់កម្រិតដែលត្រូវប្រកាសអាសន្នថែមទៀតផង ពោលគឺទឹកបឹងមានកម្ពស់ពី ២ ទៅ ៣តឹកពីផ្ទៃដីប៉ុណ្ណោះ។
នាយខណ្ឌរដ្ឋបាលជលផលខេត្តកំពង់ធំ លោក ប៉ែន វណ្ណរិទ្ធ មានប្រសាសន៍នៅថ្ងៃទី២៨ ខែមេសា ថា ត្រីនៅក្នុងបឹងអភិរក្សទន្លេឆ្មា គឺចាប់ផ្ដើមងាប់តាំងពីថ្ងៃទី២២ ខែមេសា ប៉ុន្តែរហូតមកទល់ថ្ងៃទី២៨ ខែមេសា ស្ថានភាពត្រីដែលងាប់នោះ គឺថយចុះទៅវិញហើយ។ លោកបន្តថា ពពួកត្រីងាប់ គឺត្រីស្រកាស ដូចជាត្រីរៀល ត្រីឆ្ពិន ត្រីច្រកែង និងពពួកត្រីអត់ស្រកា ដូចជាត្រីត្អោន ត្រីក្រមម ត្រីកញ្ចុះ និងត្រីសណ្ដាយ ជាដើម។ លោកថា មន្ត្រីជំនាញ និងអាជ្ញាធរ ព្រមទាំងប្រជាសហគមន៍មានវិធានការបន្ទាន់ដើម្បីជួយសង្គ្រោះត្រីដែលមិនទាន់ងាប់ដូច្នេះថា៖ «យើងបានយកកំប្លោកទៅដាក់នៅកន្លែងទឹកមានជម្រៅពីរ បីតឹកហ្នឹងណា ដើម្បីអោយទឹកវាកាត់បន្ថយកម្ដៅ ហើយយើងដាក់ម៉ាស៊ីនបូម ដាក់ម៉ាស៊ីនបូមនេះ គឺដើម្បីឱ្យទឹកហ្នឹងមានចលនា»។
បឹងអភិរក្សទន្លេឆ្មា មានទីតាំងនៅឃុំពាមបាង ស្រុកស្ទោង ដែលមានទំហំជិត ១ម៉ឺនហិកតារ (៨.៣២៥)។ ត្រីនៅក្នុងបឹងនេះ បានងាប់យ៉ាងដូច្នេះរយៈពេលបីឆ្នាំជាប់ៗគ្នាមកហើយ គឺតាំងពីឆ្នាំ២០១៣ មក។
នាយខណ្ឌជលផលដដែលឱ្យដឹងទៀតថា ត្រីងាប់ទាំងនោះ ប្រជាពលរដ្ឋអាចយកទៅបរិភោគបាន ពីព្រោះវាមិនបណ្ដាលឱ្យប៉ះពាល់ដល់សុខភាពឡើយ ដោយសារវាងាប់ដោយធម្មជាតិ មិនមែនបង្កឡើងដោយសារធាតុពុលគីមីអ្វីទេ។ លោកបញ្ជាក់ថា មន្ត្រីជំនាញនៅការពារមិនអនុញ្ញាតឱ្យអ្នកភូមិចុះទៅក្នុងបឹង ឬចាប់ត្រីដែលមិនទាន់ងាប់នោះឡើយ ពីព្រោះវាអាចបណ្ដាលឱ្យត្រីកាន់តែពុល និងដើម្បីការពារត្រីមិនទាន់ងាប់ផង។
អភិបាលរងខេត្ត និងជាអ្នកនាំពាក្យសាលាខេត្តកំពង់ធំ លោក គង់ វិមាន មានប្រសាសន៍ថា អាជ្ញាធរខេត្តកំពុងតាមដានស្ថានភាពត្រីនៅតំបន់នោះ។ លោកបន្តថា ដោយសារតែបម្រែបម្រួលអាកាសធាតុ ទើបបណ្ដាលឱ្យមានបញ្ហានេះកើតឡើងជាថ្មីទៀត។ ជាមួយគ្នានេះ អាជ្ញាធរខេត្តបានបញ្ជូនម៉ាស៊ីនបូមទឹកទៅតំបន់នោះទៀតផង៖ «ម៉ាស៊ីនបូមទឹកហ្នឹង គឺធ្វើម៉េចរកប្រភពទឹកដែលនៅក្បែរៗទីនោះ គឺដើម្បីបាញ់ជាជំនួយអុកស៊ីហ្សែននៅក្នុងទឹក នៅតំបន់ណាដែលមានការរាក់ខ្លាំង»។
បន្ថែមពីនេះទៀត អាជ្ញាធរកំពុងរិះរកមធ្យោបាយដើម្បីនាំគ្រឿងចក្រចូលទៅតំបន់បឹងអភិរក្សទន្លេឆ្មា ដើម្បីជីកប្រឡាយ នាំយកប្រភពទឹកសម្រាប់សង្គ្រោះត្រីដែលនៅសេសសល់។ លោកបញ្ជាក់ថា អាជ្ញាធរនឹងបន្តសហការជាមួយមន្ត្រីជំនាញ ព្រមទាំងមន្ត្រីមូលដ្ឋាន ដោយរិះរកគ្រប់មធ្យោបាយធ្វើយ៉ាងណាជួយការពារត្រីតំបន់បឹងមួយនេះ។
ទោះបីជាបែបនេះក្ដី ទាំងអាជ្ញាធរខេត្ត និងមន្ត្រីរដ្ឋបាលជលផល អះអាងថា ក្នុងអំឡុងពេល ២០ថ្ងៃទៅមុនទៀត ប្រសិនស្ថានភាពអាកាសធាតុនៅតែបន្តក្ដៅបែបនេះ តំបន់អភិរក្សបឹងទន្លេឆ្មា នឹងត្រូវរីងស្ងួត ហើយត្រីដែលនៅសេសសល់ត្រូវប្រឈមក្ដីវិនាសមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។