បណ្ដាញអ្នកអភិរក្សព្រៃឈើនៅស្រុកសំបូរ ខេត្តក្រចេះ គ្រោងនឹងដាក់ញត្តិទៅអាជ្ញាធរ និងស្ថាប័នពាក់ព័ន្ធទៅនឹងករណីកាប់បំផ្លាញព្រៃឈើយ៉ាងអានាធិបតេយ្យនៅតំបន់ព្រៃឡង់។
អាជ្ញាធរបញ្ជាក់ថា កន្លងមកធ្លាប់មានការបង្ក្រាបបទល្មើសព្រៃឈើតំបន់នោះជាហូរហែមកដែរ ហើយការគ្រោងដាក់ញត្តិរបស់ប្រជាសហគមន៍នេះ គឺជាវិធីល្អសម្រាប់អាជ្ញាធរបន្ថែមទៀត លើការបង្រ្កាបបទល្មើសទាំងនេះ។
បន្ទាប់ពីចេញសកម្មភាពចុះឃ្លាំមើលនូវបទល្មើសព្រៃឈើប៉ុន្មានថ្ងៃពីសំណាក់បណ្ដាញស្នូលព្រៃឡង់ នៅស្រុកសំបូរ ខេត្តក្រចេះ សកម្មជនព្រៃឈើឱ្យដឹងថា សកម្មភាពកាប់បំផ្លាញព្រៃឈើនៅតំបន់ត្រពាំងពារ ឃុំកំពង់ចាម ស្រុកសំបូរ ក្នុងដែនដីព្រៃឡង់ កាន់តែកើនឡើងយ៉ាងអនាធិបតេយ្យ។
សកម្មជនព្រៃឡង់ម្នាក់រស់នៅឃុំកំពង់ចាម ស្រុកសំបូរ ថ្លែងក្នុងលក្ខខណ្ឌមិនបញ្ចេញឈ្មោះ ឱ្យដឹងថា ពួកគាត់បានចុះត្បាតនៅក្នុងតំបន់ព្រៃឡង់ រយៈពេលបីថ្ងៃ កាលពីថ្ងៃ៩ ដល់ថ្ងៃ១១ មិថុនា ឃើញសកម្មភាពរបស់ប្រជាពលរដ្ឋដែលនាំគ្នាកាប់និងដឹកឈើមកលក់ឱ្យឈ្មួញធំៗនៅតំបន់នោះប្រមាណជាង ១០គោយន្ត។
លោកបន្តថា ពេលយកមកលក់ឱ្យឈ្មួញគេក៏បានដឹកជញ្ជូនឈើទាំងនោះទៅដេប៉ូឈើធំៗ ជាច្រើននៅក្នុងស្រុកព្រែកប្រសប់ ដែលជាដេប៉ូរបស់អ្នកមានអំណាចនៅទីនោះ ប៉ុន្តែអាជ្ញាធរជំនាញវិញហាក់មិនសូវចាប់អារម្មណ៍នឹងបញ្ហានេះឡើយ។ បន្ថែមពីនេះទៀត អាជ្ញាធរទាំងនោះហាក់មានការលាក់លៀមចំពោះបទល្មើសបទព្រៃឈើទាំងនោះ បើទោះបីជាដឹងថា សកម្មភាពកាប់នឹងធ្វើអាជីវកម្មឈើប្រៀបបានទៅនឹងការធ្វើបុណ្យកឋិនទៅហើយក្តី។
សកម្មជនព្រៃឡង់៖ «មូលហេតុអ្វីបានជាមេព្រៃមិនទទួលខុសត្រូវចំពោះការពារព្រៃ ព្រោះគាត់ជាមេព្រៃហើយ ហើយពួកយើងជាអ្នកចូលរួមជួយប៉ុណ្ណឹងហើយ ពួកគាត់បែរជាមិនសូវចាប់អារម្មណ៍ បែរជាចោទសហគមន៍ព្រៃឡង់ជាអ្នកប្រឆាំងរដ្ឋាភិបាល»។
លោកបញ្ជាក់ថា រាល់ឯកសារភស្តុតាងទាំងអស់ហ្នឹងត្រៀមបញ្ជូនទៅអាជ្ញាធរពាក់ព័ន្ធឱ្យចាត់វិធានការជាបន្ទាន់ ដើម្បីទប់ស្កាត់បទល្មើសព្រៃឈើឱ្យខាងតែបាននៅតំបន់នោះ។
ទាក់ទងនឹងបញ្ហានេះអភិបាលស្រុកសំបូរ លោក ហេង សុថា មានប្រសាសន៍ថា ជាទូទៅការកាប់បំផ្លាញព្រៃឈើ ឬធ្វើអាជីវកម្មនៅក្នុងតំបន់ដែលលោកគ្រប់គ្រង បើទោះបីជាធំក្តី ឬតូចក្តី គឺមិនមានការអនុញ្ញាតណាមួយពីអាជ្ញាធរនោះទេ ប៉ុន្តែអាចនឹងករណីលួចលាក់នៅតំបន់នោះ។
