ដោយសារតែមានកង្វល់ចំពោះបញ្ហាខាងលើនេះ អង្គការក្រៅរដ្ឋាភិបាលខ្លះ កំពុងព្យាយាមអប់រំ ដល់ប្រជាពលរដ្ឋឱ្យបានយល់ដឹងអំពីសារសំខាន់ និងកិច្ចការពារចំពោះបញ្ហាទាំងនេះ តាមបែបផ្សេងៗពីគ្នា។
ក្រុមកុមារប្រមាណ ៤៥០នាក់ និងអង្គការក្រៅរដ្ឋាភិបាលជាង ១០ អង្គភាពទៀត បានរួមគ្នាកាន់រូបតុក្កតាយក្សដែលធ្វើជារូបភាពសត្វច្រើនប្រភេទ ហើយដើរដង្ហែក្បួននៅតាមដងផ្លូវ និងកន្លែងដែលប្រមូលផ្ដុំភ្ញៀវទេសចរបរទេសនៅក្នុងទីក្រុងសៀមរាប កាលពីរាត្រីថ្ងៃសៅរ៍ ទី២៣ ខែកុម្ភៈ កន្លងទៅ។
ក្បួនដង្ហែនេះក្នុងគោលបំណងអប់រំកុមារ និងប្រជាពលរដ្ឋខ្មែរ ឱ្យយល់ដឹងអំពីវិធីការពារគ្រោះថ្នាក់ចរាចរណ៍ អំពីផលប្រយោជន៍នៃបរិស្ថានធម្មជាតិ និងចេះស្រឡាញ់សត្វព្រៃកម្រជាច្រើនប្រភេទដែលជិតផុតពូជនៅក្នុងប្រទេសកម្ពុជា ទៅហើយនោះ។
លោក អ៊ុន សាវ៉ាន់ គឺជាអ្នកចាត់ចែងគម្រោងតុក្កតាយក្សនោះ។ លោកបានមានប្រសាសន៍កាលពីរសៀលថ្ងៃអាទិត្យ ទី២៤ ខែកុម្ភៈ ថា ព្រឹត្តិការណ៍ដង្ហែតុក្កតាយក្សនៅតាមដងផ្លូវក្នុងខេត្តសៀមរាបនេះ គឺដើម្បីឱ្យកុមារ រួមនឹងអ្នកចូលរួមធ្វើតុក្កតា ព្រមទាំងប្រជាពលរដ្ឋជាច្រើន បានយល់ដឹងអំពីប្រធានបទមួយចំនួន ដូចជាសុវត្ថិភាពចរាចរណ៍ អនាម័យសុខភាព និងឱ្យប្រជាពលរដ្ឋខ្មែរចាប់អារម្មណ៍ទៅលើសត្វព្រៃកម្រ ដែលកំពុងទទួលរងការគំរាមកំហែងជាដើម។ ផ្នែកមួយទៀតនៃការហែក្បួនតុក្កតាយក្សនេះ គឺដើម្បីលើកកម្ពស់ការយល់ដឹងទៅលើការអភិវឌ្ឍវិស័យអប់រំ បញ្ហាបរិស្ថាន និងវប្បធម៌ខ្មែរផងដែរ។
លោក អ៊ុន សាវ៉ាន់៖ «ការផ្សព្វផ្សាយបរិស្ថាន ឬក៏ការអប់រំអ្វីមានច្រើន ក៏ប៉ុន្តែនេះគឺជាកម្មវិធីផ្សព្វផ្សាយ ឬក៏អប់រំតាមរយៈសិល្បៈ។ អ៊ីចឹងសិល្បៈហ្នឹង គឺយើងរៀបចំសិល្បៈបែបដង្ហែតុក្កតាយក្ស ហើយតុក្កតាយក្សហ្នឹងវាមានប្រវត្តិចេញមកពីអង់គ្លេស និងអូស្ត្រាលី ដែលធំជាងគេ។អ៊ីចឹងទៅក៏យើងចាប់ផ្ដើមពង្រីកឱ្យប្រជាពលរដ្ឋបានយល់អំពីសិល្បៈផង ជាមួយនឹងការអប់រំផងដែរ»។
នេះគឺជាក្បួនដង្ហែកុក្កតាយក្សដើម្បីយុទ្ធនាការអប់រំនៅតាមដងផ្លូវក្នុងប្រទេសកម្ពុជា លើកទី៧ ហើយ។
លោក ជីហ្គ (JIG) ជាអ្នកផលិតល្ខោនស្បែកដ៏ល្បីម្នាក់របស់ប្រទេសអង់គ្លេស គឺជាអ្នកដែលស្ម័គ្រចិត្តជួយបង្រៀនបច្ចេកទេសក្នុងការបង្កើតតុក្កតាយក្សទាំងនោះ។ លោកបានមានប្រសាសន៍ថា លោកធ្លាប់បានចូលរួមធ្វើតុក្កតាយក្សរបៀបនេះ នៅតាមប្រទេសជាច្រើននៅជុំវិញពិភពលោក ដូចជានៅប្រទេសអូស្ត្រាលី ប្រទេសឥណ្ឌា និងប្រទេសជាច្រើនទៀត ហើយលោកបានចាប់ផ្ដើមមកកាន់ខេត្តសៀមរាបនៃប្រទេសកម្ពុជា ដោយសារតែមានមនុស្សជាច្រើនបានសុំឱ្យលោកមកជួយ។
លោក ជីហ្គ៖ «មានអ្នកទេសចរណ៍ជាច្រើនជាតិសាសន៍ នៅក្នុងទីក្រុងសៀមរាប បានឃើញតុក្កតាយក្សទាំងនេះ ហើយវាបានធ្វើឱ្យពួកគេចាត់ទុកជាការកម្សាន្តសប្បាយមួយផ្នែក។ ក៏ប៉ុន្តែអ្វីដែលយើងធ្វើនោះ គឺវាជាផ្នែកមួយដើម្បីលើកទឹកចិត្តជនកម្ពុជា ឱ្យគាំទ្រនូវវិស័យសិល្បៈនៅលើទឹកដីដ៏ចំណាស់មួយនេះ។ កម្ពុជាគឺជាប្រទេសតូចមួយ ហើយសាលាបណ្ដុះបណ្ដាលផ្នែកសិល្បៈបែបនេះ ក៏មិនសូវមានទេ ដូច្នេះយើងកំពុងបង្រៀនដល់កុមារជាច្រើននៅសាលាហ្វាពន្លឺសិល្បៈ ដែលនៅឯខេត្តបាត់ដំបង»។
អ្នកចាត់ចែងគម្រោងបានឱ្យដឹងថា ក្បួនដង្ហែតុក្កតាយក្សនៅខេត្តសៀមរាបនេះ វាមិនមែនគ្រាន់តែជាព្រឹត្តិការណ៍នៅប្រទេសកម្ពុជា ប៉ុណ្ណោះទេ គឺវាជាព្រឹត្តិការណ៍ដង្ហែដ៏ធំជាងគេនៅក្នុងតំបន់អាស៊ីអាគ្នេយ៍ទាំងមូល ហើយវាក៏បានក្លាយទៅជាព្រឹត្តិការណ៍ប្រចាំឆ្នាំ ដើម្បីទាក់ទាញអ្នកទេសចរបរទេសឱ្យចូលមកទស្សនាខេត្តសៀមរាប ដែលជាទឹកដីសំបូរប្រាសាទបូរាណផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។