ជនជាតិដើមភាគតិចរស់នៅឃុំសំអាង ស្រុកថាឡាបរិវ៉ាត់ ខែត្រស្ទឹងត្រែង អះអាងថា ចលនាទន្ទ្រានព្រៃសហគមន៍ភ្នំជម្រកសត្វ កំពុងកើតមានគគ្រឹកគគ្រេងដោយពលរដ្ឋចំណូលថ្មី និងឈ្មួញ បើទោះបីជាប្រមុខរដ្ឋាភិបាលបានចេញសារាចរជំរុញឲ្យអាជ្ញាធរពាក់ព័ន្ធទប់ស្កាត់ក្តី។ អ្នកភូមិថា ពលរដ្ឋចំណាកស្រុកបានសង់ខ្ទម និងបោះតង់ស្នាក់នៅជាង ១០កន្លែងក្នុងព្រៃសហគមន៍នោះ។
ជនជាតិដើមភាគតិចកួយ អំពាវនាវជាថ្មីទៀត ឲ្យអាជ្ញាធររដ្ឋាភិបាល និងស្ថាប័នពាក់ព័ន្ធបញ្ឈប់សកម្មភាពកាប់ទន្ទ្រានព្រៃសហគមន៍ភ្នំជម្រកសត្វ និងដកហូតដីដែលជនចំណូលថ្មីកាប់ឆ្ការនោះជាសម្បត្តិសមូហភាពរបស់សហគមន៍វិញ។
ការអំពាវនាវនេះធ្វើឡើងនៅថ្ងៃទី២៤ ខែតុលា ក្រោយពីសកម្មភាពទន្ទ្រានដីព្រៃសហគមន៍ភ្នំជម្រកសត្វបង្កឡើងដោយពលរដ្ឋចំណូលថ្មី និងក្រុមឈ្មួញកាន់តែរីកធំឡើងពុំឃើញមានការទប់ស្កាត់ពីអាជ្ញាធររដ្ឋាភិបាលជាដុំកំភួនឡើយ។
ជនជាតិដើមភាគតិចកួយ រស់នៅឃុំសំអាង ស្រុកថាឡាបរិវ៉ាត់ លោក អ៊ុក ម៉ៅ មើលឃើញថា ព្រៃស្រោងដែលជាជម្រកសត្វកម្រជិតផុតពូជឋិតក្នុងព្រៃសហគមន៍ បានក្លាយជាវាលមួយផ្នែកធំ និងគ្រប់គ្រងជាសម្បត្តិបុគ្គល។ លើសពីនេះ ក្រុមកម្មករជាច្រើនក្រុមបានប្រើម៉ាស៊ីនអារឈើស្វ័យប្រវត្តិ ឬត្រង់ស៊ីន័រ កាប់រំលំដើមឈើធំៗ ធ្វើអាជីវកម្ម និងដុតចោល រួចដាំដំឡូងមី និងស្វាយចន្ទី។ លោកថា មកទល់ពេលនេះ សកម្មភាពកាប់ទន្ទ្រានអស់ប្រមាណ ២ពាន់ហិកតារត្រង់ចំណុចត្រពាំងព្រៃ អូរឆ្កូត និងតំបន់ភ្នំធំ។
លោកបារម្ភថា ប្រសិនបើមន្ត្រីជំនាញរដ្ឋបាលព្រៃឈើ និងអាជ្ញាធររដ្ឋាភិបាលមិនរកមធ្យោបាយទប់ស្កាត់ឲ្យទាន់ពេលទេ ព្រៃសហគមន៍នោះនឹងបាត់បង់ទាំងស្រុងនៅពេលដ៏ខ្លីខាងមុខ៖ «ដូចថា ជនមកពីឆ្ងាយមកកាប់ទន្ទ្រានយកដីសហគមន៍ធ្វើជាដីកម្មសិទ្ធិខ្លួនឯង។ ខ្ញុំព្រួយបារម្ភខ្លាំង ទី១ ខ្លាចអស់សត្វព្រៃ ទី២ ទៀតអស់ដើមឈើ ឬព្រៃឈើទី៣ទៀត បារម្ភខ្លាចក្មេងជំនាន់ក្រោយអត់មានឈើធ្វើផ្ទះ វានឹងរលាយហិនហោច»។
មេឃុំសំអាង លោក ញៀន ផុន ឲ្យដឹងនៅថ្ងៃទី២៤ ខែតុលា ថា ពលរដ្ឋចំណូលថ្មីពុំមានសិទ្ធិគ្រប់គ្រងដីព្រៃសហគមន៍នោះទេ បើទោះបីជាពួកគេបានកាប់ទន្ទ្រានក្ដី។ លោកថា ប្រសិនបើពលរដ្ឋប្រទះឃើញបុគ្គលណាពាក់ព័ន្ធកាប់ឆ្ការព្រៃសហគមន៍នោះ ត្រូវជូនដំណឹងមកអាជ្ញាធរមូលដ្ឋានដើម្បីចាត់វិធានការច្បាប់ជាបន្ទាន់៖ «ខាងរដ្ឋបាលព្រៃឈើគេធ្វើការដូចគ្នាដែរ តែគេធ្វើការមិនដិតដល់ជូនកាលខលទៅគេជាប់រង្វល់។ ដល់សហគមន៍ចូលទៅសហគមន៍អត់មានសិទ្ធិ អត់មានសិទ្ធិចាប់គេគឺអត់មាន»។
អាស៊ីសេរីមិនអាចទាក់ទងនាយផ្នែករដ្ឋបាលព្រៃឈើស្រុកថាឡាបរិវ៉ាត់ លោក វ៉ា សុខា ដើម្បីសុំការបញ្ជាក់បញ្ហានេះបានទេ នៅថ្ងៃទី២៤ ខែតុលា។
