ប្រជាពលរដ្ឋមួយចំនួននៅខេត្តមណ្ឌលគិរី ចោទប្រកាន់ទៅលើមន្ត្រីស្ថាប័នពាក់ព័ន្ធនឹងកិច្ចការអភិរក្ស ហើយថា មន្ត្រីជំនាញទាំងនោះមិនទទួលខុសត្រូវលើភារៈរបស់ខ្លួន និងបានបណ្ដែតបណ្ដោយឲ្យឈ្មួញ ជនឆ្លៀតឱកាសបំផ្លាញធនធានធម្មជាតិនៅតំបន់នោះអស់រយៈពេលជាច្រើនឆ្នាំមកហើយ។
ប្រជាពលរដ្ឋនៅខេត្តមណ្ឌលគិរី អ្នកអភិរក្សធនធានធម្មជាតិ នៅថ្ងៃពុធ ទី៩ ខែតុលា អំពាវនាវឲ្យប្រមុខរាជរដ្ឋាភិបាលអាណត្តិថ្មី ចាត់វិធានការទប់ស្កាត់ឲ្យមានប្រសិទ្ធភាពនូវសកម្មភាពកាប់បំផ្លាញព្រៃឈើធ្វើអាជីវកម្មឈើប្រណិត ឈើមានតម្លៃ និងសកម្មភាពឈូសឆាយរានយកដីនៅក្នុងតំបន់អភិរក្សចំនួនពីរ ដែលបានរងការបំផ្លាញច្រើនឆ្នាំកន្លងទៅនេះ។
តំបន់អភិរក្សទាំងពីរ រួមមាន តំបន់ការពារដែនជីវចម្រុះសីមា ក្នុងស្រុកកែវសីមា មានទំហំដីជាង ១.២ម៉ឺនហិកតារ និងតំបន់ព្រៃការពារមណ្ឌលគីរី ក្នុងស្រុកកោះញែក និងស្រុកពេជ្រាដា មានទំហំដីជាង ២.៧ម៉ឺនហិកតារ។
ប្រជាពលរដ្ឋរស់នៅខេត្តមណ្ឌលគិរី មួយរូបសុំមិនឲ្យបញ្ចេញឈ្មោះ សម្ដែងទុទិដ្ឋិនិយមថា ច្រើនឆ្នាំកន្លងទៅនេះ ឈើមានតម្លៃនិងឈើប្រណិតត្រូវគេកាប់ដឹកជញ្ជូនចេញពីតំបន់អភិរក្សទាំងពីរ។
ពលរដ្ឋដដែលបន្តថា សកម្មភាពកាប់បំផ្លាញព្រៃឈើទាំងអស់នោះ បានធ្វើឲ្យប៉ះពាល់ដល់ជម្រកជីវចម្រុះ និងសត្វព្រៃដែលកំពុងរស់នៅក្នុងព្រៃអភិរក្សទាំងពីរ ដូច្នេះនៅពេលបច្ចុប្បន្ន និងថ្ងៃអនាគត ព្រៃឈើមានតម្លៃនិងសត្វព្រៃគ្រប់ប្រភេទនឹងត្រូវហិនហោចអស់មិនខាន៖ «ឥឡូវគ្រឿងចក្រធុនធ្ងន់ និងរទេះគោចូលទៅរាប់សិប រាប់រយគ្រឿង ហើយឡានសុទ្ធតែយីឌុប ធុនយក្សចូលដឹកឈើ ថាទៅដឹកឈើគេចាប់បាន ប៉ុន្តែឈើចាប់បានវានៅតែកន្លែងចាប់ឈើហ្នឹង អាឈើដឹកមកសុទ្ធតែធ្នង់ ចេញជ័រថ្មីតែទាំងអស់ អ៊ីចឹងយើងខ្មាសបរទេស យើងយកលុយគេមក ហើយយើងបំផ្លាញខ្លួនឯងនេះ។ គេមានលុយឲ្យការពាររបស់យើង ការពារសត្វព្រៃ ឥឡូវសត្វរត់ទៅស្រុកយួនអស់ហើយ»។
