ផែនការសម្អាតផ្ទៃអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោមពីរ នៅខេត្តស្ទឹងត្រែង រហូតមកទល់ពេលនេះ មិនមានប្រភពផ្លូវការណាមួយឲ្យដឹងថា តើមន្ត្រីជំនាញរដ្ឋបាលព្រៃឈើបានវាស់វែងកំណត់ទីតាំងឲ្យបោសសម្អាតហើយឬយ៉ាងណាទេ? ក៏ប៉ុន្តែ អ្នកភូមិដែលរស់នៅក្នុងតំបន់នៃអាងស្តុកទឹក អះអាងថា ក្រុមអ្នកម៉ៅការកាប់ឈើ បានកាប់ឈើពីតំបន់ព្រៃក្រៅផ្ទៃអាងរាប់ម៉ឺនម៉ែត្រគូបរួចហើយ ដើម្បីនាំចូលទៅទីតាំងស្តុកឈើនៃផែនការបោសសម្អាតអាង ដើម្បីអារច្រៀកនាំចេញទៅទីផ្សារ។
ប្រជាពលរដ្ឋសហគមន៍ភូមិស្រែគរ ឃុំស្រែគរ ស្រុកសេសាន ខេត្តស្ទឹងត្រែង នៅថ្ងៃអង្គារ ទី៧ ខែឧសភា ឆ្នាំ២០១៣ រាយការណ៍ថា ឈើមូលប្រមាណ ៤ម៉ឺនម៉ែត្រគូប ត្រូវបានគេកាប់នៅក្នុងព្រៃក្រៅតំបន់បោសសម្អាតអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោមពីរ។
ប្រធានសហគមន៍ លោក ពុយ ចាន់ធន មានប្រសាសន៍បញ្ជាក់ថា ក្រុមអ្នកទទួលម៉ៅការសម្អាតអាងស្តុកទឹកជាក្រុមបានចូលទៅកាប់ឈើមូលគ្រប់ប្រភេទ ពីតំបន់ព្រៃភ្នំក្រឡាពស់ និងព្រៃតំបន់ញើន ហើយដឹកជញ្ជូនមកលាក់ទុកក្នុងព្រៃនៃទីតាំងអាងស្តុកទឹក និងគ្រោងដឹកជញ្ជូនមកទុកនៅដ៉េប៉ូស្តុកឈើ មានទីតាំងនៅចំណុចពោនខាងកើតភូមិស្រែគរ២។
លោកបន្តថា ក្រុមអ្នកស៊ីឈ្នួលអារឈើប្រដាប់ដោយម៉ាស៊ីនកាត់ឈើស្វ័យប្រវត្តិ និងរថយន្តស្ទូចដឹកឈើ ត្រូវបានគេជួលឲ្យចូលព្រៃកាប់ឈើ តាំងពីខែមេសា ឆ្នាំ២០១៣ ហើយបច្ចុប្បន្ន អ្នកកាប់ឈើបានវិលត្រឡប់មកវិញហើយ បន្ទាប់ពីរដូវធ្លាក់ភ្លៀងនេះ៖ «កម្មករកាប់ឈើ គេនិយាយអីចេះ គេថាឈប់កាប់ហើយ។ អ្នកខ្លះឡើងមកពីក្រចេះ ឡើងមកពីកំពង់ចាម មកពីកំពង់ឆ្នាំង។ គេកាប់គ្រប់គ្រាន់ហើយជាង ៤ម៉ឺនដើមហើយ។ គេខ្លាចដឹកមិនរួចពេលភ្លៀងធ្លាក់មកណា!»។
ក្រសួងកសិកម្ម បានអនុញ្ញាតឲ្យក្រុមហ៊ុនក្នុងស្រុកមួយឈ្មោះ អាំង អេន អាសូស៊ីអេត ឡយ័រ (ANG & ASSOCIATES LAWYER) កាប់ឈើសម្អាតផ្ទៃអាងស្តុកទឹកនៃគម្រោងសាងសង់ទំនប់វារីអគ្គិសនីសេសានក្រោមពីរ នៅខេត្តស្ទឹងត្រែង។ កាលពីខែមករា ឆ្នាំ២០១៣ ប្រធានក្រុមហ៊ុន លោកឧកញ៉ា គិត ម៉េង ចាត់តាំងឲ្យលោក លឹម ប៊ុណ្ណា និងលោក ហាស វិបុល ការពារតំបន់ព្រៃឈើក្នុងអាងស្តុកទឹកមានផ្ទៃដី ៣ម៉ឺន ៦ពាន់ហិកតារ។ ប៉ុន្តែអ្នកភូមិស្រែគរ ឲ្យដឹងថា អ្នកម៉ៅការសម្អាតអាងទឹកមានឋានៈជាឧកញ៉ាឈ្មោះ ខ្នារ បានបង្កើតទីតាំងស្តុកឈើពីរកន្លែងនៅចំណុចពោន និងនៅចំណុចខ្ទមអ្នកតា ក្នុងភូមិស្រែគរ។
