ប្រជាពលរដ្ឋជាច្រើនរយគ្រួសារ នៅស្រុករលាប្អៀរ ខេត្តកំពង់ឆ្នាំង គ្រោងជួបពិភាក្សាដោះស្រាយពីភាពខ្វែងគំនិតគ្នា ជុំវិញគម្រោងផលិតទឹកស្អាតក្នុងបឹងឈ្វាំង ស្ថិតនៅឃុំរលាប្អៀរ នៅព្រឹកថ្ងៃទី៣ ខែមេសា។ កិច្ចពិភាក្សានេះ នឹងមានការជជែកដេញដោលគ្នា និងលើកពីហេតុផលផ្សេងៗរវាងប្រជាពលរដ្ឋគាំទ្រ និងប្រជាពលរដ្ឋមិនគាំទ្រគម្រោងផលិតទឹកស្អាតនេះ។
បន្ទាប់ពីមានប្រជាពលរដ្ឋរស់នៅភូមិព្រៃខ្មែរ ប្រមាណជា ១០០នាក់ បានប្រតិកម្ម និងបដិសេធមិនទទួលយកគម្រោងផលិតទឹកស្អាត ដែលចំណាយទឹកប្រាក់ជាង ៥ម៉ឺនដុល្លាររបស់អង្គការក្រៅរដ្ឋាភិបាលមួយឈ្មោះ លោកខាងលិចជួយលោកខាងកើត (EMW) រួចមក មន្ត្រីសមាគមអាដហុក (Adhoc) បានចាប់យកការសម្របសម្រួលក្នុងរឿងដ៏ចម្រូងចម្រាសនេះ។
មន្ត្រីសម្របសម្រួលនៃសមាគមអាដហុក ប្រចាំខេត្តកំពង់ឆ្នាំង លោក សំ ច័ន្ទគា បញ្ជាក់នៅថ្ងៃទី២ ខែមេសា ថា យុទ្ធសាស្ត្រនៃការដោះស្រាយក្នុងរឿងខ្វែងគំនិតគ្នានេះ លោកនឹងលើកយកគោលការណ៍សម្រុះសម្រួល ដោយធ្វើប្រជាមតិ និងអាចឈានដល់ការបោះឆ្នោតជ្រើសរើសតំណាងសហគមន៍ចំនួន ៥រូប ដើម្បីគ្រប់គ្រងគម្រោងទឹកស្អាតនេះដោយសហគមន៍ផ្ទាល់ ក្នុងករណីដែលមតិភាគច្រើនគាំទ្រ៖ «យើងក៏មិនចោលចំពោះអ្នកដែលជំទាស់ដែរ យើងត្រូវឲ្យគាត់បញ្ចេញទស្សនៈ ឬលក្ខន្តិកៈ ដើម្បីយើងដាក់បញ្ចូលទៅក្នុងលក្ខន្តិកៈនៃការគ្រប់គ្រងសហគមន៍ទឹកឈ្វាំង នេះឯង»។
ក្រុមប្រជាពលរដ្ឋសុទ្ធតែអះអាងថា ខ្លួនចង់បានទឹកស្អាតមកប្រើប្រាស់ដូចៗគ្នា ប៉ុន្តែពួកគាត់ភាគច្រើនមិនចង់ឲ្យបូមទឹកពីក្នុងផ្ទៃអាងឈ្វាំង មកផលិតនោះទេ ដោយសារតែខ្លាចទឹកអាងរីង និងធ្វើឲ្យប៉ះពាល់ដល់ការស្រោចស្រពដីស្រែកសិកម្មរាប់រយហិកតារនៅឃុំចំនួន៣ គឺឃុំគោកបន្ទាយ រលាប្អៀរ និងឃុំអណ្ដូងស្នាយ។ ប៉ុន្តែ អាជ្ញាធរអះអាងថា គម្រោងនេះនឹងមិនអាចធ្វើប៉ះពាល់ដល់ការស្រោចស្រពដីស្រែកសិកម្មពលរដ្ឋឡើយ ពីព្រោះអាងឈ្វាំង គឺជាប្រភពទឹកចេញពីក្រោមដី និងអាចបើកបិទនៅពេលណាក៏បាន ប្រសិនបើសហគមន៍ត្រូវការទឹកដើម្បីធ្វើស្រែ។
