ជនចំណាកស្រុកចម្រុះមកពីបណ្ដាខេត្តផ្សេងៗ ដែលនាំគ្នារស់នៅក្នុងតំបន់ជាប់ប្រឡាយទឹកស្អុយ ស្ថិតក្នុងខណ្ឌចំនួន២ គឺចម្ការមន និងទួលគោក រាជធានីភ្នំពេញ ត្អូញពីក្លិនស្អុយនៃទឹកលូ និងសំរាមកកក្នុងទឹកប្រឡាយនោះ។
ទោះជាមានបញ្ហានេះកើតឡើងក្តី គេឃើញប្រជាពលរដ្ឋវ័យក្មេងៗ បានរស់នៅអមប្រឡាយនោះ ហើយប្រកបរបរលក់ដូរដូចជាគុយទាវ ពោតស្ងោរ លៀសហាល ជាដើម។ ពួកគេអាចរកចំណូលបានគ្រាន់បើជាងរស់នៅភូមិស្រុក ដែលមិនមានដីធ្វើស្រែចម្ការ និងគ្មានមុខរបរ។
កុមារាមួយក្រុមនាំគ្នាបង្កើតទូកស្នោជិះលេងក្នុងទឹកកខ្វក់ ឯកុមារីយកស្នោធ្វើឆត្របាំងថ្ងៃ អង្គុយលេងមាត់ទឹកកខ្វក់នៅក្រោមស្ពានស្ទឹងមានជ័យ ដែលកំពុងសាងសង់។
កុមារីឈ្មោះ ម៉ាណា អាយុ ៩ឆ្នាំ អង្គុយលេងក្បែរទឹកស្អុយឲ្យដឹងថា ទម្លាប់ហិតក្លិនទឹកស្អុយទៅហើយ។ គាត់មកលេងមាត់ទឹកប្រឡាយកខ្វក់នេះ ស្រមៃថាគាត់មើលទេសភាពឆ្នេរសមុទ្រ ឬមាត់ទន្លេទៅវិញទេ។
កុមារី ស្រីនិច អាយុ ១០ឆ្នាំ ជាសិស្សសាលា បឹងសាឡាង ថ្លែងថា គាត់គ្មានកន្លែងសម្រាប់លេងទេ ទើបគាត់មកលេងមាត់ទឹកកខ្វក់នេះ។ កុមារីថា គ្រួសារគាត់ក្រីក្រ គ្មានសម្ភារៈសម្រាប់ឲ្យគាត់លេង ទើបគាត់រើសឡាំងស្នោ មកហែកធ្វើឆត្របាំងថ្ងៃ អង្គុយមើលទេសភាពនៃទឹកនេះទៅ។ កុមារីដដែលបន្តថា គាត់មិនមានក្លិនស្អុយសំរាមក្នុងទឹក ជះចូលដង្ហើមគាត់ទេ ព្រោះច្រមុះគាត់កើតបូស និងស៊ាំនឹងក្លិនទឹកនោះយូរហើយ។
ចៅសង្កាត់រងសង្កាត់បឹងសាឡាង ខណ្ឌទួលគោក លោក ខៀវ ថៃសារៈមុន្នី មានប្រសាសន៍ថា ប្រឡាយបឹងសាឡាង បានពុះចែកខណ្ឌ២ គឺទួលគោក និងចម្ការមន។ ប្រឡាយនេះបានកសាងដោយអង្គការចៃកា (JICA) អំឡុងឆ្នាំ២០០៣ មានចម្ងាយជាង ៤០០ម៉ែត្រ ចាប់ពីផ្លូវលេខ៣៣៦ ទៅស្ពានស្ទឹងមានជ័យ បន្តទៅបឹងទំពុន ដើម្បីរំដោះជំនន់ពីផ្លូវកម្ពុជាក្រោម ពីសង្កាត់ទឹកល្អក់ ផ្សារដេប៉ូ បង្ហូរទៅបឹងទំពុន។ លោកថា ប្រឡាយបឹងសាឡាងនេះ កាលពី លោក ជា សុផារ៉ា ជាអភិបាលក្រុង