ឈើដែលក្រុមហ៊ុនដឹកជញ្ជូននេះ គឺគេកាប់ពីក្នុងតំបន់ព្រៃជាច្រើនកន្លែងនៃស្រុកឆែប ដោយមិនឃើញសមត្ថកិច្ចណាចេញមុខបង្ក្រាបធំដុំឡើយ។
បុរសម្នាក់គឺជាអ្នកភូមិឆែប នៃឃុំឆែប១ ដែលសុំមិនបញ្ចេញឈ្មោះ បានមានប្រសាសន៍កាលពីរសៀលថ្ងៃអាទិត្យ ទី១៨ ខែសីហា ថា ស្ទើរតែរៀងរាល់ថ្ងៃគាត់ឃើញឡានធំៗរបស់ក្រុមហ៊ុន ទ្រី ភាព ដឹកឈើចេញពីតំបន់គាត់រស់នៅយកទៅស្ដុកទុកក្នុងដេប៉ូមួយកន្លែងនៅម្ដុំផ្លូវបំបែកទៅឃុំកំពង់ស្រឡៅខាងត្បូងផ្លូវ ឆ្ពោះទៅស្រុកជ័យសែន។
បុរសដដែលបានបញ្ជាក់ថា បច្ចុប្បន្នមានប្រជាពលរដ្ឋជាច្រើនបានកាន់ម៉ាស៊ីនអារឈើចូលទៅក្នុងព្រៃ ដើម្បីកាប់ឈើខុសច្បាប់យកទៅលក់ឱ្យក្រុមហ៊ុន៖ «ក្រុមហ៊ុន ទ្រី ភាព ម្សិលមិញអីដឹកទាំងកុងទីន័រ ទាំងថ្ងៃទាំងយប់ រាល់ថ្ងៃនេះឯង។ គេបង្កើតសហគមន៍ ថាការពារទុកឱ្យប្រជាពលរដ្ឋ តែពេលចុងក្រោយ គេកាប់អស់រលីងបណ្ដោយ។ ឈើធ្នង់ ឈើប្រណីតមុខ ៤០ មុខ ៥០ មុខ ៣០ អីនេះ គេក្ដិចអស់ហើយ។ នេះជិតអស់ហើយមុខ ៣០ ហើយគេចាប់ផ្ដើមវាត់អាមុខ ២៥ អីទៀតហើយ។ ម៉ាស៊ីនច្រើនណាស់ ព្រលឹមឡើងយ៉ាងគគ្រឹក គោយន្តចេញព្រាតចូលព្រៃ។ អត់មានឃើញអាជ្ញាធរណាបង្ក្រាបទេ ហើយក្រុមសហគមន៍ព្រៃឈើអីនេះក៏ទៅកាប់ដែរ»។
ទោះយ៉ាងណា វិទ្យុអាស៊ីសេរី មិនអាចស្វែងរកជួបតំណាងក្រុមហ៊ុន ទ្រី ភាព ដើម្បីសុំការអធិប្បាយ ចំពោះការចោទប្រកាន់នោះបានថា យ៉ាងណាឡើយ។ ក៏ប៉ុន្តែអាជ្ញាធរស្រុកឆែប បានបដិសេធថា ក្រុមហ៊ុនមិនបានចូលទៅកាប់ឈើ ដូចការចោទប្រកាន់នោះទេ។
អភិបាលស្រុកឆែប លោក អ៊ុង វុឌ្ឍី បានមានប្រសាសន៍ថា បច្ចុប្បន្ននេះសកម្មភាពកាប់ឈើខុសច្បាប់កំពុងកើតមាននៅតាមតំបន់មួយចំនួនមែន ក៏ប៉ុន្តែមិនមែនក្រុមហ៊ុនជាអ្នកទៅកាប់ទេ គឺប្រជាពលរដ្ឋជាអ្នកទៅកាប់យកទៅលក់ឱ្យក្រុមហ៊ុន។
លោកអភិបាលស្រុកបានមានប្រសាសន៍ទៀតថា ការដែលប្រជាពលរដ្ឋខ្លួនឯងមិនមានឆន្ទៈការពារព្រៃឈើនេះ ធ្វើឱ្យសមត្ថកិច្ចមិនអាចបង្ក្រាបមានប្រសិទ្ធភាពឡើយ៖ «គាត់ប្រមូលមកលក់ឱ្យគេទេ មិនមានក្រុមហ៊ុនណាទៅកាប់អត់ទេ! បញ្ហាបទល្មើសព្រៃឈើហ្នឹង បង្ក្រាបពីមុខទៅក្រោយ ពីក្រោយទៅមុខ មិនដឹងថាយ៉ាងម៉េចដែរ ជិតអស់បាត់ហើយ តាំងពីជំនាន់ណាណីមក»។
ប្រធានអង្គការពន្លកខ្មែរនៅខេត្តព្រះវិហារ គឺលោក អាង ជាតិឡោម បានមានប្រសាសន៍ថា លោកបានទទួលព័ត៌មានជុំវិញបញ្ហាក្រុមហ៊ុនចូលទៅកាប់ឈើខុសច្បាប់នៅស្រុកឆែបនោះតាំងពីមុនពេលយុទ្ធនាការឃោសនាបោះឆ្នោតជ្រើសរើសតំណាងរាស្ត្រអាណត្តិទី៥ ចាប់ផ្ដើមម៉្លេះ។
អង្គការការពារព្រៃឈើដដែលបានយល់ថា ព្រៃឈើនៅស្រុកឆែបនេះ អាចជាធនធានចុងក្រោយដែលក្រុមឈ្មួញចាប់ផ្ដើមកាប់ខុសច្បាប់យកទៅធ្វើជំនួញ បន្ទាប់ពីខេត្តជាច្រើន ដូចជារតនគិរី ខេត្តស្ទឹងត្រែង និងតំបន់ព្រៃឡង់ ជាដើម ត្រូវពួកគេកាប់យកឈើអស់ទៅហើយនោះ។
លោក អាង ជាតិឡោម បានឱ្យដឹងថា កាលពីអំឡុងខែមករា ឆ្នាំ២០១៣ កន្លងទៅ សហគមន៍ការពារព្រៃឈើចំនួន ៨ បានចុះហត្ថលេខាជាមួយរដ្ឋាភិបាលដោយទទួលបានផ្ទៃដីជាង ២ម៉ឺនហិកតារ ដើម្បីការពារព្រៃឈើនៅក្នុងស្រុកឆែបនេះ នៅក្នុងចំណោមព្រៃឈើរាប់ម៉ឺនហិកតារទៀត បានក្លាយជាដីសម្បទានសេដ្ឋកិច្ចរបស់ក្រុមហ៊ុនទៅហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។