ប្រជាពលរដ្ឋមិនគាំទ្រគម្រោងទឹកស្អាតនេះ លោក សោម ស៊ីណៃ មានប្រសាសន៍ថា បច្ចុប្បន្នមានប្រជាពលរដ្ឋផ្ដិតស្នាមមេដៃមិនគាំទ្រចំនួន ៥៧០នាក់ ស្នើនឹង ៤៥០គ្រួសារ ក្នុងចំណោមគ្រួសារសរុបនៃភូមិព្រៃខ្មែរ ទាំងមូលជាង ៦០០គ្រួសារ។ លោកថា ក្នុងករណីដែលគម្រោងនេះនៅតែដំណើរការនោះ ប្រជាពលរដ្ឋមានលក្ខខណ្ឌចំនួន ៥ចំណុច គឺទី១ ត្រូវបង្ហូរទឹកដាក់ស្រែពលរដ្ឋឲ្យបានគ្រប់គ្រាន់តាមតម្រូវការ។ ទី២ ត្រូវតែមានប្រាក់ឧបត្ថម្ភគណៈកម្មការគ្រប់គ្រងទឹកស្អាតនោះ។ ទី៣ ថវិកាដែលបានមកពីការលក់ទឹកត្រូវកាន់កាប់ដោយប្រធានសហគមន៍។ ទី៤ ត្រូវអភិវឌ្ឍ ឬតភ្ជាប់បណ្ដាញទុយយោមេឲ្យអ្នកភូមិនៅតំបន់ភ្នំដើមផ្កា បានប្រើប្រាស់ទឹកមុនគេ និងទី៥ តំណាងអង្គការផលិតទឹកស្អាត និងអាជ្ញាធរ ត្រូវតែធ្វើកិច្ចសន្យាជាមួយប្រជាពលរដ្ឋរាល់លក្ខខណ្ឌទាំងអស់ ដែលបានលើកឡើង រួចតម្កល់ទុកនៅសាលាឃុំ រហូតដល់ថ្នាក់ខេត្ត៖ «ប្រធានភូមិក៏គេប្រាប់ឲ្យហៅ យើងក៏ហៅសមាជិកយើងដែលផ្ដិតមេដៃទៅចូលរួមទាំងអស់គ្នា។ ពិភាក្សាបានមួយចំនួនហើយ គាត់ថា ប្រសិនបើគេជោគជ័យ គេឈ្នះយើងឲ្យប្រាំចំណុចហ្នឹង បើគេទទួលយកបាន ឲ្យគេធ្វើចុះ បើគេទទួលយកមិនបានទេសុំដកគម្រោងចេញ»។
វិទ្យុអាស៊ីសេរី មិនអាចទាក់ទងអភិបាលស្រុករលាប្អៀរ លោក ឈឹម វុទ្ធា ដើម្បីសុំការអត្ថាធិប្បាយជុំវិញបញ្ហានេះបានទេ នៅថ្ងៃទី២ ខែមេសា។
យ៉ាងណា នាយកប្រចាំប្រទេសកម្ពុជា នៃអង្គការលោកខាងលិចជួយលោកខាងកើត លោក គឹម ហ៊ ថ្លែងថា រាល់លក្ខខណ្ឌដែលប្រជាពលរដ្ឋបានលើកឡើងនេះ គឺស្របទៅនឹងអ្វីដែលខាងអង្គការចង់បានដែរ៖ «មិនមានបញ្ហាអ្វីទេ គឺយល់ព្រមទាំងអស់ ហើយអ្នកផ្ដល់ជំនួយមកថ្ងៃមុនមកពីអាមេរិក ហ្នឹង បានទៅមើលជាមួយខ្ញុំឃើញថា គឺមានលទ្ធភាពតបាន ៥០០គ្រួសារ តែគាត់ថាឥឡូវត ២៥០ហ្នឹងសិន បន្ទាប់ពីតហើយ គាត់នឹងថែមលុយប្រហែល ២ម៉ឺន ទៅ ២ម៉ឺន ៥ពាន់ដុល្លារភ្ជាប់បណ្ដាញឲ្យ ២៥០គ្រួសារទៀតឲ្យបានគ្រប់ ៥០០»។
កន្លងមក ក្រុមប្រជាពលរដ្ឋបានស្ដីបន្ទោសអាជ្ញាធរថា មិនដែលផ្សព្វផ្សាយព័ត៌មានជុំវិញគម្រោងនេះដល់ប្រជាពលរដ្ឋបានដឹងឡើយ។ លុះដល់កសាងស្ថានីយផលិតទឹកស្អាតចេញជារូបរាង ទើបហៅប្រជាពលរដ្ឋទៅប្រជុំ និងជំរុញឲ្យពួកគាត់ទទួលយកគម្រោងនោះ។ ការជួបពិភាក្សាដោះស្រាយភាពចម្រូងចម្រាសគ្នានេះ នឹងធ្វើនៅក្នុងបរិវេណវត្តត្រពាំងស្នោ ស្ថិតនៅស្រុករលាប្អៀរ ខេត្តកំពង់ឆ្នាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។