ប្រជាសហគមន៍នៅឃុំត្រពាំងព្រីង ស្រុកតំបែរ ខេត្តត្បូងឃ្មុំ លើកឡើងថា អាជ្ញាធរនៅតែមិនមានសមត្ថភាពដោះស្រាយចំពោះបញ្ហាដីព្រៃសហគមន៍រាប់ពាន់ហិកតារ ដែលឈ្មួញខិលខូចនាំគ្នាកាន់កាប់ដោយមិនមានការទប់ស្កាត់។ ចំណែកអាជ្ញាធរធ្លាប់បញ្ជាក់ថា ករណីនេះប្រជាពលរដ្ឋទៅវិញទេដែលជាអ្នកចូលកាន់កាប់ដីនោះ។
តំណាងសហគមន៍ដីព្រៃត្រពាំងព្រីង ឱ្យដឹងថា អាជ្ញាធរនៅតែមិនអាចដោះស្រាយ និងទប់ស្កាត់ការកាន់កាប់ទន្ទ្រានដីសហគមន៍ប្រមាណជាង ៥.០០០ហិកតារ ពីសំណាក់អ្នកមានប្រាក់ និងអ្នកមានអំណាចបានឡើយ។ ការលើកឡើងដូច្នេះ បន្ទាប់ពីពួកគាត់បានសុំកិច្ចអន្តរាគមន៍ពីសំណាក់អាជ្ញាធរ តាំងពីថ្នាក់ក្រោមរហូតដល់ថ្នាក់ខេត្ត ប៉ុន្តែមិនមានដំណោះស្រាយ។ ចំណែកអ្នកមានប្រាក់ទាំងនោះ នាំគ្នាដាំដំណាំយ៉ាងព្រោងព្រាត។
តំណាងសហគមន៍ត្រពាំងព្រីង នៅឃុំត្រពាំងព្រីង អ្នកស្រី ហម ច្រិប មានប្រសាសន៍ថា អាជ្ញាធរបានតែមកស្រែកបង្ហើរចោល ដោយមិនឃើញពីសកម្មភាពចុះដោះស្រាយ ឬបើកការស៊ើបអង្កេតណាមួយ ចំពោះការបំផ្លាញព្រៃសហគមន៍អស់រាប់ពាន់ហិកតារនោះឡើយ។ លើសពីនេះទៀត នៅពេលអាជ្ញាធរចុះធ្វើវេទិកាសាធារណៈម្តងៗ តែងទម្លាក់កំហុសទាំងនោះមកលើប្រជាពលរដ្ឋ។
អ្នកស្រី ហម ច្រិប៖ «គ្រាន់តែដាក់ពាក្យប្ដឹងមិនដឹងប៉ុន្មានដងហើយ នៅតែគ្មានប្រយោជន៍ នៅតែមិនបានធ្វើអន្តរាគមន៍។ បានត្រឹមតែមកស្រែកៗ ហើយជនល្មើសបានតែម៉ាចំអកទៅវិញថា កុំទៅជឿអីពួកនេះ គេមកច្រៀងម៉ាបទពីរបទ រួចវាទៅវិញ។ គេនិយាយថា ប្រយោជន៍គេនៅតែជាប្រយោជន៍គេ គេនិយាយអ៊ីចឹង។ អាជ្ញាធរវាអសមត្ថភាព និយាយរួមគ្មានអំណាចគ្រប់គ្រងតួនាទីខ្លួនឯងឱ្យពិតប្រាកដផងហ្នឹង។ ខ្លួនឯងចង់បានលាភសក្ការៈមួយជាមួយជនខិលខូចដែរហ្នឹង»។
អ្នកស្រីបន្តថា ប្រសិនបើអាជ្ញាធរនៅតែស្រែកដោយមិនមានការដោះស្រាយនោះ នឹងធ្វើឱ្យពលរដ្ឋទាំងអស់គ្នាលែងមានជំនឿលើអាជ្ញាធរតទៅទៀត។
