ក្នុងបំណងទប់ស្កាត់ការបាត់បង់ព្រៃលិចទឹកក្នុងខេត្តពោធិ៍សាត់ អង្គការក្រៅរដ្ឋាភិបាលមួយឈ្មោះ "សម្ព័ន្ធប្រជានេសាទកម្ពុជា" បានសហការជាមួយអាជ្ញាធរដែនដី និងអាជ្ញាធរជំនាញ កោះហៅអ្នកភូមិដែលពាក់ព័ន្ធក្នុងការកាប់រានព្រៃលិចទឹកទាំងនោះមកធ្វើការអប់រំ និងព្រមានឲ្យឈប់ដាំដុះលើដីដែលអ្នកភូមិបានកាប់រានរួចហើយនោះ។
តើប្រជាពលរដ្ឋប្រតិកម្មយ៉ាងណាចំពោះវិធានការនេះ?
សម្ព័ន្ធប្រជានេសាទកម្ពុជា ដោយមានកិច្ចសហការជាមួយក្រុមចម្រុះរបស់អាជ្ញាធរខេត្ត បានចុះទៅដល់ភូមិដាច់ស្រយាលមួយ ដើម្បីធ្វើការអប់រំប្រជាពលរដ្ឋដែលពាក់ព័ន្ធក្នុងសកម្មភាពកាប់រានព្រៃលិចទឹកក្នុងតំបន់៣ នៃខេត្តពោធិ៍សាត់ នាពេលកន្លងទៅ។
លោក ឡុង សុចែត ប្រធានសម្ព័ន្ធប្រជានេសាទកម្ពុជា បានឲ្យដឹងនៅព្រឹកថ្ងៃទី៣០ ខែមេសា ថា បន្ទាប់ពីអង្គការបានរកឃើញការបាត់បង់ព្រៃលិចទឹកដ៏ធំធេងមួយកន្លែង ស្ថិតក្នុងភូមិសាស្ត្រឃុំកញ្ជរ និងបន្ទាប់ពីការពិភាក្សាគ្នាយ៉ាងល្អិតល្អន់ជាមួយអាជ្ញាធរគ្រប់លំដាប់ថ្នាក់ ក្នុងការរកមធ្យោបាយទប់ស្កាត់។ ទីបំផុត ក្រុមចម្រុះរបស់អាជ្ញាធរខេត្តមួយក្រុមដែលមានអាជ្ញាធរស្រុកកណ្ដៀង អាជ្ញាធរជំនាញជលផលខេត្ត និងអាជ្ញាធរភូមិ ឃុំ បានសម្រេចកោះហៅប្រជាពលរដ្ឋដែលជាប់ពាក់ព័ន្ធក្នុងការកាប់រានព្រៃលិចទឹកនៅចំណុចឫស្សីមួយរយគុម្ព មកធ្វើការអប់រំណែនាំ និងហាមធ្វើការដាំដុះលើដីដែលបានកាប់រានរួចហើយនោះ៖ «គោលបំណងដែលយើងបានជួបជុំនេះ គឺដើម្បីបង្ហាញពួកគាត់ពីអនុក្រឹត្យលេខ១៩៧ ដែលនិយាយអំពីការការពារព្រៃលិចទឹក។ ហើយមួយទៀត ចង់ឲ្យបណ្ដាអ្នកពាក់ព័ន្ធ និងមន្ត្រីជំនាញបានមកជួបជជែកគ្នាដើម្បីឲ្យយល់ពីគ្នាទៅវិញទៅមកអំពីហេតុផលដែលនាំទៅដល់ការកាប់ព្រៃលិចទឹកនេះ»។
សម្ព័ន្ធប្រជានេសាទកម្ពុជា ដោយមានការគាំទ្រផ្នែកថវិកាពីសម្ព័ន្ធភាពដើម្បីអភិរក្សធនធានជលផល ឬហៅថាអង្គការហ្វ៊ែក (FACT) បានធ្វើសកម្មភាពយ៉ាងខ្លាំងក្លាក្នុងការទប់ស្កាត់ការកាប់រានព្រៃលិចទឹក ដើម្បីធ្វើកម្មសិទ្ធិនៅជុំវិញបឹងទន្លេសាប។
