សកម្មភាពជីកដីនៅលើកំពូលភ្នំទូកមាស ស្ថិតក្នុងឃុំដា បានបង្កឲ្យមានការចាប់អារម្មណ៍ និងការមន្ទិលពីប្រជាពលរដ្ឋក្នុងឃុំនេះ។
សមាជិកក្រុមប្រឹក្សាឃុំដា លោក ស៊ុន ភារី បានឲ្យដឹងនៅរសៀលថ្ងៃទី៨ មិថុនា ថា លោកបានឡើងភ្នំទូកមាស និងបានប្រទះជនបរទេសមួយក្រុមជាជនជាតិវៀតណាម កំពុងជីកដីលើកំពូលភ្នំពីរកន្លែង។ លោក ស៊ុន ភារី បានឲ្យដឹងបន្ថែមថា មេឃុំដា គឺលោក ជិម ចុន ជាអ្នកផ្ដល់ការអនុញ្ញាតឲ្យក្រុមជនបរទេសនេះជីកកកាយដីលើកំពូលភ្នំ ដើម្បីស្វែងរករ៉ែ តែលោកក៏មិនដឹងថាគេជីករករ៉ែប្រភេទអីខ្លះនោះទេ។ ហើយក្នុងការជីកនេះ មួយរណ្ដៅត្រូវបង់ប្រាក់ឲ្យលោកមេឃុំ ២សែនរៀល៖ «ខ្ញុំឡើងលើភ្នំម្សិលមិញនេះ ខ្ញុំបានឃើញក្រុមហ៊ុនវៀតណាម ២នាក់ប្ដីប្រពន្ធ ជួលខ្មែរយើងឲ្យជីកដីនៅចំកណ្ដាលកំពូលភ្នំ ដែលមានទម្រង់ជាបាតស្រះ។ តាមដែលអ្នកជីកនោះប្រាប់ថា គេជីករករ៉ែមានតម្លៃ ដូចជាត្បូងជាដើម។ មួយរណ្ដៅ គេឲ្យគាត់ ២០ម៉ឺនរៀល»។
មេឃុំដា លោក ជិម ចុន ទទួលស្គាល់ថា លោកពិតជាបានផ្ដល់ការអនុញ្ញាតឲ្យក្រុមជនបរទេសនេះជីកកកាយដីលើកំពូលភ្នំ ដើម្បីសាកល្បងរករ៉ែនោះមែន តែលោកក៏មិនដឹងថា គេជីករករ៉ែប្រភេទអ្វីដែរ។ យ៉ាងនេះក្ដី លោកថាលោកបានរាយការណ៍ជូនលោកអភិបាលស្រុករួចហើយ ចំពោះការអនុញ្ញាតឲ្យក្រុមជនជាតិវៀតណាម ជីកសាកល្បងរករ៉ែនេះ៖ «គេជីករណ្ដៅតែពីររណ្ដៅទេ ដើម្បីសាកមើលរករ៉ែ តែខ្ញុំក៏មិនដឹងថាគេប៉ងរករ៉ែអីដែរ។ រឿងជីកនេះ គេបានប្រាប់អាជ្ញាធរឃុំ ស្រុក និងខាងប៉ូលិសដែរ»។
ប្រភពពីសមាជិកក្រុមប្រឹក្សាឃុំដា គឺលោក ស៊ុន ភារី ដែលបានឡើងទៅពិនិត្យដល់ទីតាំងនោះ បានឲ្យដឹងថា មានរណ្ដៅពីរដែលគេបានជីករួច។ រណ្ដៅនិមួយៗមានទំហំ ២ម៉ែត្រ៤ជ្រុង និងមានជម្រៅប្រមាណជាង ២ម៉ែត្រ។
ទាក់ទិនចំពោះការជីកកកាយដីដើម្បីរករ៉ែនៅលើភ្នំទូកមាស នេះ ប្រធានមន្ទីរឧស្សាហកម្ម រ៉ែ និងថាមពល ខេត្តកំពង់ឆ្នាំង លោក អ៊ុក រស់ មានប្រសាសន៍ថា លោកពុំទាន់បានដឹងពីបញ្ហានេះនៅឡើយ។ ប៉ុន្តែ លោកបានបញ្ជាក់ថា រាល់ការស្រាវជ្រាវ ឬរុករកអ្វីមួយពីក្នុងដី ដាច់ខាតត្រូវមានការអនុញ្ញាតពីក្រសួង និងមន្ទីរឧស្សាហកម្ម រ៉ែ និងថាមពលខេត្ត និងមន្ទីរពាក់ព័ន្ធដទៃទៀត៖ «នៅទូកមាស យើងអត់បានផ្ដល់អាជ្ញាប័ណ្ណឲ្យនរណារុករករ៉ែទេ។ តែបើគេធ្វើដោយការអនុញ្ញាតពីអាជ្ញាធរនោះ គឺអត់ត្រូវច្បាប់ទេ។ ការរុករករ៉ែ ទាល់តែមានការអនុញ្ញាតពីក្រសួង ទើបអាចធ្វើបាន»។
ទោះបីជាយ៉ាងនេះក្ដី ក្នុងច្បាប់ស្ដីពីការគ្រប់គ្រង និងការធ្វើអាជីវកម្មធនធានរ៉ែ មាត្រា៣៣ បានចែងថា បុគ្គលណាដែលធ្វើប្រតិបត្តិការស្វែងរកធនធានរ៉ែដោយគ្មានអាជ្ញាប័ណ្ណ ត្រូវផាកពិន័យជាប្រាក់ពី ៥សែនរៀល ដល់ ១លានរៀល។ ករណីមិនរាងចាល ត្រូវទទួលការផាកពិន័យទ្វេដង ឬផ្ដន្ទាទោសដាក់ពន្ធនាគារពី ១ខែ ទៅ ១ឆ្នាំ ឬត្រូវផ្ដន្ទាទោសទាំងពីរតែម្ដង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។