អភិបាលស្រុកតំបែរ ដែលដឹងរឿងនេះច្បាស់នោះ គឺលោក ឈិង ពិសិដ្ឋ កាលពីពេលកន្លងទៅ ធ្លាប់មានប្រសាសន៍ថា ខាងស្រុកបានបញ្ជូនរបាយការណ៍មួយចំនួនទៅសាលាខេត្តរួចហើយ ដើម្បីស៊ើបអង្កេតបញ្ហានេះបន្ថែម។ ចំណែកអ្នកទន្ទ្រានដីទាំងនោះ គឺភាគច្រើនជាពលរដ្ឋទៅវិញទេ ហើយខាងលោកក៏មិនបានពាក់ព័ន្ធនឹងការទន្ទ្រានដីសហគមន៍នោះដែរ។ បន្ថែមពីនេះទៀត ក្នុងវេទិកាសាធារណៈកាលពីខែកក្កដា និងខែសីហា អភិបាលស្រុកក៏បានប្រកាសប្រាប់ពលរដ្ឋថា នឹងដកដីទាំងនោះមករក្សាទុកជាសម្បត្តិរួមវិញ ប៉ុន្តែតាំងពីពេលនោះមក ប្រជាពលរដ្ឋនៅតែអះអាងថា អ្នកមានអំណាច និងប្រាក់ កំពុងកាន់កាប់ដីទាំងនោះយ៉ាងស្រួលដដែល។
មន្ត្រីសម្របសម្រួលនៃសមាគមការពារសិទ្ធិមនុស្សអាដហុក (ADHOC) ខេត្តកំពង់ចាម លោក នាង សុវ៉ាត មានប្រសាសន៍ថា ករណីនេះអ្វីដែលធ្វើឱ្យអាជ្ញាធរពាក់ព័ន្ធពិបាកក្នុងការដោះស្រាយ គឺដោយសារអាជ្ញាធរទាំងនោះមានចេតនាគេចវេសមិនចង់ដោះស្រាយ និងម្យ៉ាង គឺពួកគាត់អាចពាក់ព័ន្ធនឹងរឿងផលប្រយោជន៍។
លោក នាង សុវ៉ាត៖ «ប្រជាពលរដ្ឋគាត់បានប្ដឹងទៅឃុំ ដល់ស្រុក ដល់មេព្រៃ ដល់ខេត្តទៀត ប៉ុន្តែអត់មានការដោះស្រាយទេ កាលពីកំពុងទន្ទ្រាន។ គឺគាត់មានចេតនាធ្វើឱ្យបាត់ព្រៃហ្នឹងហ្មង! ដោយសារអី? ដោយសារតែផលប្រយោជន៍ដែលគាត់ទទួលបាន។ អ៊ីចឹងហើយបានជាពួកយើងប្ដឹងទៅស្រុក ទៅខេត្ត វាអត់បានធ្វើអីទេ ដោយសារតែពួកគាត់ធ្មេចភ្នែកបូញមាត់បោះដុំដៃ ដើម្បីឱ្យពួកឈ្មួញដីធ្លី ឈ្មួញព្រៃឈើហ្នឹង គេកាប់បំផ្លាញ»។
លោកបន្ថែមថា ប្រជាសហគមន៍ទាំងនោះគ្រោងនឹងយកបញ្ហានេះទៅដាក់នៅគណៈកម្មាធិការថ្មីក្នុងរដ្ឋសភា ធ្វើយ៉ាងម៉េចប្រមូលដីទាំងនោះមកដាក់ជាសម្បត្តិរួមរបស់ពលរដ្ឋវិញ។ លោកបញ្ជាក់ថា រាជរដ្ឋាភិបាលគប្បីស៊ើបអង្កេតបញ្ហានេះឱ្យបានលម្អិត ដើម្បីឱ្យមន្ត្រីជំនាញធ្វើការដោះស្រាយ។ ចំណែកឯតុលាការ ត្រូវកោះហៅអ្នកពាក់ព័ន្ធទាំងអស់ ដើម្បីឱ្យទៅបំភ្លឺនៅចំពោះមុខច្បាប់ ពីព្រោះដីព្រៃសហគមន៍នេះ គឺជាសម្បត្តិសាធារណៈរបស់រដ្ឋ ដោយមិនអាចបុគ្គលណាមួយរំលោភបំពាន ឬលក់ដូរបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។