ប្រជាពលរដ្ឋនៅឃុំថ្មកែវ ស្រុកសៀមប៉ាង ខេត្តស្ទឹងត្រែង ជាង ៥០០នាក់ បានផ្ដិតមេដៃរួច ហើយគ្រោងដាក់ជូនអាជ្ញាធរខេត្តនៅដើមសប្ដាហ៍ក្រោយនេះដើម្បីសុំឲ្យអាជ្ញាធរបញ្ឈប់សកម្មភាពរុករកមាសនៅក្នុងទន្លេពីសំណាក់ក្រុមហ៊ុនចិនមួយឈ្មោះ ឃុន សៀរ។
ប្រធានសហគមន៍ការពារទន្លេបីប្រចាំឃុំថ្មកែង លោក ផន ភុន នៅថ្ងៃអាទិត្យ ទី១១ ខែសីហា មានប្រសាសន៍បញ្ជាក់ថា សាឡង់រែងមាសចំនួនបីគ្រឿងបានមកដល់តំបន់កោះអូរចង្ហៀង ក្នុងភូមិញ៉ាងស៊ុំ ឃុំថ្មកែវ ក្នុងនោះសាឡង់មួយគ្រឿងបានដំណើរការរែងរកមាសពីបាតទន្លេប្រមាណបីបួនថ្ងៃកន្លងទៅនេះ។
លោកបន្តថា ទឹកទន្លេប្រែជាល្អក់ និងធ្វើឲ្យប៉ះពាល់សុខភាពប្រជាពលរដ្ឋអ្នកប្រើប្រាស់ទឹកទន្លេ៖ «សំណូមពរប្រជាពលរដ្ឋគាត់មិនឲ្យធ្វើគាត់បញ្ឈប់តែម្ដង ពីព្រោះប្រជាពលរដ្ឋតាមស្រុកស្រែគ្មានទឹកសុទ្ធផឹកទេ អ៊ីចឹងគាត់ត្រូវការទឹកទន្លេ។ ដល់ទឹកទន្លេអ៊ីចឹងគាត់ចប់តែម្ដង»។
មន្ត្រីអាជ្ញាធរឃុំថ្មកែវ ឲ្យដឹងដែរថា ក្រុមហ៊ុនចិន ដែលចូលមកធ្វើអាជីវកម្មរុករករ៉ែមាសនៅតំបន់នោះមិនបានបង្ហាញលិខិតស្នាមអនុញ្ញាត ឬផ្ដល់ព័ត៌មានជូនអាជ្ញាធរមូលដ្ឋានបានដឹងពីសកម្មភាពធ្វើអាជីវកម្មនោះទេ ក៏ប៉ុន្តែបន្ទាប់ពីប្រជាពលរដ្ឋច្រួលច្របល់ប្ដឹងករណីនេះមកអាជ្ញាធរឃុំទើបអាជ្ញាធរស្រុកបានបញ្ចេញលិខិតអនុញ្ញាតរបស់ក្រសួងឧស្សាហកម្ម និងរដ្ឋបាលជលផល ឲ្យក្រុមហ៊ុននេះធ្វើអាជីវកម្មបូមខ្សាច់ដើម្បីប្រើប្រាស់សម្រាប់ការសាងសង់តាំងពីឆ្នាំ២០១២។
វិទ្យុអាស៊ីសេរី នៅថ្ងៃទី១១ ខែសីហា មិនអាចស្វែងរកអត្តសញ្ញាណ និងទូរស័ព្ទទាក់ទងក្រុមហ៊ុន ឃុន សៀ បំភ្លឺករណីនេះបានទេ។
