ក្រោយភ្លៀងធ្លាក់មួយមេធំកាលពីរសៀលថ្ងៃ៣១ ខែកក្កដា មក សំរាមបានហូរកកចូលទៅក្នុងប្រឡាយមួយចំនួនដែលជាផ្លូវរំដោះទឹកចេញពីទីក្រុងភ្នំពេញ។ មន្ត្រីសាលារាជធានីភ្នំពេញ ទទួលស្គាល់ថា មានកង្វះខាតក្នុងការថែទាំប្រឡាយ ព្រោះកំពុងកសាងហេដ្ឋារចនាសម្ព័ន្ធលូ និងផ្លូវជាតិមួយចំនួនទៀត ទើបនាំឲ្យសំរាមកកស្ទះតាមទ្វារទឹកក្នុងប្រឡាយបង្ហូរទឹកចេញខ្លះនោះ។
អាជ្ញាធរពាក់ព័ន្ធកំពុងចាត់វិធានការសំអាតប្រព័ន្ធលូបង្ហូរទឹកក្នុងតំបន់ដែលសំរាមរាំងស្ទះដល់ផ្លូវបង្ហូរទឹក ដែលបានបង្កឲ្យមានជំនន់ទឹកភ្លៀងក្នុងរាជធានីភ្នំពេញ។ តំបន់ទាំងនោះក៏មានប្រឡាយបឹងសាឡាង ដែលហូរក្រោមស្ពានអាកាសស្ទឹងមានជ័យ ទៅកាន់ប្រឡាយបឹងទំពុនមួយដែរ។
បញ្ហាសំរាមនេះត្រូវបានអភិបាលខណ្ឌទួលគោក លោក ឯក ស៊ុនឌឿន ថ្លែងថា មន្ត្រីសាធារណការបានចុះពិនិត្យ ដើម្បីកាយសំអាតសំរាមក្នុងប្រឡាយនៅក្រោមស្ពានអាកាសស្ទឹងមានជ័យហើយ៖ «ក្រោយភ្លៀង គាត់បានរៀបចំក្រុមការងារចុះសំអាត ព្រោះអីវាមានទាំងសំរាម មានទាំងកំណកភក់ច្រើនដែលស្ទះមុខទឹក ហើយព្រឹកមិញក្រុមការងារបានចុះទៅពិនិត្យ និងសំអាតកន្លែងស្ថានីយបូមទឹកស្ពានអាកាសស្ទឹងមានជ័យ អាផ្លូវក្រោមដីហ្នឹង វាមានកំណកដីច្រើនដែលបានសំអាតហើយ យើងនឹងបន្តសហការជាមួយមន្ទីរសាធារណការសម្រាប់ការសំអាតសំរាម ដែលនៅកកស្ទះមុខទ្វារទឹក»។
លោកថ្លែងយ៉ាងដូច្នេះ បន្ទាប់ពីមានអ្នកដំណើរឆ្លងកាត់ស្ពានអាកាសស្ទឹងមានជ័យ រិះគន់ថា កំណកស្នោ និងប្លាស្ទិក បានកកនៅក្នុងប្រឡាយបឹងសាឡាង ក្រោមស្ពានអាកាសស្ទឹងមានជ័យ ត្រៀបត្រា នាំឲ្យស្ទះទ្វារទឹក មិនអាចឲ្យទឹកហូរលឿនចេញក្រៅ។
ចៅសង្កាត់រងទី២ នៅសង្កាត់បឹងសាឡាង លោក ថៃ សារៈមុន្នី ឲ្យដឹងថា សំរាមនៅក្នុងប្រឡាយបឹងសាឡាង ដែលមានច្រើនធ្វើឲ្យកកស្ទះដល់ទ្វារទឹក មិនអាចហូរបានលឿននៅក្រោមស្ពានអាកាសស្ទឹងមានជ័យនេះ មកពីប្រឡាយបឹងសាឡាង ជាកន្លែងប្រមូលផ្តុំលូទឹកស្អុយ បង្ហូរពីខណ្ឌផ្សេងៗ ទម្លាក់ទាំងសំរាម និងទឹកកខ្វក់ចូលមកក្នុងប្រឡាយនេះ។ លោកបន្តថា ក្រៅពីសំរាមបង្ហូរតាមលូផ្សេងៗ មកប្រឡាយ ក៏មានប្រជាពលរដ្ឋរស់នៅក្នុងសំណង់មិនរៀបរយ និងផ្ទះជួលអមសងខាងប្រឡាយបឹងសាឡាង មិនចេះទុកដាក់សំរាម បណ្ដោយឲ្យសំបកស្នោដែលប្រើប្រាស់រួចដូចជាចានស្នោ ថង់ប្លាស្ទិក ជាដើម ធ្លាក់ចូលពាសពេញប្រឡាយ។
