ឈើអារប្រភេទម៉ៃតាប់ ឈើដំសំបក និងអុសស្ទែ ត្រូវបានពលរដ្ឋដឹកជញ្ជូនយ៉ាងមមាញឹកតាមគោយន្ត និងរថយន្តនៅក្នុងទឹកដីស្រុកក្រគរ និងស្រុកភ្នំក្រវាញ ខេត្តពោធិ៍សាត់។ អាជ្ញាធរ និងជំនាញពាក់ព័ន្ធអាចជាអ្នកបើកដៃឲ្យមានសកម្មភាពល្មើសទាំងនេះ ព្រោះអ្នកដឹកឈើខ្លះអះអាងថា មន្ត្រីបរិស្ថាន និងរដ្ឋបាលព្រៃឈើដាក់កុងត្រូល យកលុយក្នុង ១គោយន្ត ១ម៉ឺនរៀល។
ប្រភពនៃប្រភេទឈើចម្រុះដែលពលរដ្ឋកាប់ដឹកចេញពីជួរភ្នំក្រវាញ និងភ្នំឱរ៉ាល់ ត្រូវបានដឹកទៅលក់តាមដេប៉ូឈើនៅទីរួមស្រុកភ្នំក្រវាញ ខេត្តកំពង់ឆ្នាំង និងរោងកែច្នៃគ្រឿងសង្ហារិមនៅបំណក់ នៃឃុំឈើតុំ ស្រុកក្រគរ។ ប៉ុន្តែមានពលរដ្ឋមួយចំនួនប្រមូលឈើងាប់ៗក្នុងដីសម្បទានសេដ្ឋកិច្ច នៃក្រុមហ៊ុនដាំដំឡូងមីភាពីម៉ិច (Peapimex) និងអាររំលំឈើស្រោងនៅក្បែរតំបន់នោះយកទៅលក់ដែរ។
បុរសវ័យជាង ៤០ឆ្នាំម្នាក់ ដែលកំពុងបើកគោយន្តដឹកអុសស្ទែ តាមបណ្ដោយផ្លូវក្រាលក្រួសក្រហមចេញពីចំណុចស្ទឹងព្រាល នៃស្រុកភ្នំក្រវាញ ឆ្ពោះទៅស្រុកក្រគរ រៀបរាប់ថា អុសដែលមានមុខពី ២តឹកកន្លះ ទៅ ៣តឹកដែលលោកកំពុងដឹកនេះ គឺប្រមូលចេញពីតាមដងអូរ និងក្បែរជើងភ្នំខ្លះ។
លោកថា ការប្រមូលអុសនេះខាងក្រុមហ៊ុន និងអាជ្ញាធរមិនបានហាមឃាត់នោះទេ ប៉ុន្តែមានដាក់កុងត្រូលយកលុយ៖ «មកពីព្រៃកន្លែងជាយៗក្នុងដីរបស់ក្រុមហ៊ុនចិន យកទៅបោះឲ្យគេក្នុងមួយគោយន្តបាន ១២ម៉ឺន ហើយផាត់ (ទូទាត់) ប្រេង និងម្ហូបអាហារទៅនៅសល់បន្តិចបន្តួច។ (ជិន ជេដ្ឋា៖ ក្នុងមួយថ្ងៃដឹកបានប៉ុន្មានជើង?) បានមួយជើង ហើយមកតាំងពីម៉ោង ២យប់»។
វិទ្យុអាស៊ីសេរី នៅថ្ងៃទី២០ ខែឧសភា មិនអាចរកប្រភពទាក់ទងមន្ត្រីបរិស្ថាន និងរដ្ឋបាលព្រៃឈើប្រចាំការនៅតំបន់នោះ ដើម្បីឆ្លើយតបបញ្ហានេះបានទេ។ ប៉ុន្តែអភិបាលស្រុកភ្នំក្រវាញ លោក សូរ សាហុង ទទួលស្គាល់ថា បទល្មើសពិតជាមានតិចតួច ប៉ុន្តែពុំមានលក្ខណៈធ្វើអាជីវកម្មធំដុំនោះទេ ព្រោះអ្នកស្រុកបានឆ្លៀតចាប់យកមុខរបរនេះដើម្បីដោះស្រាយជីវភាព បន្ថែមលើការធ្វើស្រែចម្ការ៖ «កន្លងមកយើងក៏បានចាប់ឃាត់អប់រំអ៊ីចឹងដែរ ហើយខាងមន្ត្រីជំនាញរដ្ឋបាលព្រៃឈើ សហការជាមួយខាងប៉ូលិសក៏ធ្លាប់ធ្វើម្ដងម្កាលដែរ។ កន្លងមកពាក់ព័ន្ធនឹងមន្ត្រីដែលយកលុយយកកាក់អីណា យើងតែងតែមានការហៅមកអប់រំ ហើយយើងហាមឃាត់មិនឲ្យមានដាក់កុងត្រូលជជុះ ជំរិតយកលុយពលរដ្ឋនោះទេ»។
សកម្មជនការពារធនធានធម្មជាតិខេត្តពោធិ៍សាត់ លោក គុជ វ៉េង ថ្លែងបែបរិះគន់ថា បទល្មើសបានថយចុះ គឺដោយសារបច្ចុប្បន្នលែងមានឈើប្រណីត ឬឈើមានតម្លៃកាប់ទៀត ប៉ុន្តែបទល្មើសតូចតាចកើតមានហូរហែ។
លោកស្នើឲ្យរដ្ឋាភិបាល ឬអាជ្ញាធរទប់ស្កាត់បទល្មើសទាំងនេះឲ្យមានប្រសិទ្ធភាព ដើម្បីរក្សាព្រៃឈើប្រើប្រាស់ទៅថ្ងៃអនាគត និងការពារការបម្រែបម្រួលអាកាសធាតុ៖ «បើសិនជារដ្ឋាភិបាលមិនគិតថា ព្រៃឈើមិនសំខាន់សម្រាប់ពលរដ្ឋទេ ខ្ញុំគិតថា ទៅមុខទៀតវានឹងរលាយអស់ហើយ។ និយាយទៅវារកបានតិចតួចទេ បើពីមុនហ្វូងគោយន្តមានពី ៥០គ្រឿង បើឡានមានរាប់រយឡានអ៊ីចឹងទៅ វាដូចហែកឋិនអ៊ីចឹង»។
ឈើខ្លុង និងត្បែងដែលមានមុខកាត់ចាប់ពី ២តឹកឡើងជាច្រើនដើម ត្រូវបានគេលួចអាររំលំ និងកាត់ជាកំណាត់ៗនៅក្នុងព្រៃស្រោង នៃជួរភ្នំក្រវាញ ហើយយកមកតម្រៀបលក់នៅអមសងខាងផ្លូវឋិតនៅក្នុងទឹកដីឃុំឈើតុំ ស្រុកក្រគរ និងឃុំព្រងិល ស្រុកភ្នំក្រវាញ។ នៅច្រកចេញនៃតំបន់នោះ មានកុងត្រូលមួយកន្លែង ចាំស្ទាក់យកលុយពីម្ចាស់គោយន្ត ឬរថយន្តកែច្នៃគ្រប់ប្រភេទ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។