វិទ្យុអាស៊ីសេរី នៅថ្ងៃអង្គារ ទី៧ ខែឧសភា មិនអាចទាក់ទងមន្ត្រីក្រុមហ៊ុនណាម្នាក់អធិប្បាយសេចក្តីរាយការណ៍ចោទប្រកាន់នេះបានទេ។ ចំណែកនាយខណ្ឌរដ្ឋបាលព្រៃឈើ ខេត្តស្ទឹងត្រែង លោក អ៊ីឯក សាវត្តី លោកមិនទទួលទូរស័ព្ទអ្នកយកព័ត៌មានវិទ្យុអាស៊ីសេរី ហៅចូលឡើយ។
យ៉ាងនេះក្តី មេឃុំស្រែគរ លោក សៀក មេគង្គ មានប្រសាសន៍បញ្ជាក់ថា អ្នកភូមិបានរាយការណ៍មកអាជ្ញាធរឃុំពីករណីនេះហើយ។ លោកបន្តថា ឈើមូលដែលលាក់ទុកក្នុងព្រៃហ្នឹង ត្រូវដឹកជញ្ជូនចូលទៅដេប៉ូស្តុកឈើរបស់ក្រុមហ៊ុនម៉ៅការសម្អាតផ្ទៃអាង ហើយអារច្រៀកនាំចេញនៅមុនរដូវធ្លាក់ភ្លៀងជោគជាំនេះ៖ «យើងមិនជំទាស់ទេរឿងកាប់ គ្រាន់ថាយើងសិក្សាសិន អានេះកាប់ប៉ាតណាប៉ាតណី ចុះអនាគតទៅយើងបានអ្វីទីពឹងលើធម្មជាតិ»។
នាយខុទ្ទកាល័យសាលាខេត្តស្ទឹងត្រែង លោក ដួង ពៅ មានប្រសាសន៍បញ្ជាក់ថា រាជរដ្ឋាភិបាល ក្រសួងពាក់ព័ន្ធ និងអាជ្ញាធរខេត្ត បានឯកភាពលើគោលការណ៍ឲ្យក្រុមហ៊ុនសម្អាតផ្ទៃអាងរួចហើយ ប៉ុន្តែលោកមិនប្រាកដទេថា ប្រតិបត្តិការបោសសម្អាតអាង ក្រុមជំនាញបានចុះវាស់វែងកំណត់ទីតាំងជាក់ស្តែងឲ្យក្រុមហ៊ុនប្រតិបត្តិការហើយឬយ៉ាងណា? លោកបន្តថា នឹងរាយការណ៍ព័ត៌មាននេះជូនអភិបាលខេត្តទើបចូលកាន់តំណែងថ្មីបានជ្រាប និងចាត់វិធានការពិនិត្យសេចក្តីរាយការណ៍នេះ៖ «ខ្ញុំមិនដឹងថាការងារបច្ចេកទេសវាយ៉ាងម៉េចទេ ប៉ុន្តែផ្អែកលើផែនទី ផ្អែកលើទីតាំងដែលរដ្ឋកំណត់ឲ្យគាត់ធ្វើហ្នឹង។ បើសិនក្នុងករណីគាត់ធ្វើក្រៅរង្វង់ទីតាំងដែលគេកំណត់ជាទីតាំងបាតអាង ដែលត្រូវសម្អាត អាហ្នឹងជារឿងមួយផ្សេងទៀត»។
មន្ត្រីផ្នែកអង្កេត សមាគមអាដហុក (Adhoc) ការពារសិទ្ធិមនុស្ស ខេត្តស្ទឹងត្រែង លោក ហូ សំអុល បានកត់សម្គាល់ថា សមាគមលោកក៏ទទួលបានព័ត៌មានស្ដីពីការលួចកាប់ឈើក្រៅគម្រោងសម្អាតអាងស្តុកទឹកនោះដែរ។ លោកអំពាវនាវសុំឲ្យអាជ្ញាធរថ្នាក់ជាតិ ស៊ើបអង្កេតបទល្មើសព្រៃឈើនេះ៖ «គួរតែអាជ្ញាធររដ្ឋបាលព្រៃឈើជំនាញណាចុះស៊ើបអង្កេតឲ្យបានដិតដល់។ បើសិនយើងបណ្ដែតបណ្តោយទៅ ព្រៃឈើនៅម្តុំហ្នឹងនឹងអាចវិនាសហិនហោច»។
យ៉ាងនេះក្តី អាជ្ញាធរឃុំស្រែគរ និងតំណាងប្រជាពលរដ្ឋ ឲ្យដឹងថា ក្រុមហ៊ុន និងមន្ត្រីជំនាញមិនបានជូនដំណឹងស្ដីពីផែនការសម្អាតអាងស្តុកទឹកនេះឲ្យអ្នកភូមិបានដឹងឡើយ ហេតុនេះទើបករណីលួចកាប់ឈើក្រៅតំបន់អាងស្តុកទឹកកើតឡើងអនាធិបតេយ្យបែបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។