មនុស្សជាង ៥ពាន់នាក់ជួបជុំគ្នាប្រារព្ធមីទីងផ្សព្វផ្សាយបំផុសចលនាទីក្រុងស្អាត និងនាំគ្នារើសសំរាមនៅក្រុងបានលុង ខេត្តរតនគិរី។ អ្នកចូលរួមលើកឡើងថា កម្មវិធីមានគោលបំណងបំផុសសកម្មភាពរក្សាអនាម័យ និងការវេចខ្ចប់សំរាមបានល្អ អនុវត្តពាក្យស្លោកទីក្រុងស្អាត គ្មានសំរាម។
សិស្សានុសិស្ស និស្សិត និងមន្ត្រីរាជការកងប្រដាប់អាវុធបានបើកយុទ្ធនាការរើសសំរាមសំអាតអនាម័យបរិស្ថាននៅតាមបណ្ដាផ្លូវនានា ក្នុងក្រុងបានលុង សម្រាប់ចូលរួមបុណ្យមាឃបូជាដែលប្រព្រឹត្តទៅនៅថ្ងៃទី១១ ខែកុម្ភៈ នេះ។
អភិបាលក្រុងបានលុង លោក ងិន ណែល ដែលដឹកនាំយុទ្ធនាការនេះថ្លែងថា សិស្សបឋមសិក្សា សិស្សអនុវិទ្យាល័យ និងវិទ្យាល័យចំនួន១០ រួមទាំងមន្ត្រីរាជការមន្ទីរពាក់ព័ន្ធប្រមាណ ៥ពាន់នាក់ ស្ម័គ្រចិត្តចូលរួមពិធីនេះដើម្បីបំផុសស្មារតីប្រជាពលរដ្ឋរួមគ្នាសំអាតសំរាមឲ្យបានល្អ។ លោកថា នេះជាគំរូសម្រាប់បណ្ដុះគំនិតឲ្យពលរដ្ឋឲ្យស្រឡាញ់បរិស្ថាន និងសុខភាពអនាម័យក្នុងក្រុង។
កាលពីឆ្នាំ២០១៦ អាជ្ញាធរខេត្តរតនគិរី បានដឹកនាំយុទ្ធនាការរើសសំរាមជាច្រើនលើកចូលរួមទិវាជាតិទីក្រុងស្អាតលើកទី៤ និងទិវាជាតិយុវជន និងទីក្រុងស្អាតលើកទី១ នៅក្រុងបានលុង និងរើសសំរាមនៅជុំវិញមាត់បឹងកន្សែង តំបន់ទេសចរណ៍កណ្ដាលក្រុងបានលុង។
យុវនារីសិស្សអនុវិទ្យាល័យឡាបានសៀក កញ្ញា ចាយ ស្រីដែន ចាត់ទុកការសំអាតសំរាម គឺជាតួនាទីរបស់ពលរដ្ឋទាំងអស់គ្នាដែលត្រូវនាំគ្នាយកចិត្តទុកដាក់បំបាត់កាកសំណល់ និងសំរាមនៅគ្រប់ទីកន្លែង។
កញ្ញាកត់សំគាល់ថា បច្ចុប្បន្នសំរាមត្រូវបានប្រជាពលរដ្ឋបោះចោលដោយគ្មានការទទួលខុសត្រូវ និងបង្កផលប៉ះពាល់ដល់សុខភាព និងអនាម័យ ហេតុនេះសំរាមគឺជាប្រធានបទសំខាន់ដែលប្រជាពលរដ្ឋទាំងអស់ត្រូវនាំគ្នាកែប្រែទម្លាប់វេចខ្ចប់ ឬដាក់សំរាមក្នុងធុងដើម្បីទីក្រុងស្អាតមានអនាម័យល្អ៖ «នេះជាទីខេត្តយើងទឹកដីយើង យើងត្រូវតែសំអាតសំរាមឲ្យអស់ពីដី»។
នៅខេត្តរតនគិរី តួលេខប៉ាន់ប្រមាណរបស់មន្ទីរបរិស្ថានខេត្តរតនគិរី បង្ហាញថា យ៉ាងហោច ប្រជាពលរដ្ឋក្រុងបានលុង បញ្ចេញចោលកាកសំណល់ និងសំរាមជាង ៥០តោនក្នុងមួយថ្ងៃៗ។
គ្រូបង្រៀនអនុវិទ្យាល័យ ឡាបានសៀក លោក ប៉ុន គន្ធា ចាត់ទុកការផ្សព្វផ្សាយទិវាទីក្រុងស្អាត និងយុទ្ធនាការរើសសំរាមនៅតាមទីសាធារណៈ ថាគឺជាការដាស់ស្មារតីប្រជាពលរដ្ឋអ្នកលក់ដូរ និងអាជីវករនៅតាមទីផ្សារផ្ទះលក់ទំនិញឲ្យយកចិត្តទុកដាក់សំអាតលំនៅឋាន កន្លែងលក់ដូរ និងចូលរួមថែរក្សាទីសាធារណៈ កុំឲ្យមានសំរាមបន្សល់ចោលដូចមុនទៀត។ លើសពីនេះទៀត លោកអំពាវនាវសុំឲ្យប្រជាពលរដ្ឋ និងមន្ត្រីរាជការចូលរួមទាំងអស់គ្នាដើម្បីទីក្រុងស្អាត៖ «ខ្ញុំមានអារម្មណ៍ថា ល្អ ព្រោះយើងនាំគ្នាសំអាតក្រុងយើងឲ្យមានបរិស្ថានមើលទៅស្អាត។ ខ្ញុំអំពាវនាវលើកក្រោយសុំឲ្យចូលរួមទាំងអស់គ្នា»។
ក្រុងបានលុង ខេត្តរតនគិរី បានទទួលចំណាត់ថ្នាក់ផ្ការំដួលមួយទង ដែលជាចំណាត់ថ្នាក់ទីបីក្នុងការប្រឡងប្រណាំងទីក្រុងស្អាតទូទាំងប្រទេសរបស់ក្រសួងទេសចរណ៍ កាលពីឆ្នាំ២០១៤។
យុទ្ធនាការរើសសំរាមដើមឆ្នាំ២០១៧ នេះ គឺសង្កត់ធ្ងន់ទៅការអនុវត្តពាក្យស្លាកទីក្រុងស្អាតគ្មានសំរាម ផ្សព្វផ្សាយឲ្យប្រជាពលរដ្ឋចូលរួមធ្វើអនាម័យ បំផុសគំនិតប្រឡងប្រណាំងទីក្រុងស្អាត រៀបចំអនាម័យចូលរួមបុណ្យមាឃបូជា និងបុណ្យចូលឆ្នាំខ្មែរ និងបំផុសចលនាត្រៀមខ្លួនការពារអគ្គីភ័យនៅរដូវប្រាំងខាងមុខនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។