សង្គម​ស៊ីវិល​ថ្កោល​ទោស​ការ​ដុត​គំនរ​ឈើ​ក្នុង​បរិវេណ​ដី​សម្បទាន​សេដ្ឋកិច្ច​វៀតណាម

ដោយ ម៉ែន សុធីរ
2016-01-24
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
គំនរ​ឈើ​ត្រូវ​បាន​គេ​ដុត​ក្នុង​បរិវេណ​ដី​សម្បទាន​សេដ្ឋកិច្ច​វៀតណាម ឈ្មោះ ប៊ិញ ភឿក រ៉ាប់ប៊ើ ១ (Binh Phuoc Rubber 1) ស្ថិត​ក្នុង​ខេត្ត​មណ្ឌលគិរី កាល​ពី​ថ្ងៃ​ទី​២២ ខែ​មករា ឆ្នាំ​២០១៦។
គំនរ​ឈើ​ត្រូវ​បាន​គេ​ដុត​ក្នុង​បរិវេណ​ដី​សម្បទាន​សេដ្ឋកិច្ច​វៀតណាម ឈ្មោះ ប៊ិញ ភឿក រ៉ាប់ប៊ើ ១ (Binh Phuoc Rubber 1) ស្ថិត​ក្នុង​ខេត្ត​មណ្ឌលគិរី កាល​ពី​ថ្ងៃ​ទី​២២ ខែ​មករា ឆ្នាំ​២០១៦។
Photo provided

សង្គម​ស៊ីវិល​ថ្កោលទោស​ចំពោះ​ការ​ដុត​បំផ្លាញ​គំនរ​ឈើ​ក្នុង​បរិវេណ​ដី​សម្បទាន​សេដ្ឋកិច្ច ប៊ិញ ភឿក ក្រចេះ រាប់ប៊ើ១ (Binh Phuoc Kratie Rubber 1) របស់​វៀតណាម នៅ​ខែត្រ​មណ្ឌលគិរី កាល​ពី​ថ្ងៃ​ទី​២១ ខែ​មករា បន្ទាប់​ពី​​ប្រតិបត្តិការ​របស់​កម្លាំង​ប្រដាប់​អាវុធ​នៃ​គណៈកម្មការ​ជាតិ​បង្ក្រាប​បទល្មើស​ព្រៃឈើ ឡោមព័ទ្ធ​ទីតាំង​ស្តុក​ឈើ​ជា​ច្រើន​ទីតាំង នៅ​ខែត្រ​មួយ​ចំនួន​នៅ​ភាគ​ឦសាន។ លើស​ពី​នេះ សង្គម​ស៊ីវិល​ទាមទារ​ឲ្យ​រដ្ឋាភិបាល​ចាប់​ជនល្មើស​ផ្ដន្ទាទោស​តាម​ច្បាប់ និង​ដាក់ទោស​ចំពោះ​ក្រុមហ៊ុន​សម្បទាន​សេដ្ឋកិច្ច​ណា​ដែល​ពាក់ព័ន្ធ​នឹង​អាជីវកម្ម​ព្រៃឈើ​ខុសច្បាប់។

​មន្ត្រី​សង្គម​ស៊ីវិល នៅ​ថ្ងៃ​ទី​២៣ ខែ​មករា អំពាវនាវ​ឲ្យ​រដ្ឋាភិបាល​ដាក់ទោស និង​ពិន័យ​ធ្ងន់ធ្ងរ​ចំពោះ​ក្រុមហ៊ុន​សម្បទាន​សេដ្ឋកិច្ច និង​អ្នក​ពាក់ព័ន្ធ​ទាក់ទិន​ល្មើស​ព្រៃឈើ ជាពិសេស​គឺ​ការ​ដុត​បំផ្លាញ​ឈើ​ប្រណិត​ជា​ច្រើន​គំនរ ដើម្បី​បំផ្លាញ​ភស្តុតាង។ សង្គម​ស៊ីវិល​ចាត់​ទុក​ការ​ដុត​បំផ្លាញ​ឈើ​ប្រណិត​ជា​ច្រើន​ម៉ែត្រគូប​កាល​ពី​ថ្ងៃ​ទី​២១ ខែ​មករា ថា​ជា​អំពើ​ផ្គើន​នឹង​បទបញ្ជា​របស់​រដ្ឋាភិបាល និង​ផ្គើន​នឹង​គណៈកម្មការ​ជាតិ​បង្ក្រាប​បទល្មើស​ព្រៃឈើ​ដែល​កំពុង​បំពេញភារកិច្ច។