គឺមានថវិកាសម្រាប់ស្ដារប្រឡាយ និងកាយយកសំរាមពីក្នុងទឹកប្រឡាយ។ ប៉ុន្តែ ក្រោយពីប្ដូរអភិបាលក្រុងមក ប្រឡាយបឹងសាឡាងនេះគ្មានអ្នកកាយសំរាមពីក្នុងទឹក និងកាយដីកកក្នុងប្រឡាយទេ។ មូលហេតុនេះ ទើបសំរាមរលួយក្នុងទឹក និងដីកកក្នុងប្រឡាយ ទឹកមិនសូវហូរចេញច្រើន ធ្វើឲ្យជះក្លិនអសោចខ្លាំងដល់អ្នករស់នៅអមសងខាងប្រឡាយនោះ។
លោកបន្ថែមថា ក្រោយពីមានការរិះគន់ថា សំរាមស្អុយពេញទឹកប្រឡាយ និងទឹកមិនអាចហូរលឿនទៅប្រឡាយបឹងទំពុន ស្រាប់តែមានកម្មករក្រុមហ៊ុន ស៊ីនទ្រី (Cintri) ជួយកាយយកសំរាមចេញពីទឹក ប៉ុន្តែមិនអាចកាយយកដីដែលកកក្នុងប្រឡាយទេ។ លោកថា កម្មករកាយសំរាមពីក្នុងទឹកប្រឡាយបឹងសាឡាង ក៏មិនទៀតទាត់ដែរ ព្រោះថ្មីៗនេះការសង់ស្ពានស្ទឹងមានជ័យ ធ្វើឲ្យការហូរទឹកទៅបឹងទំពុន យឺតបានកកស្ទះសំរាមពេញទឹកដែរ។
សំណង់រកេតរកូតមិនមានទំហំប៉ុនៗគ្នា បានសង់អមសងខាងប្រឡាយបឹងសាឡាង។
អ្នករស់នៅក្នុងសំណង់នោះ ឲ្យដឹងថា ពួកគេជាជនចំណាកស្រុកចម្រុះ មានខ្មែរ និងវៀតណាម មកជួលបន្ទប់រស់នៅក្នុងតំបន់ជាប់ប្រឡាយទឹកស្អុយបឹងសាឡាងនេះ ដើម្បីរកស៊ីលក់ដូរ។
នៅប៉ែកខាងត្បូងប្រឡាយបឹងសាឡាង គឺសង្កាត់ទំនប់ទឹក ខណ្ឌចម្ការមន មានក្រុមយុវជនកំពុងស្ងោរពោត ស្រុះលៀស ស្ងោរឈាមជ្រូក តម្រៀបឆ្នាំងធំៗប្រមាណ ២០ឆ្នាំង ក្នុងផ្ទះមួយៗ ដែលមានកង់ជាច្រើនបញ្ឈរតម្រៀបចាំដឹកពោតស្ងោរ រៀបដាក់ថង់ប្លាស្ទិកយកទៅលក់។ ចំណែកនៅខាងជើងប្រឡាយបឹងសាឡាង គឺសង្កាត់បឹងសាឡាង ខណ្ឌទួលគោក មានរទេះតជាប់ម៉ូតូជាច្រើន ក្នុងនោះមានផ្លែឈើចម្រុះ ធុងគុយទាវ ធុងពងមាន់អាំង ជាដើម ដាក់តម្រៀបហូរហែមុខបន្ទប់ជួល។
យុវជនឈ្មោះ សឿង ប៉េះ អាយុ ២៤ឆ្នាំ មានស្រុកកំណើតនៅខេត្តស្វាយរៀង ឲ្យដឹងថា គាត់ទីទ័ល ទើបដាច់ចិត្តចូលមករស់នៅតំបន់ទឹកស្អុយបឹងសាឡាងនេះ ដើម្បីស៊ីឈ្នួលលក់គុយទាវពេលយប់។