ទាក់ទិនករណីនេះមេឃុំថ្មកែវ លោក ស៊ឹម ដាន មានប្រសាសន៍បញ្ជាក់ថា ប្រជាពលរដ្ឋស្ទើរគ្រប់ក្រុមគ្រួសារក្នុងឃុំបានធ្វើការតវ៉ាមិនយល់ព្រមឲ្យក្រុមហ៊ុនមករែងមាសនៅតំបន់នោះទេ ពីព្រោះប្រជាពលរដ្ឋបារម្ភពីផលប៉ះពាល់ច្រើនផ្នែកនឹងកើតមាននៅក្នុងទន្លេ។ លោកបន្តថា នៅថ្ងៃច័ន្ទ ទី១២ សីហា សប្ដាហ៍ក្រោយនេះ លោកនឹងយកញត្តិតវ៉ារបស់អ្នកភូមិដាក់ជូនអាជ្ញាធរស្រុកដើម្បីដោះស្រាយបញ្ហាទាមទាររបស់ពលរដ្ឋ៖ «សួរទៅអភិបាលស្រុកគាត់ថាអត់ដឹងទេ ឃើញតែលិខិតគេដាក់មកបូមខ្សាច់ ប៉ុន្តែអត់ឃើញឆ្លងមេឃុំ ចៅហ្វាយស្រុកស្អីផង។ កិច្ចសន្យាបូមខ្សាច់បន្តនៅចំណុចកោះចង្ហៀង ប៉ុន្តែគេអត់មានបូមខ្សាច់គេរែងមាស។ ប្រជាជនស្រែកដាក់ខ្ញុំ»។
ឆ្លើយតបបញ្ហានេះដែរ អភិបាលរងខេត្តស្ទឹងត្រែង លោក យ៉ូ បាសិទ្ធិ បដិសេធមិនអធិប្បាយពិស្ដារពីការធ្វើអាជីវកម្មរបស់ក្រុមហ៊ុនចិន ថាយ៉ាងណាទេ។ លោកទទួលស្គាល់ថា អាជ្ញាធរខេត្តទើបទទួលបានសេចក្ដីរាយការណ៍នេះដូចគ្នា។
លោកបន្តថា អាជ្ញាធរត្រូវការពេលវេលាដើម្បីសិក្សាពីបញ្ហានេះមុននឹងដោះស្រាយបញ្ហាជាមួយពលរដ្ឋ៖ «ពេលតែ ២ថ្ងៃ គឺម្សិលមិញនិងថ្ងៃហ្នឹង សៅរ៍ និង អាទិត្យហ្នឹង អ៊ីចឹងខ្ញុំគិតថា អត់ទាន់ដល់ថ្នាក់ស្អីត្រូវជ្រួលច្របល់នោះទេ។ យើងក៏បានដឹងដែរ យើងធ្វើអ្វីឈរលើមូលដ្ឋានច្បាប់»។
ចូលរួមក្នុងបញ្ហានេះដែរ មន្ត្រីសម្របសម្រួលអង្គការបណ្ដាញការពារទន្លេបី លោក មៀច មាន អំពាវនាវសុំឲ្យក្រុមសមត្ថកិច្ចពាក់ព័ន្ធផ្អាកសកម្មភាពរុករករ៉ែមាសនោះជាបន្ទាន់ ដើម្បីចៀសវាងបង្កផលប៉ះពាល់នានាក្នុងទន្លេ៖ «សុំមើលអាជ្ញាប័ណ្ណការផ្ដល់សិទ្ធិនោះឡើងវិញ ព្រោះអាជ្ញាប័ណ្ណហ្នឹងគឺផ្ដល់សិទ្ធិឲ្យក្រុមហ៊ុន គឺធ្វើអាជីវកម្មខ្សាច់ដើម្បីធ្វើសំណង់ទេ»។
ទោះជាយ៉ាងនេះក៏ដោយ ប្រជាពលរដ្ឋសហគមន៍ឃុំថ្មកែវ ព្រួយបារម្ភថា ការធ្វើអាជីវកម្មរែងរ៉ែមាសក្នុងទន្លេ និងបង្កឲ្យខូចគុណភាពទឹកប៉ះពាល់ធនធានត្រី និងបរិស្ថានទន្លេ។ ចំណែកការប្រើប្រាស់សារធាតុគីមីក្នុងអាជីវកម្មនេះ ក៏នឹងធ្វើឲ្យប៉ះពាល់សុខភាពប្រជាពលរដ្ឋអ្នកប្រើប្រាស់ ឬបរិភោគទឹកទន្លេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។