បន្ថែមលើនោះ ក្រុមប្រឹក្សាខណ្ឌទួលគោក លោក ចេប គឹមអាន ថ្លែងថា មុនបោះឆ្នោតឆ្នាំ២០១៣ អង្គការចៃកា (JICA) បានផ្ដល់ថវិកាឲ្យថែទាំប្រឡាយ។ ថវិកានោះ មន្ត្រីសាលាខណ្ឌទួលគោក បានជួលកម្មករជិះទូកស្រង់សំរាមយកចេញពីប្រឡាយបឹងសាឡាងនេះជារៀងរាល់ខែ។ ប៉ុន្តែថវិកានោះ ទំនងជាមិនបន្តជំនួយទៀត ទើបសកម្មភាពកាយយកសំរាមចេញពីក្នុងទឹក ហាក់ដូចរយាល នាប៉ុន្មានខែចុងក្រោយនេះ។
លោកថា កាលពីចុងឆ្នាំ២០១៤ មន្ទីរសាធារណការ បានស្តារល្បប់ចេញពីប្រឡាយបឹងសាឡាង ទៅដល់ប្រឡាយបឹងទំពុន។ ប៉ុន្តែបញ្ហាសំរាម គឺមានមិនចេះអស់ទេ បើមនុស្សគ្មានការអប់រំកុំឲ្យបោះសំរាមទម្លាក់ចូលក្នុងទឹកនោះ៖ «ព្រោះការងារនេះ ខាងខ្ញុំជាក្រុមប្រឹក្សា ក៏បានអនុម័តនូវកម្មវិធីសម្រាប់ការពារ និងស្តារប្រឡាយហ្នឹងជាប្រចាំ ព្រោះអីជារដូវភ្លៀង»។
ដើម្បីដោះស្រាយបញ្ហាសំរាមដែលបង្កដល់ការស្ទះទឹក មិនអាចហូរលឿនចេញពីផ្លូវនានាក្នុងក្រុងភ្នំពេញ មន្ត្រីនាំពាក្យសាលារាជធានីភ្នំពេញ លោក ឡុង ឌីម៉ង់ ថ្លែងថា ទឹកភ្លៀងលិចទីក្រុងឆ្នាំនេះតិចជាងឆ្នាំមុន។ លោកថា ទឹកលិចទីក្រុងបច្ចុប្បន្ននេះ ដោយសារការកសាងប្រព័ន្ធលូ មិនទាន់ចប់រួចរាល់៖ «ឆ្នាំនេះយើងទទួលស្គាល់ថា វាមានការលិចមែន យើងកំពុងតែដាក់លូប្រភេទធំជាងមុន។ ក្នុងឆ្នាំនេះ ការដ្ឋានដែលយើងធ្វើជាមធ្យម ៤០ ទៅ ៥០ ការដ្ឋានក្នុង១ថ្ងៃ វាបានជួយច្រើន ទោះបីជានៅមានការលិចលង់ ក៏ប៉ុន្តែក្នុងរយៈពេលនៃការលិចលង់នេះ ក៏វាតិចជាងឆ្នាំទៅដែរ»។
កាលពីរសៀលថ្ងៃទី៣១ ខែកក្កដា ភ្លៀងធ្លាក់ប្រមាណ ២ម៉ោង ធ្វើឲ្យផ្លូវក្នុងទីក្រុងភ្នំពេញ លិចទឹកបង្កឲ្យមានការកកស្ទះចរាចរណ៍ច្រើនម៉ោងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។