ក្រុមសហគមន៍ជនជាតិដើមភាគតិចកាចក់ រស់នៅភូមិកាណាតធំ ឃុំតាឡាវ ស្រុកអណ្ដូងមាស ខេត្តរតនគិរី បាននាំគ្នាដុតម៉ាស៊ីនអារឈើដែលគេនិយមហៅថា ត្រង់ស៊ីន័រ ចំនួន ៤គ្រឿង ក្រោយពីរឹបអូសពីកម្មករស៊ីឈ្នួលកំពុងលួចអាររំលំយកឈើមានតម្លៃក្នុងព្រៃអភិរក្ស។
ម្ចាស់ម៉ាស៊ីនអារឈើដែលអ្នកភូមិសម្រេចដុតកម្ទេចចោលមានឈ្មោះ ថុល ណាង និងប្រឹក្សាជាឈ្មួញអ្នកមានប្រាក់ និងជាមន្ត្រីមូលដ្ឋានរស់នៅស្រុកអណ្ដូងមាស។
តំណាងអ្នកភូមិ លោក សល់ ឌឹក រៀបរាប់ថា ការដុតម៉ាស៊ីនអារឈើនេះ ធ្វើឡើងកាលពីថ្ងៃទី២៣ ខែសីហា ដោយសារតែអ្នកភូមិយល់ថា ការចាប់បញ្ជូនវត្ថុតាងទៅសមត្ថកិច្ចមិនមានប្រសិទ្ធភាពទប់ស្កាត់បទល្មើសព្រៃឈើបានទេ។ លោកថា ឈ្មួញមានប្រាក់និងបុគ្គលជាសមត្ថកិច្ចនៅមូលដ្ឋានគឺជាអ្នកផ្ដល់ម៉ាស៊ីនអារឈើទៅឲ្យកម្មករស៊ីឈ្នួលដើម្បីអារច្រៀកឈើធ្វើអាជីវកម្មខុសច្បាប់។
លោក សល់ ឌឹក៖ «វាកំពុងអារ វាកំពុងរំលំឈើ ហួសក្រុមហ៊ុនក្រុងប៉ុកបន្តិច កន្លែងម្តុំព្រៃសហគមន៍។ កម្មករច្រើនដែរហ្នឹង បើរាប់មួយកន្លែងបីនាក់ មួយកន្លែងបួនប្រាំនាក់ ដុតចោលក្នុងព្រៃតែម្ដង។ សហគមន៍បានរាយការណ៍ដល់មេភូមិដែរតើ!»។
អភិបាលស្រុកអណ្ដូងមាស នង ដារិទ្ធ ចាត់ទុកថា នេះជាការសម្រេចចិត្តរបស់សហគមន៍ ប៉ុន្តែលោកសំដែងការសោកស្ដាយដែលវត្ថុតាងបទល្មើសត្រូវបានបំបាត់ចោល។ លោកថា ប្រជាពលរដ្ឋគួរធ្វើរបាយការណ៍ ឬផ្ដល់វត្ថុតាមមកសមត្ថកិច្ចដើម្បីកំណត់អត្តសញ្ញាណជនពាក់ព័ន្ធឲ្យទទួលខុសត្រូវតាមផ្លូវច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។