ប្រធានអង្គការការពារធនធានធម្មជាតិ លោក ឈើយ ឧត្តមរស្មី ព្រួយបារម្ភពីវិនាសកម្មព្រៃឈើនៅក្នុងប្រទេសកម្ពុជា ដោយសារក្រុមហ៊ុនឧកញ៉ា ទ្រី ភាព ដែលជាមេខ្លោងធំបំផុតក្នុងការកាប់បំផ្លាញព្រៃឈើ នាំចេញទៅលក់នៅបរទេស។
លោក ឈើយ ឧត្តមរស្មី អះអាងថា ព្រៃឈើនៅក្នុងប្រទេសកម្ពុជា បច្ចុប្បន្ននេះ នៅមិនដល់ ៣០ភាគរយឡើយ ដោយបូកបញ្ចូលទាំងដើមកៅស៊ូផង។ ករណីនេះ កូនប្រុសច្បងរបស់អតីតសកម្មជនការពារព្រៃឈើ លោក ឈុត វុទ្ធី ទទូចអោយរដ្ឋាភិបាលចាត់វិធានការបញ្ឈប់នូវការផ្តល់ដីសម្បទានសេដ្ឋកិច្ចព្រៃឈើ នៅពេលអនាគត និងព្យួរដីព្រៃសម្បទានទាំងអស់ដើម្បីស្តារឡើងវិញនូវតំបន់ព្រៃដែលរងការខូចខាត។
លោក ឈើយ ឧត្ដមរស្មី៖ «ច្បាប់រដ្ឋបាលព្រៃឈើ គេសម្បទានទៅលើដីណាដែលមានព្រៃរេចរឹលទេ ប៉ុន្តែខ្ញុំស៊ើបអង្កេតមើលដីសម្បទានរបស់ឧកញ៉ា ទ្រី ភាព គឺមិនមែនព្រៃរេចរឹលទេ គឺសុទ្ធតែជាព្រៃស្រោង។ ដំបូងឡើយឧកញ៉ា ទ្រី ភាព ផ្ដោតសំខាន់ជាងគេ គឺឈើគ្រញូង ឥឡូវគ្រញូងមានការបាត់បង់អស់ហើយ។ ដូច្នេះបើរដ្ឋាភិបាលនៅតែបន្តអោយក្រុមហ៊ុនឧកញ៉ា ទ្រី ភាព បន្តកាប់ព្រៃឈើទៀត ខ្ញុំជឿថា ៥ឆ្នាំទៀតអស់ហើយព្រៃឈើខ្មែរ»។
កាលពីខែកុម្ភៈ ឆ្នាំ២០១៥ កន្លងទៅ អង្គការឃ្លាំមើលពិភពលោក (Global Witness) រកឃើញថា លោកឧកញ៉ា ទ្រី ភាព គឺជាអ្នកដឹកនាំនៃបណ្ដាញកាប់ព្រៃឈើខុសច្បាប់ដែលកាងដោយក្រុមមន្ត្រីយោធា ប៉ូលិស និងមន្ត្រីគយក្នុងការបោសសំអាត ឈើគ្រញូងរបស់ខ្មែរពីតាមខេត្តនានាហើយដឹកជញ្ជូនតាមកប៉ាល់ទៅកាន់កំពង់ផែក្រុងហុងកុង។ របាយការណ៍ដដែលនេះ បានបញ្ជាក់ថា ចិនបានចំណាយលុយរាប់លានដុល្លារសហរដ្ឋអាមេរិក ទៅក្នុងទីផ្សារងងឹត ដើម្បីធ្វើពាណិជ្ជកម្មឈើគ្រញូងពីកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។