តំបន់ព្រៃអភិរក្សទាំងពីររបស់រដ្ឋនេះ ឋិតក្រោមការគ្រប់គ្រងដោយមន្ត្រីខណ្ឌរដ្ឋបាលព្រៃឈើខេត្តមណ្ឌលគិរី និងចូលរួមផ្ដល់មូលនិធិអភិរក្សដោយអង្គការក្រៅរដ្ឋាភិបាលចំនួនពីរ គឺអង្គការសង្គមអភិរក្សសត្វព្រៃ (WCS=Wildlife Conservation Society) អភិរក្សនៅតំបន់ការពារជីវចម្រុះសីមា និងមូលនិធិពិភពលោកអភិរក្សធម្មជាតិ (WWF=World Wide Fund for Nature) អភិរក្សនៅតំបន់ការពារមណ្ឌលគិរី។
ឆ្លើយតបករណីនេះ ប្រធានព្រៃការពារមណ្ឌលគិរី លោក កែវ សុភ័ក្រ ទទួលស្គាល់ថា កន្លងទៅនេះបទល្មើសព្រៃឈើ និងការទន្ទ្រានកាប់រាន និងឈូសឆាយយកដីព្រៃការពារ ពិតជាកើតមានខ្លះមែន ក៏ប៉ុន្តែមន្ត្រីអភិរក្សបានបង្ក្រាប និងរឹបអូសមធ្យោបាយ និងជនល្មើសប្រមាណ ៥០ករណីចាប់ពីដើមឆ្នាំ២០១៣ រហូតបច្ចុប្បន្ន។
លោកកត់សម្គាល់ថា ការចូលរួមរបស់ប្រជាពលរដ្ឋ និងមន្ត្រីអាជ្ញាធរមូលដ្ឋានក្នុងការផ្ដល់ព័ត៌មានមកសមត្ថកិច្ចជំនាញទាន់ពេលវេលាអាចនឹងជួយកាត់បន្ថយ និងការពារព្រៃឈើនៅតំបន់នោះបានប្រសើរ៖ «ក្រុមហ៊ុនមួយចំនួននៅខាងលិចកោះញែក លូកដៃចូលព្រៃការពារ ថ្ងៃមួយយើងបង្ក្រាបចាប់ឡានបាន ៥គ្រឿង ឈើហាហុកសិបម៉ែត្រគូប។ ឈើប្រណិតនៅតែមានគ្រាន់តែមានលក្ខណៈតូចតាច។ បងប្អូនជនជាតិយើងដោយសារខ្វះចម្ការពនេចរ មិនមែនក្នុងទ្រង់ទ្រាយធំ បើថាការបង្ក្រាបរបស់យើងនៅតែមានបន្តបន្ទាប់»។
វិទ្យុអាស៊ីសេរី មិនអាចទាក់ទងសុំការអធិប្បាយពីនាយខណ្ឌរដ្ឋបាលព្រៃឈើខេត្តមណ្ឌលគិរី និងមន្ត្រីអង្គការអភិរក្សទាំងពីរបានទេ នៅថ្ងៃពុធ ទី៩ ខែតុលា។
ទោះជាយ៉ាងនេះក៏ដោយ ប្រជាពលរដ្ឋសុំមិនឲ្យបញ្ចេញឈ្មោះដដែលឲ្យដឹងដែរថា តំបន់ព្រៃអភិរក្សផ្សេងទៀតនៅខេត្តមណ្ឌលគិរី ដូចជាតំបន់ដែនជម្រកសត្វព្រៃភ្នំព្រេច គ្រប់គ្រងដោយក្រសួងបរិស្ថានក៏រងការកាប់បំផ្លាញធ្ងន់ធ្ងរដូចគ្នា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។