ប្រជាពលរដ្ឋជនជាតិដើមទំពួន រស់នៅភូមិប៉ាតាង លោក ស្វិន វ៉េវ នៅថ្ងៃអាទិត្យ ទី១៨ ខែសីហា មានប្រសាសន៍បញ្ជាក់ថា ព្រៃឈើនៅតំបន់ភ្នំគន្ធី ក្នុងភូមិប៉ាតាង ឃុំប៉ាតាង ត្រូវបានគេកាប់រានជាថ្មីអស់ប្រមាណ ២០ហិកតារបន្ថែម។
លោកបន្តថា ព្រៃឈើដែលគេកំពុងកាប់រាននេះ គឺជាតំបន់ព្រៃសហគមន៍ដែលនៅសេសសល់ពីការកាប់រានយកដីប៉ុន្មានឆ្នាំកន្លងមកនេះ ក៏ប៉ុន្តែចាប់ពីដើមខែសីហា នេះ មន្ត្រីប៉ូលិសប៉ុស្តិ៍ឃុំប៉ាតាង មួយរូប គឺលោក ទិន ង៉ាន់ បានជួលកម្មករកាប់រានជាថ្មីដើម្បីរានយកដីនៅតំបន់នោះ៖ «ម្នាក់ឯងបាន ១៥ហិកតារ។ ទិន ង៉ាន់ គេធ្វើប៉ូលិសៗប៉ុស្តិ៍គេនាំមុខកាប់ច្រើនជាងគេ»។
វិទ្យុអាស៊ីសេរីនៅថ្ងៃទី១៨ ខែសីហា មិនអាចទាក់ទងលោក ទិន ង៉ាន់ សុំបំភ្លឺសេចក្ដីចោទប្រកាន់នេះបានទេ។
ទាក់ទិនករណីនេះដែរ អភិបាលស្រុកលំផាត់ លោក គង់ ស្រ៊ុន មានប្រសាសន៍បញ្ជាក់ថា លោកមិនទាន់បានទទួលសេចក្ដីរាយការណ៍ពីករណីនេះពីមន្ត្រីមូលដ្ឋាននៅឡើយ។ លោកអះអាងថា លោកនឹងចាត់អាជ្ញាធរឃុំចុះពិនិត្យសេចក្ដីរាយការណ៍នេះ៖ «ចាំខ្ញុំទូរស័ព្ទសួរលោកអធិការហើយចាំខ្ញុំបញ្ជាទៅមេឃុំឲ្យគាត់មើលៗណា!»។
នាយរងខណ្ឌរដ្ឋបាលព្រៃឈើខេត្តរតនគិរី លោក ផាន់ ភិន បានប្រសាសន៍បញ្ជាក់ថា ក្រុមសហគមន៍ត្រូវធ្វើពាក្យប្ដឹងពីអត្តសញ្ញាណអ្នកកាប់រានព្រៃឈើនេះមកខណ្ឌរដ្ឋបាលព្រៃឈើ ដើម្បីចាត់វិធានការចំពោះអ្នកប្រព្រឹត្តល្មើសយកមកផ្ដន្ទាទោស។
លោកបន្តថា សមត្ថកិច្ចព្រៃឈើនឹងកសាងសំណុំរឿងបញ្ជូនជនប្រព្រឹត្តកាប់រានព្រៃឈើទៅតុលាការដើម្បីផ្ដន្ទាទោសតាមច្បាប់ព្រៃឈើ៖ «ឲ្យប្រជាពលរដ្ឋនៅហ្នឹងផ្ដិតមេដៃមកខណ្ឌមក កុំឲ្យពិបាកចាំខ្ញុំធ្វើវិញ ហើយដាក់ឲ្យចំឈ្មោះប៉ូលិសប៉ុស្តិ៍អ៊ីចឹងមកឲ្យធ្វើអ៊ីចឹងមក។ អ្នកណានៅពីក្រោយក៏ដោយ មិនបញ្ហាអ្វីទេ ព្រោះនាយករដ្ឋមន្ត្រីគាត់ឲ្យធ្វើទាំងអស់»។
អ្នកសម្របសម្រួលសមាគមអាដហុក (ADHOC) ខេត្តរតនគិរី លោក ឆាយ ធី មានប្រសាសន៍បញ្ជាក់ថា ក្រុមសហគមន៍បានរាយការណ៍មកសមាគមលោករួចហើយ ដើម្បីជួយអន្តរាគមន៍ទៅស្ថាប័នពាក់ព័ន្ធជួយទប់ស្កាត់ករណីនេះ។
លោកបន្តថា មន្ត្រីមូលដ្ឋាននិងមន្ត្រីជំនាញត្រូវទទួលខុសត្រូវលើបញ្ហានេះ៖ «ការបណ្ដែតបណ្ដោយឲ្យមានការកាប់បំផ្លាញព្រៃឈើខាងលើនេះ ជនដែលបានប្រព្រឹត្ត និងអ្នកផ្សំគំនិត ហើយអាជ្ញាធរដែនដី មន្ត្រីជំនាញរដ្ឋបាលព្រៃឈើដែលគ្រប់គ្រងតំបន់នោះ ត្រូវមានការទទួលខុសត្រូវ»។
ព្រៃឈើនៅតំបន់ភ្នំគន្ធី កាលពីឆ្នាំ២០០៩ ត្រូវបានអតីតអនុប្រធានតុលាការខេត្តរតនគិរី គឺលោក ថោ សារ៉ន ជួលកម្មករកាប់រានអស់ប្រមាណ ២០ហិកតារម្ដងរួចហើយ ដើម្បីយកដី ប៉ុន្តែអាជ្ញាធរស្រុកនិងមន្ត្រីព្រៃឈើបានទប់ស្កាត់ និងដកហូតដីដែលបានមកពីការកាប់រានព្រៃឈើដល់ទុកជាសម្បត្តិរដ្ឋវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។