ថ្ងៃទី១ តុលា ឆ្នាំ២០១៣ គឺជាថ្ងៃបើកបវេសនកាលទូទាំងប្រទេសសម្រាប់ឆ្នាំសិក្សាថ្មី ២០១៣-២០១៤។ បវេសនកាលនៅឆ្នាំនេះ ចាប់ផ្ដើមស្របពេលដែលខេត្តមួយចំនួនក្នុងប្រទេសកម្ពុជា រងគ្រោះដោយសារជំនន់ទឹកភ្លៀងយ៉ាងជោកជាំ។
លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា ដែលទើបចូលកាន់តំណែង បានមានប្រសាសន៍នៅថ្ងៃទី១ ខែតុលា ឆ្នាំ២០១៣ ថា មានសាលារៀនសរុប ៣៣៦ ទូទាំងប្រទេសមិនអាចបើកទ្វារទទួលសិស្សឲ្យចូលបើកបវេសនកាលបាននៅថ្ងៃដំបូងដោយសារទឹកជន់លិច។ សាលាទាំង ៣៣៦ នោះស្ថិតក្នុងខេត្តព្រៃវែង កណ្ដាល កោះកុង បន្ទាយមានជ័យ បាត់ដំបង ក្រចេះ និងខេត្តរតនគិរី។ បើតាមលោក ហង់ ជួនណារ៉ុន ដដែលក្នុងចំណោមសាលាទាំង ៣៣៦ ដែលលិចទឹកនោះ មានសាលាបឋមសិក្សាចំនួន ២៨៨។
លោកបន្តថា សិស្សអាចចាប់ផ្ដើមចូលសិក្សាបន្ទាប់ពីទឹកស្រកទៅវិញក្នុងពេលដ៏ខ្លីខាងមុខ តែប្រសិនបើទឹកនៅតែបន្តលិច ក្រសួងអប់រំយុវជននិងកីឡា នឹងឲ្យគ្រូបង្ហាត់បន្ថែមម៉ោងដើម្បីឲ្យសិស្សទាំងនោះអាចរៀនទាន់កម្មវិធីសិក្សារបស់ក្រសួង៖ «ធម្មតាវាប៉ះពាល់មួយអាទិត្យអ៊ីហ្នឹង បើមើលទៅទឹកលិចវាយូរក៏ពិបាកដែរ ប៉ុន្តែទឹកលិចធម្មតាតែមួយអាទិត្យអី អត់អីទេ។ ក្នុងករណីទឹកលិចយូរ យើងអាចចាត់ចែងបង្រៀនម៉ោងបន្ថែមអីបាន»។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយបង្ហាញថា ខេត្តចំនួន ១២ រងផលប៉ះពាល់ដោយសារគ្រោះទឹកជំនន់ដែលបង្កឲ្យពលរដ្ឋជាង ៧ម៉ឺនគ្រួសារជួបការលំបាក។ ខេត្តដែលរងគ្រោះដោយសារទឹកជំនន់មានខេត្តព្រះវិហារ បន្ទាយមានជ័យ សៀមរាប ឧត្តរមានជ័យ កំពង់ចាម ក្រចេះ ស្ទឹងត្រែង ព្រៃវែង កណ្ដាល ព្រះសីហនុ រតនគិរី និងរាជធានីភ្នំពេញ។ គិតមកដល់ថ្ងៃទី៣០ កញ្ញា មានមនុស្សស្លាប់ដោយសារទឹកជន់ចំនួនជាង ៣០នាក់ហើយ។
ប្រធានសមាគមគ្រូបង្រៀនឯករាជ្យកម្ពុជា លោក រ៉ុង ឈុន បានឲ្យដឹងថា ទឹកជំនន់លិចសាលាអាចធ្វើឲ្យសិស្សមួយចំនួនដែលរៀននៅទីនោះ អាចរៀនមិនទាន់កម្មវិធីសិក្សារបស់ក្រសួងអប់រំ ហើយវាអាចយឺតយ៉ាវខ្លាំង ជាពិសេសសម្រាប់សិស្សដែលទើបប្រឡងមធ្យមសិក្សាបឋមភូមិដែលមិនទាន់ដឹងលទ្ធផលនៅឡើយ។ លោកថា ជាដំណោះស្រាយ ក្រសួងអប់រំយុវជននិងកីឡា ត្រូវឲ្យគ្រូបង្រៀនបន្ថែមម៉ោងដើម្បីឲ្យទាន់កម្មវិធីសិក្សា តែក្រសួងគួរផ្ដល់ថវិកាបន្ថែមដើម្បីប៉ះប៉ូវឲ្យគ្រូផងដែរ។
លោក រ៉ុង ឈុន៖ «បើយើងពន្យារពេលទៅវាចេះតែពន្យារពេលតទៅទៀត អ៊ីចឹងយើងគ្រាន់ប៉ះប៉ូវម៉ោងទៅ បន្ថែមម៉ោងទៅ ធ្វើម៉េចដើម្បីពន្លឿនកម្មវិធីដែលយឺតហ្នឹងឲ្យបោះជំហានស្មើទៅនឹងកម្មវិធីដែលយើងមាននៅក្នុងផែនការ ពេលហ្នឹងក្រសួងត្រូវចំណាយថវិកាមួយចំនួនទៅដល់លោកគ្រូ អ្នកគ្រូដែលគាត់បង្រៀនលើសបន្ថែមម៉ោង ដើម្បីពន្លឿនកម្មវិធីហ្នឹងឲ្យទាន់ទៅតាមផែនការកំណត់ឆ្នាំនីមួយៗហ្នឹងហើយ»។
ក្នុងទិវាបើកបវេសនកាលឆ្នាំសិក្សា២០១៣-២០១៤ លោកនាយករដ្ឋមន្ត្រី ហ៊ុន សែន ក៏បានផ្ញើសារលិខិតអបអរសាទរមួយផងដែរ។ នៅក្នុងសារលិខិតនោះ លោក ហ៊ុន សែន បានបញ្ជាក់ថា នៅក្នុងយុទ្ធសាស្ត្រចតុកោណដំណាក់កាលទី២ កន្លងមក ជាលទ្ធផលរាជរដ្ឋាភិបាលសម្រេចបានលទ្ធផលសូចនាករសំខាន់ក្នុងវិស័យអប់រំ។ ក្នុងនោះនៅឆ្នាំ២០១២ សាលាបឋមសិក្សារដ្ឋមានចំនួន ៦.៩១០ អនុវិទ្យាល័យរដ្ឋមានចំនួន ១.២១៤ វិទ្យាល័យរដ្ឋមានចំនួន ៤៣៣ គ្រឹះស្ថានសិក្សាឧត្ដមសិក្សារដ្ឋមានចំនួន ៣៩ និងគ្រឹះស្ថានបណ្ដុះបណ្ដាលបច្ចេកទេសនិងវិជ្ជាជីវៈរដ្ឋមានចំនួន៥៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។