មន្ត្រី​ឃ្លាំមើល​បញ្ហា​ព្រៃឈើ​សមាគម​អាដហុក (ADHOC) ខែត្រ​មណ្ឌលគិរី លោក សុក រដ្ឋា ចាត់​ទុក​ការ​ដុត​បំផ្លាញ​ឈើ​ជាច្រើន​ម៉ែត្រគូប​ក្នុង​បរិវេណ​ដី​សម្បទាន​សេដ្ឋកិច្ច ប៊ិញ ភឿក ក្រចេះ រាប់ប៊ើ ១ របស់​វៀតណាម ថា ជា​ការ​ទាល់ច្រក និង​មិន​ទទួល​ខុសត្រូវ​របស់​ក្រុមហ៊ុន និង​ភាគី​ពាក់ព័ន្ធ បន្ទាប់ពី​ប្រតិបត្តិការ​ចុះ​បង្ក្រាប​របស់​កងកម្លាំង​ចម្រុះ​ប្រដាប់​អាវុធ​គ្រោង​ចុះ​ត្រួតពិនិត្យ​តំបន់​នោះ។

លោក​ថា ករណី​នេះ​គឺ​ជា​សញ្ញា​បង្ហាញ​ឲ្យ​ឃើញ​ពី​ភាព​ល្មើសច្បាប់​ទាក់ទិន​ឧក្រិដ្ឋកម្ម​ព្រៃឈើ​ដ៏​ធំ​ជា​ច្រើន​ឆ្នាំ​កន្លង​មក៖ «កើត​ចេញ​ពី​អ្នក​ដែល​ឃុបឃិត កន្លង​ទៅ​ពាក់ព័ន្ធ​បទល្មើស​ឧក្រិដ្ឋកម្ម​ព្រៃឈើ​នៅ​ក្នុង​ទីតាំង នៅ​ក្រុមហ៊ុន​នេះ គាត់​មាន​ចេតនា​ធ្វើ​ការ​ដុត​បំផ្លាញ និង​កម្ទេច​នៃ​បទល្មើស​ឧក្រិដ្ឋ​ព្រៃ​ឈើ​នេះ។ សមាគម​យើង​ខ្ញុំ​មាន​ការ​ថ្កោលទោស»

​លោក សុក រដ្ឋា អះអាង​ថា ក្រុមហ៊ុន​របស់​វៀតណាម និង​អ្នក​ពាក់ព័ន្ធ ត្រូវ​ទទួល​ទោស​ទាក់ទិន​ការ​ផ្ដល់​មធ្យោបាយ​ទីតាំង និង​ការ​លាក់បាំង​ព័ត៌មាន​នៃ​បទល្មើស​ឧក្រិដ្ឋកម្ម​ព្រៃឈើ ថា​អាច​ឃុបឃិត​ទទួល​ផល​ប្រយោជន៍​ពី​ការ​ផ្ដល់​មធ្យោបាយ និង​ទីតាំង​ដល់​ឈ្មួញ។