លោកស្រី គឹម ហេង អាយុ ៤៦ឆ្នាំ មានស្រុកកំណើតនៅរកាកោង ស្រុកមុខកំពូល ខេត្តកណ្ដាល ថ្លែងថា បើនៅស្រុកកំណើត គាត់គ្មានប្រាក់ចំណូលប្រចាំថ្ងៃដូចនៅភ្នំពេញទេ។ ទើបគាត់ទ្រាំជួលផ្ទះក្នុងតំបន់ទឹកកខ្វក់បឹងសាឡាង ដើម្បីរកស៊ីលក់ដូរពេលយប់។
ក្រុមយុវជនខ្លះទៀតដែលមកស៊ីឈ្នួលនៅទីនោះ បានឲ្យដឹងថា សុខភាពគាត់ទន់ខ្សោយ ដោយសារចាញ់ក្លិនទឹកស្អុយពីប្រឡាយបឹងសាឡាងនេះ។
ស្ត្រីឈ្មោះ វ៉េវ មកពីប៉ោយប៉ែត ឲ្យដឹងថា នៅខេត្តបន្ទាយមានជ័យ គាត់រកស៊ីមិនទាន់គេទេ ព្រោះគេចំណាយដើមទុនច្រើន ទើបគាត់នាំក្រុមគ្រួសារមកភ្នំពេញ ដើរស៊ីឈ្នួលធ្វើសំណង់ និងរកស៊ីលក់លៀសយកប្រាក់បង់ថ្លៃបន្ទប់ជួល និងចិញ្ចឹមជីវិត។ លោកស្រីថា កូនគាត់ ៤នាក់ ឧស្សាហ៍ឈឺ ព្រោះមូសខាំ ដែលកើតពីទឹកស្អុយក្នុងប្រឡាយ។ លោកស្រីថា ៣ថ្ងៃនេះ កម្មករក្រុមហ៊ុន ស៊ីនទ្រី ទើបកាយយកសំរាមចេញពីទឹក ប៉ុន្តែមូសនៅតែកើតឡើងច្រើនដដែល។
ពាក់ព័ន្ធការប្រមូលសំរាមពីទឹកប្រឡាយបឹងសាឡាង តំណាងក្រុមហ៊ុន ស៊ីនទ្រី លោក សេង ចំរើន ឲ្យដឹងថា ក្រុមហ៊ុនបានជួលទូកដើម្បីប្រមូលសំរាមពីក្នុងប្រឡាយទឹកនោះ។ លោកថា ក្រុមហ៊ុនមិនអាចប្រមូលសំរាមបានរាល់ថ្ងៃពីក្នុងទឹកទេ លុះត្រាតែប្រជាពលរដ្ឋឈប់បោះសំរាមចូលទឹក នៅក្រោយពេលដែលកម្មករក្រុមហ៊ុនប្រមូលរួច។
លោកបន្ថែមថា ដោយសារតែក្រុមហ៊ុននេះមានភារកិច្ចប្រមូលសំរាម លោកមិនបានដឹងថា ពីមុនប្រឡាយបឹងសាឡាង សាលារាជធានីភ្នំពេញមានថវិកាសម្រាប់ឲ្យសង្កាត់ និងខណ្ឌជួយប្រមូលចេញទេ។ ទោះជាយ៉ាងណា លោកសំណូមពរឲ្យអ្នករស់នៅក្បែរទឹកប្រឡាយ ជួយថែទាំគ្នា កុំបោះសំរាម មានថង់ប្លាស្ទិក និងកាកសំណល់ផ្សេងៗ ទៅក្នុងទឹកទៀត ហើយអាជ្ញាធរមូលដ្ឋានគួរតែជួយអប់រំអ្នករស់នៅក្នុងទីក្រុង និងទីប្រជុំជន គឺជួយគ្នាក្នុងការសម្អាតទីក្រុង ដើម្បីឲ្យសោភ័ណភាពនៃប្រទេសជាតិទទួលបានការសសើរ និងប្រកបដោយផាសុកភាព។
ទោះជាយ៉ាងណា អ្នកដំណើរឆ្លងកាត់ផ្លូវ២៧១ នៅគល់ស្ពានស្ទឹងមានជ័យ គេឃើញសំរាមនៅសល់ពេញប្រឡាយបឹងសាឡាង និងច្រាំងប្រឡាយនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។