អាជ្ញាធរស្រុកអូរយ៉ាដាវ ខេត្តរតនគិរី បានរៀបចំវេទិកាជួបពិភាក្សាជាមួយសហគមន៍ចំនួនពីរភូមិ ដើម្បីពិគ្រោះយោបល់ចុងក្រោយស្ដីពីគម្រោងសិក្សាស្រាវជ្រាវរ៉ែរបស់ក្រុមហ៊ុន អង្គរ ហ្គោល (Angkor Gold) ដែលអ្នកភូមិធ្លាប់បដិសេធមិនឲ្យក្រុមហ៊ុនចូលទៅសិក្សាក្នុងតំបន់ពួកគាត់រស់នៅ បើទោះបីក្រុមហ៊ុននេះមានអាជ្ញាប័ណ្ណអនុញ្ញាតពីក្រសួងរ៉ែ និងថាមពល ក៏ដោយ។
សហគមន៍ភូមិប្លង់ និងភូមិគងធំ ក្នុងឃុំប៉ាតេ ស្រុកអូរយ៉ាដាវ បដិសេធជាថ្មីមិនយល់ព្រមឲ្យក្រុមហ៊ុន អង្គរ ហ្គោល សិក្សាស្រាវជ្រាវរ៉ែតាមអាជ្ញាប័ណ្ណដែលក្រសួងរ៉ែ និងថាមពល បានអនុញ្ញាតនោះឡើយ។
អ្នកភូមិប្រមាណ ១០០នាក់បានលើកដៃបង្ហាញជំហរប្រឆាំងគម្រោងសិក្សាស្រាវជ្រាវរ៉ែនេះ ក្នុងវេទិកាពិគ្រោះយោបល់រវាងមន្ត្រីជំនាញតំណាងក្រុមហ៊ុន អាជ្ញាធរមូលដ្ឋាន និងតំណាងអង្គការសង្គមស៊ីវិល ធ្វើឡើងនៅថ្ងៃទី២៦ ខែតុលា ក្នុងបរិវេណសាលារៀនភូមិប្លង់។
តំណាងសហគមន៍ លោក សេវ វេង បញ្ជាក់ថា ការរំលោភសិទ្ធិមនុស្ស ការបាត់បង់ព្រៃឈើ ដីធ្លី និងផលប៉ះពាល់ផ្នែកបរិស្ថាន គឺជាចំណុចសំខាន់ដែលអ្នកភូមិបារម្ភ ប្រសិនបើក្រុមហ៊ុននេះចូលទៅស្រាវជ្រាវរ៉ែនៅតំបន់អ្នកភូមិរស់នៅ។ លោកបន្តថា ទោះបីជាក្រុមហ៊ុនមានអាជ្ញាប័ណ្ណ ឬក្រុមហ៊ុន និងអាជ្ញាធរជំនាញធានាដំណោះស្រាយផលប៉ះពាល់ប្រជាពលរដ្ឋយ៉ាងណាក្តី ចម្លើយចុងក្រោយរបស់សហគមន៍ គឺបដិសេធមិនឲ្យក្រុមហ៊ុនចូល៖ « សហគមន៍ឆ្លើយហើយមិនព្រមទេ មិនឲ្យធ្វើទេ ទោះបីថាមានអ្វីក៏ដោយ ក៏មិនព្រមឲ្យធ្វើ »។
ចាប់តាំងពីខែធ្នូ ឆ្នាំ២០១៥ សហគមន៍ជនជាតិដើមភាគតិចនៅភូមិគងធំ និងភូមិប្លង់ បានតវ៉ាទាមទារឲ្យក្រុមការងារស្រាវជ្រាវរបស់ក្រុមហ៊ុន ដកទីតាំងចេញពីភូមិ និងបដិសេធច្រើនលើកមិនអនុញ្ញាតឲ្យក្រុមហ៊ុនស្រាវជ្រាវនៅតំបន់អ្នកភូមិរស់នៅ។ ចំណែកក្រុមហ៊ុន និងអាជ្ញាធរមូលដ្ឋាន បានព្យាយាមបើកវេទិកាធ្វើបទបង្ហាញពីលក្ខណៈបច្ចេកទេស និងធានាមិនធ្វើឲ្យមានផលប៉ះពាល់ប្រជាពលរដ្ឋក្នុងគម្រោងសិក្សាស្រាវជ្រាវរ៉ែនេះ។
តំណាងសមាគមខ្មែរលើ លោក ខាញ់ សាវី បញ្ជាក់ថា សហគមន៍គួរបន្តចូលរួមពិភាក្សាដោះស្រាយបញ្ហាដែលអ្នកភូមិបារម្ភ ទាក់ទិនការអនុញ្ញាតឲ្យក្រុមហ៊ុនចូលសិក្សាស្រាវជ្រាវ។ លោកថា ការបដិសេធ ឬការដើរចេញពីវេទិកាពិភាក្សា មិនមែនជាមធ្យោបាយដោះស្រាយបញ្ហានោះទេ៖ « ប្រសិនអត់មានរដ្ឋ ប្រជាជនយើងមានអត់ ? អ៊ីចឹងត្រូវចំណេញទាំងពីរខាង បើសិនអ្នកណាបញ្ចេញមតិយោបល់ គួរយើងលើកឡើង »។