លោក សុក រដ្ឋា កត់សម្គាល់​ថា ក្រុមហ៊ុន​សម្បទាន​សេដ្ឋកិច្ច ប៊ិញ ភឿក ក្រចេះ រាប់ប៊ើ ១ អាច​ជា​ឃ្លាំង​មួយ​ដែល​អាច​បម្លែង​ឈើ​ខុស​ច្បាប់​ឲ្យ​មក​ស្របច្បាប់ ដោយ​ដឹក​ពី​ខាង​ក្រៅ​មក​ស្តុក​ទុក​ក្នុង​ក្រុមហ៊ុន ហើយ​ដាក់​ឈ្មោះ​ថា ជា​ឈើ​ស្របច្បាប់​នៅ​បរិវេណ​ដី​ក្រុមហ៊ុន​ដែល​រដ្ឋាភិបាល​ផ្ដល់​សិទ្ធិ៖ «ដុត​បំផ្លាញ​វត្ថុ​តាង​នៃ​បទល្មើស​នេះ វា​ជា​សកម្មភាព​មួយ​ផ្គើន ផ្គើន​ទៅ​នឹង​ច្បាប់​ព្រៃឈើ ផ្គើន​ទៅ​នឹង​ចំណាត់​ការ​របស់​រដ្ឋាភិបាល។ បើ​ទោះ​បី​ជា​សកម្មភាព​នេះ​កើត​ឡើង​ជា​អំពើ​របស់​អ្នក​ណា​ក៏ដោយ អ្នក​រក​ស៊ី​ឈើ ជា​ម្ចាស់​ឈ្មួញ​ឈើ ត្រូវ​តែ​ទទួល​ខុសត្រូវ​ចំពោះ​មុខ​ច្បាប់ ហើយ​គណៈកម្មការ​ត្រូវ​តែ​មាន​ការ​ផ្ដន្ទាទោស​ដើម្បី​ទុកជា​គំរូ»

​វិទ្យុ​អាស៊ីសេរី មិន​អាច​រក​ប្រភព​ទាក់ទង​តំណាង​ក្រុមហ៊ុន ប៊ិញ ភឿក ក្រចេះ រាប់ប៊ើ ១ របស់​វៀតណាម បាន​ទេ នៅ​ថ្ងៃ​ទី​២៣ ខែ​មករា។

ក្រុមហ៊ុន ប៊ិញ ភឿក ក្រចេះ រាប់ប៊ើ ១ របស់​វៀតណាម វិនិយោគ​ដំណាំ​ឧស្សាហកម្ម​កៅស៊ូ ទទួល​សិទ្ធិ​វិនិយោគ​លើ​ផ្ទៃដី​ជាង ១​ម៉ឺន​ហិកតារ​តាំង​ពី​ឆ្នាំ​២០១០ ឋិត​នៅ​ឃុំ​ស្រែ​ឈូក ស្រុក​កែវសីមា ខែត្រ​មណ្ឌលគិរី។

​ទាក់ទិន​នឹង​បញ្ហា​នេះ ប្រធាន​ក្រុម​ស្រាវជ្រាវ​នៃ​រាជបណ្ឌិត្យសភា​កម្ពុជា លោក​បណ្ឌិត សុខ ទូច បាន​បង្ហោះ​រូបភាព​គំនរ​ឈើ​ដែល​ដុត​បំផ្លាញ​ក្នុង​បណ្ដាញ​សង្គម​ហ្វេសប៊ុក (Facebook) កាល​ពី​ថ្ងៃ​ទី​២២ ខែ​មករា ឲ្យ​ដឹង​ថា ការ​ដុត​បំផ្លាញ​ឈើ​ប្រណិត​គឺ​មិន​ត្រឹមត្រូវ ហើយ​ក៏​មិន​មែន​ជា​ដំណោះស្រាយ​ទេ។ ទី​១ បំផ្លាញ​ព្រៃឈើ ទី​២ បំផ្លាញ​បរិស្ថាន គួរ​ដាក់​ដេញថ្លៃ​ដើម្បី​យក​ថវិកា​មក​ជួយ​មន្ទីរពេទ្យ​គន្ធបុប្ផា និង​ជួសជុល​ផ្លូវ​ដែល​បាន​បំផ្លាញ​ដោយសារ​ការ​ដឹក​ឈើ ហើយ​ការ​ធ្វើ​បែប​នេះ​ត្រូវ​ផាក​ពិន័យ​ទ្វេដង។

ប្រធាន​អង្គការ​កិច្ចការ​ពិសេស​សិទ្ធិមនុស្ស​កម្ពុជា លោក អ៊ូច ឡេង ចាត់​ទុក​ការ​ដុត​បំផ្លាញ​ឈើ​ជា​ច្រើន​ម៉ែត្រគូប​របស់​ក្រុមហ៊ុន​វៀតណាម ថា​មើល​ងាយ​ប្រព័ន្ធ​ច្បាប់​របស់​កម្ពុជា៖ «ឈើ​ដែល​ត្រូវ​គេ​បំផ្លាញ​ហើយ អ្នក​ណា​ក៏​យក​មិន​បាន​ដែរ។ នេះ​ជា​ចរិត​មួយ​ឈ្លើយ​ជា​ទីបំផុត មនុស្ស​របៀប​នេះ​មិន​គួរ​ឲ្យ​មាន​វត្តមាន​នៅ​ក្នុង​ស្រុក​ខ្មែរ​ត​ទៅ​ទៀត​ទេ គួរ​តែ​ផ្ដន្ទាទោស​យ៉ាង​តឹងរ៉ឹង​បំផុត​កុំ​ឲ្យ​ប្រព្រឹត្ត​ត​ទៅ​ទៀត»