នាយខណ្ឌរដ្ឋបាលជលផលខេត្តពោធិ៍សាត់ លោក ភុំ វិមល ថ្លែងថា ការបាត់បង់ព្រៃលិចទឹកនាំទៅដល់ការខូចខាតបរិស្ថាន ដែលជាគ្រោះមហន្តរាយដ៏ធំធេងចាំបាច់ត្រូវតែធ្វើការទប់ស្កាត់បន្ទាន់។ លោកសំណូមពរឲ្យប្រជាពលរដ្ឋទាំងអស់បញ្ឈប់ជាបន្ទាន់ការកាប់រានព្រៃលិចទឹកជុំវិញបឹងទន្លេសាប ដែលក្នុងនោះមានខេត្តពោធិ៍សាត់ ផងដែរ៖ «ខ្ញុំសុំអធ្យាស្រ័យ ដីតំបន់៣ នេះ រាជរដ្ឋាភិបាលបានហាមដាច់ខាត។ ពូនៅចាំទេ កាលពីឆ្នាំ២០១១ នៅឯសាលាកសិកម្មចម្ការដូង សម្ដេចនាយករដ្ឋមន្ត្រីបានមានប្រសាសន៍ថា បើទោះបីជាក្នុងដីព្រៃលិចទឹកមួយហិកតារ ទទួលផល ៥០តោន ក៏លោកមិនដូរដែរ ពោលគឺត្រូវរក្សាទុកព្រៃលិចទឹក»។
យ៉ាងនេះក្ដី ប្រជាពលរដ្ឋដែលកំពុងរស់នៅក្នុងតំបន់ព្រៃលិចទឹក ឬហៅថាតំបន់៣ បានសម្ដែងពីក្ដីកង្វល់ចំពោះការហាមឃាត់របស់អាជ្ញាធរ។ តំណាងជនជាតិចាម និងជាហាកឹមនៃវិហារឥស្លាមទួលទទឹង គឺលោក សា ភួង ថ្លែងថា ការកើនឡើងនៃប្រជាពលរដ្ឋទាមទារឲ្យមានការពង្រីកដីស្រែ បើពុំនោះទេ ពួកគេនឹងជួបការខ្វះខាតអង្ករហូបក្នុងជីវភាពប្រចាំថ្ងៃ៖ «ខ្ញុំសូមអធ្យាស្រ័យដែរថា ដីនេះគឺពួកខ្ញុំធ្លាប់ធ្វើតាំងពីសង្គមចាស់មកម្ល៉េះ។ ម្យ៉ាងនេះ គឺមកពីប្រជាពលរដ្ឋមានការខ្វះខាតអង្ករហូប ទើបនាំគ្នាកាប់រានព្រៃនេះធ្វើស្រែ។ ឥឡូវ ពួកខ្ញុំសុំធ្វើស្រែលើដីដែលបានរានរួច បើមិនដូច្នេះទេ គឺពួកខ្ញុំខ្វះហូបហើយ»។
ប្រភពពីអាជ្ញាធរ បានឲ្យដឹងថា កាលពីឆ្នាំ២០០៧ ប្រជាពលរដ្ឋជាជនជាតិចាម ៧៩គ្រួសារ បានមករស់នៅ និងកាន់កាប់ដីចំនួន ៨៥ហិកតារ ក្នុងតំបន់៣ ចំណុចឫស្សីមួយរយគុម្ព ស្ថិតក្នុងឃុំកញ្ជរ ស្រុកកណ្ដៀង។ បច្ចុប្បន្ន ប្រជាពលរដ្ឋជាជនជាតិចាម នៅតំបន់នេះបានកើនឡើងដល់ ១៨២គ្រួសារ និងបាននាំគ្នាកាប់រានដោយប្រើម៉ាស៊ីនគោយន្តឈូសឆាយព្រៃលិចទឹកនៅតំបន់នេះ ២៩៩,០៣ហិកតារ ហើយការឈូសឆាយនេះច្រើនធ្វើសកម្មភាពនៅពេលយប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។