លោកបន្តថា អាជ្ញាធរខេត្ត រួមនឹងមន្រ្តីជំនាញតែងតែសហការជាមួយប្រជាសហគមន៍ជានិច្ច ប៉ុន្តែគ្រាន់តែពេលខ្លះ ប្រជាពលរដ្ឋមិនបានជូនដំណឹងមកអាជ្ញាធរទើបធ្វើឱ្យពួកលោកមិនដឹងជុំវិញបញ្ហានេះ៖ «បាទ! យើងបន្តធ្វើជាបណ្តើរៗពិតមែន តែយើងមិនអាចធ្វើជាលក្ខណៈទ្រង់ទ្រាយធំ ព្រោះទំហំនៃការងាររបស់រដ្ឋបាលស្រុក គឺយើងអាចធ្វើទំហំការងារបានត្រឹមតែការងាររដ្ឋបាលស្រុក ដែលរដ្ឋបាលស្រុកអាចអនុវត្តបាន ហើយរាល់ការងារធំដុំ គឺយើងរាយការណ៍ជូនឧត្ដមអភិបាលខេត្តដើម្បីឱ្យលោកជ្រាបនិងមានវិធានការជាបន្តបន្ទាប់»។
លោកបញ្ជាក់ថា លោកមិនបានដឹងថា តើមានមន្ត្រីជំនាញណាពាក់ព័ន្ធនឹងបញ្ហានេះ ឬយ៉ាងណានោះទេ គឺវាអាស្រ័យលើភស្តុតាងច្បាស់លាស់ មិនអាចចេះចោទប្រកាន់បាននោះឡើយ ពីព្រោះអាជ្ញាធររួមនឹងមន្ត្រីជំនាញតែងតែចុះបង្រ្កាបបទល្មើសព្រៃឈើជាប្រចាំ។
នាយកអង្គការការពារធនធានធម្មជាតិ លោក ឈឹម សាវុធ មានប្រសាសន៍ថា ការចុះល្បាតក្នុងតំបន់ព្រៃឡង់ រយៈពេលបីថ្ងៃកន្លងទៅនេះ ទាំងខេត្តកំពង់ធំ និងក្រចេះ គឺមានវត្ថុតាងនៃបទល្មើសព្រៃឈើជាច្រើន រួមមានគំនរឈើជាច្រើនម៉ែត្រគូប មានទាំងរណា និងរថយន្តដឹកឈើជាច្រើនគ្រឿងទៀតផង។
លោកបន្តថា បទល្មើសព្រៃឈើនៅស្រុកសំបូរ គឺនៅតំបន់ភ្នំជី តំបន់ត្រពាំងពារ ហើយម្ចាស់អាជីវកម្មដ៏ធំ គឺអ្នកមានមកពីខេត្តកំពង់ចាម ដែលកំពុងធ្វើអាជីវកម្មឈើប្រភេទឈើលេខមួយ ដើម្បីយកទៅលក់តាមដេប៉ូ និងនាំចេញទៅប្រទេសវៀតណាម៖ «យើងដឹងឈ្មោះថាឧកញ៉ា លឹម ប៊ុនណា ហៅ ខ្នា ជាអ្នកប្រមូលទិញ។ ប៉ុន្តែអ្នកដែលចូលទៅកាប់ព្រៃនោះ គឺប្រជាពលរដ្ឋទេជាអ្នកចូលទៅកាប់ ហើយក្រុមឧកញ៉ាជាអ្នកប្រមូលទិញ ហើយជួលប្រជាពលរដ្ឋដឹកចេញនៅឃ្លាំងដំឡូងមួយ នៅស្រុកព្រែកប្រសប់ ហើយគេនាំចេញឆ្លងទន្លេមេគង្គចន្លោះស្រុកឆ្លូង ហើយដាក់ឡានធំស្រុកឆ្លូង ដឹកចេញទៅវៀតណាម តាមច្រកដូង ៧ដើម»។
លោកបន្ថែមទៀតថា ប្រជាពលរដ្ឋនឹងក្លាយជាជនរងគ្រោះដោយសារការយកលុយជាអន្ទាក់របស់ឧកញ៉ាធំៗ ដើម្បីឱ្យពួកគាត់កាប់បំផ្លាញឈើយកមកលក់ឱ្យខ្លួន។ យ៉ាងណាក៏ដោយ ច្បាប់នៃការកាប់បំផ្លាញព្រៃឈើ ជាបទល្មើសជាក់ស្ដែង គឺត្រូវមានទោសប្រហែលគ្នាទាំងអ្នកប្រព្រឹត្តផ្ទាល់ និងប្រយោល រួមនឹងការចូលរួមលាក់បាំងបទល្មើសទាំងនោះពីសំណាក់អាជ្ញាធរទៀតផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។