គំនរ​ឈើ​ដែល​ត្រូវ​បាន​ដុត​បំផ្លាញ​ចោល​ចំនួន ១៧​គំនរ ដែល​មាន​មុខ​កាត់​ចាប់​ពី ៣​តឹក ដល់ ៦​តឹក ប្រវែង​ចាប់​ពី ២​ម៉ែត្រ ដល់ ៣​ម៉ែត្រ ភាគ​ច្រើន​ជា​ប្រភេទ​ឈើ​ប្រណិត ដូចជា​ធ្នង់ ប្រមាណ​ជាង ១០០​ម៉ែត្រគូប ឋិត​ក្នុង​បរិវេណ​ដី​សម្បទាន​សេដ្ឋកិច្ច​វៀតណាម ឈ្មោះ ប៊ិញ ភឿក ក្រចេះ រាប់ប៊ើ ១ ឋិត​នៅ​ភូមិ​ចក់ចា ឃុំ​ស្រែឈូក ស្រុក​កែវសីមា ខែត្រ​មណ្ឌលគិរី។

វិទ្យុ​អាស៊ីសេរី មិន​អាច​ទាក់ទង​អ្នក​នាំ​ពាក្យ​កងរាជអាវុធហត្ថ​លោក អេង ហ៊ី ដើម្បី​បញ្ជាក់​ពី​ចំណាត់​ការ​លើ​ក្រុមហ៊ុន​វៀតណាម ដែល​បាន​ដុត​បំផ្លាញ​ព្រៃឈើ​ជា​ច្រើន​ម៉ែត្រគូប​នោះ ប៉ុន្តែ​លោក​ធ្លាប់​ប្រាប់​វិទ្យុ​អាស៊ីសេរី ថា ប្រសិនបើ​មន្ត្រី​បច្ចេកទេស​រក​ឃើញ​ថា ក្រុមហ៊ុន និង​អ្នក​ពាក់ព័ន្ធ​ជាប់​ពាក់ព័ន្ធ​នឹង​អាជីវកម្ម​ព្រៃឈើ​ខុស​ច្បាប់​ត្រូវ​ទទួលទោស៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (7)
  • បោះពុម្ព
  • ចែករំលែក
  • អ៊ីម៉ែល

Rithy

ពី Modesto, CA USA

If not stealing wood, why burning wood to cover evidence? When will this blind govt see it? So silly... can't find word to describe how stupid this is...

Jan 25, 2016 06:49 AM

អ្នក​អាន​អនាមិក

YOU are crazy burned a good woods in your country. you burn it as you're burning Yourself VIETNAM have very bad,

Jan 25, 2016 01:18 AM

អ្នក​អាន​អនាមិក

Since they have the right to use land they should be able to cut down tree. But the profit from it must be accurately documented and there should be split for government to be used for forestry, etc.

Jan 25, 2016 01:04 AM

(

ខ្មែរអើយចូរអ្នកភ្ញាក់ខ្លួនឡើង កុំបណ្តោយទុកអោយពួកបំផ្លាញជាតិ​មាតុភូមិជាទីស្រលាញ់យើងវាជិះជាន់ឈ្លានបុះផ្លិចប៉ផ្លាញជិតយើងទៀតអី អ្នកឃើញស្រាប់ហើយ នេះគឺជាសកម្មភាព​បំផ្លិចបំផ្លាញ​​​​​របស់់​ពួកវា ភ្ញាក់ឡើងណាខ្មែរណា។

Jan 24, 2016 11:06 PM

អ្នក​អាន​អនាមិក

Heavy fine,jail and depot them.

Jan 24, 2016 06:03 PM

មើល​មតិ​ទាំង​អស់.

គេហទំព័រ​ទាំងមូល