ព្រៃសហគមន៍ភ្នំជម្រកសត្វ ឋិតនៅភូមិឆ្វាំង ឃុំសំអាង ស្រុកថាឡាបរិវ៉ាត់ មានផ្ទៃដីចំនួនជាង ៤ពាន់ (៤.៤៤៦,១៦) ហិកតារ ត្រូវបានអាជ្ញាធរខែត្រស្ទឹងត្រែង ទទួលស្គាល់ជាផ្លូវការនៅដើមឆ្នាំ២០១៥។ ចំណែកសហគមន៍បានស្នើសុំបន្តទៀតទៅក្រសួងបរិស្ថាន ដើម្បីចុះបញ្ជីព្រៃសហគមន៍ភ្នំជម្រកសត្វជាដីព្រៃសមូហភាពនៅដើមឆ្នាំ២០១៥ តែមិនទាន់មានការឆ្លើយតប។
យ៉ាងណាអនុប្រធានព្រៃសហគមន៍ភ្នំជម្រកសត្វ លោក ជ្រោង គង់ ថ្លែងបញ្ជាក់ថា មន្ត្រីជំនាញរដ្ឋបាលព្រៃឈើ និងអាជ្ញាធររដ្ឋាភិបាល មិនផ្ដល់អំណាចឲ្យសហគមន៍ទប់ស្កាត់បទល្មើសព្រៃសហគមន៍ទេ គឺត្រឹមតែរាយការណ៍ទៅមន្ត្រីរដ្ឋបាលព្រៃឈើប៉ុណ្ណោះ ហើយនៅគ្រាដែលសហគមន៍ប្រទះឃើញក្រុមឈ្មួញកាប់ទន្ទ្រានព្រៃសហគមន៍ ហើយរាយការណ៍ទៅមន្ត្រីរដ្ឋបាលព្រៃឈើ បែរជាមន្ត្រីរដ្ឋបាលព្រៃឈើមិនបានចុះអន្តរាគមន៍ទាន់ពេល បង្កឲ្យជនល្មើសគេចខ្លួនបាត់។ លោកអំពាវនាវឲ្យរដ្ឋាភិបាលផ្ដល់អំណាចអភិរក្សធនធានធម្មជាតិដល់សហគមន៍ ប្រយោជន៍រួមចំណែកការពារធនធានធម្មជាតិ ជាមួយរដ្ឋាភិបាលដើម្បីសង្គ្រោះព្រៃឈើនៅសេសសល់ចុងក្រោយ៖ «យើងមិនអាចចុះហត្ថលេខាប្លង់ឲ្យបានទេ ព្រោះវាក្រៅច្បាប់ ក្រៅតំបន់វិនិច្ឆ័យរបស់ច្បាប់»។
មន្ត្រីឃ្លាំមើលបញ្ហាព្រៃឈើនៃសមាគមអាដហុក (ADHOC) ខែត្រស្ទឹងត្រែង លោក ហូ សំអុល មើលឃើញថា វប្បធម៌និទណ្ឌភាព ឬភាពគ្មានទោសពៃរ៍កំពុងចាក់ស្រេះជ្រៅក្នុងសង្គមកម្ពុជា ខណៈដែលបទល្មើសព្រៃឈើនៅតែបន្តកើតមានជាប្រព័ន្ធ ប្រសិនបើមន្ត្រីជំនាញ និងអាជ្ញាធររដ្ឋាភិបាលនៅតែមិនអើពើអនុវត្តច្បាប់ករណីនេះទេ។
លោកថា មកទល់ពេលនេះ សកម្មភាពកាប់ទន្ទ្រានដីព្រៃប្រើប្រាស់ជាសម្បត្តិបុគ្គល កំពុងកើតមានពេញបន្ទុកនៅគ្រប់ស្រុកទាំង ៥ខែត្រនេះ ជាពិសេសគម្របព្រៃឈើឆ្នាំ២០០២ ក្នុងស្រុកថាឡាបរិវ៉ាត់៖ «ការកាប់ទន្ទ្រានដីព្រៃខុសច្បាប់ទាំង៤ ទាំង ៥ស្រុកនៅតែមានការកាប់បំផ្លាញព្រៃឈើ ទោះបីជាមានសារាចរពីរដ្ឋាភិបាល ឬច្បាប់ព្រៃឈើក៏ដោយ។ យើងឃើញអាជ្ញាធរមូលដ្ឋាន ក៏ដូចជាជំនាញដូចជាមិនយកចិត្តទុកដាក់ទៅលើការពារព្រៃឈើ»។
កាលពីថ្ងៃទី២២ ខែកញ្ញា រាជរដ្ឋាភិបាលបានចេញសារាចរស្ដីពីវិធានការគ្រប់គ្រងធនធានធម្មជាតិ ក្នុងនោះរាជរដ្ឋាភិបាលបានដាក់ចេញនូវវិធានការមួយចំនួនទៅឲ្យស្ថាប័នពាក់ព័ន្ធត្រូវចាត់វិធានការឲ្យបានហ្មត់ចត់ដើម្បីទប់ស្កាត់ និងបង្ក្រាប ព្រមទាំងលុបបំបាត់បទល្មើសធនធានធម្មជាតិគ្រប់ប្រភេទ រួមទាំងការរុករានដីក្នុងតំបន់ព្រៃការពារ និងអភិរក្សធម្មជាតិដែលស្ថិតនៅក្នុងដែនសមត្ថកិច្ចរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។