ឆ្លើយតបការបដិសេធរបស់សហគមន៍ តំណាងក្រុមហ៊ុន អង្គរ ហ្គោល លោក ម៉ា សំអាត ចាត់ទុកការសម្រេចចិត្តរបស់សហគមន៍ គឺជាជម្រើសចុងក្រោយដែលក្រុមហ៊ុនបានព្យាយាមធ្វើបទបង្ហាញ និងចូលរួមផ្តល់ព័ត៌មាន និងដោះស្រាយផលប៉ះពាល់តាមគោលការណ៍ច្បាប់ ស្របពេលក្រុមហ៊ុនទទួលបានសិទ្ធិស្រាវជ្រាវពីក្រសួងជំនាញ។ លោកថា ក្រុមហ៊ុននឹងធ្វើរបាយការណ៍ជូនអាជ្ញាធរពាក់ព័ន្ធ និងសំណូមពរអនុវត្តសិទ្ធិវិនិយោគរបស់ខ្លួន៖ « គោរពសិទ្ធិមនុស្ស ការបកស្រាយទាំងអស់ គឺយើងធ្វើហើយ។ អ៊ីចឹងយើងត្រូវអនុវត្តអ្វីដែលក្រុមហ៊ុនមានសិទ្ធិទទួលបានពីរាជរដ្ឋាភិបាល គឺក្រុមហ៊ុនត្រូវបន្តការងារ »។
ប្រធានមន្ទីរធនធានរ៉ែ និងថាមពលខេត្តរតនគិរី លោក ហ៊ុន ប៊ុនថា ថ្លែងថា នេះជាជម្រើសចុងក្រោយដែលអាជ្ញាធរព្យាយាមបង្ហាញពីដំណោះស្រាយផលប៉ះពាល់សហគមន៍ ស្របតាមស្តង់ដារច្បាប់ ក៏ប៉ុន្តែសហគមន៍នៅតែបដិសេធ។ លោកថា អាជ្ញាធរនឹងធ្វើរបាយការណ៍ជូនថ្នាក់ខេត្ត និងក្រសួង ដើម្បីសុំសិទ្ធិអនុវត្តគោលការណ៍ច្បាប់ទាក់ទិនការជំទាស់មិនសមហេតុផលនេះ៖ « សុំការអនុញ្ញាត ថាតើយើងត្រូវបន្តការងារយ៉ាងម៉េចទៀត ដើម្បីសម្រួលឲ្យក្រុមហ៊ុនសិក្សាស្រាវជ្រាវឲ្យបាន ?»។
ក្រសួងរ៉ែ និងថាមពល បានចេញអាជ្ញាប័ណ្ណឲ្យក្រុមហ៊ុន អង្គរ ហ្គោល សិក្សាស្រាវជ្រាវរ៉ែលោហៈលើផ្ទៃដីទំហំជិត ២០០គីឡូម៉ែត្រក្រឡា (១៨៧គីឡូម៉ែត្រការ៉េ) នៅតំបន់បរខាំ ស្រុកអណ្ដូងមាស ស្រុកបរកែវ និងស្រុកអូរយ៉ាដាវ ចាប់ពីថ្ងៃចេញអាជ្ញាប័ណ្ណរហូតដល់ចុងខែធ្នូ ឆ្នាំ២០១៦ និងហាមឃាត់ដាច់ខាតការស្រាវជ្រាវទៅលើដីកម្មសិទ្ធិរបស់រដ្ឋ ដែលកំណត់ថាជាតំបន់វប្បធម៌ ទីតាំងប្រវត្តិសាស្ត្រ និងតំបន់បេតិកភណ្ឌជាតិ។
ដោយឡែកក្នុងការស្រាវជ្រាវទៅលើផ្ទៃដីជាកម្មសិទ្ធិឯកជន ក្រុមហ៊ុនត្រូវមានកិច្ចព្រមព្រៀងជាមួយម្ចាស់កម្មសិទ្ធិស្ដីពីមិនជ្រៀតជ្រែក និងប៉ះពាល់ដល់ទ្រព្យសម្បត្តិ ព្រមទាំងធ្វើការទូទាត់សំណងការខូចខាតទាំងឡាយដែលបណ្ដាលមកពីសកម្មភាពរបស់ក្រុមហ៊ុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។