នៅក្នុងប្រទេសកម្ពុជា ដែលជួយការពារស្រទាប់អូហ្សូន ក្នុងពេលពិភពលោកកំពុងតែផ្លាស់ប្ដូរអាកាសធាតុ នាំឲ្យផែនដីឡើងកម្ដៅ។ ក៏ប៉ុន្តែ ព្រៃឡង់បច្ចុប្បន្នកំពុងតែរងនូវការកាប់បំផ្លាញព្រៃឈើ និងទន្ទ្រានយកដីកាន់កាប់ពីក្រុមហ៊ុនឯកជន និងកាប់ព្រៃឈើលក់យ៉ាងអនាធិបតេយ្យ។
ក្រុមសហគមន៍ការពារព្រៃឈើ មិនអាចទប់ស្កាត់បទល្មើសព្រៃឈើនៅទីនោះបាន ក៏នាំគ្នាស្វែងរកអន្តរាគមន៍ពីមន្ត្រីរាជរដ្ឋាភិបាល និងក្រសួងពាក់ព័ន្ធនានា។
ក្រុមសហគមន៍ការពារព្រៃឡង់ច្រើនខេត្ត ថ្លែងអបអរសាទរប្រសាសន៍របស់ប្រធានរដ្ឋបាលព្រៃឈើ ដែលសន្យាពង្រឹងការសហការជាមួយសហគមន៍ ក្នុងការចាប់ឈើ និងចាប់ជនខិលខូច ដើម្បីការពារព្រៃឡង់។
តំណាងសហគមន៍ព្រៃឡង់ ខេត្តព្រះវិហារ លោក ស្វាយ ភឿន ថ្លែងថា លោកពេញចិត្តចំពោះការប្រកាសរបស់ប្រធានរដ្ឋបាលព្រៃឈើ សហការជាមួយសហគមន៍ ដើម្បីចាប់អ្នកបំផ្លាញព្រៃឡង់។ លោកបន្តថា កន្លងមក លោក ឆេង គឹមស៊ុន និងលោក ជា សំណាង បានចុះទៅខេត្តព្រះវិហារ ចុះចាប់ឈើផ្ទាល់ជាមួយសហគមន៍ការពារព្រៃឡង់។ ប្រសិនបើថ្នាក់លើមិនបានចុះមកបញ្ជាទេ មន្ត្រីថ្នាក់ក្រោមក៏មិនអើពើជួយចាប់ឈើ ឬក៏ចុះទប់ស្កាត់ការបំផ្លាញព្រៃដែរ៖ «ប្រធានរដ្ឋបាលព្រៃឈើថ្នាក់កណ្ដាល លោកនឹងធ្វើសហការជាមួយបណ្ដាញព្រៃឡង់រហូត ប៉ុន្តែលោកសហការមែន ប៉ុន្តែលំដាប់ថ្នាក់ក្រោមឱវាទលោកនោះ លោកអត់ទាន់ដឹងថានរណាមួយជាអ្នកចូលដៃចូលជើងជាមួយអ្នកបំផ្លាញព្រៃឈើហ្នឹងទេ»។
កាលពីថ្ងៃទី១៩ ខែមិថុនា ឆ្នាំ២០១៤ ប្រធានរដ្ឋបាលព្រៃឈើ លោក ឆេង គឹមស៊ុន សុំឲ្យសហគមន៍ និងប្រជាពលរដ្ឋ បើជួបការបំផ្លាញព្រៃឈើ សូមទាក់ទងលោកតាមទូរស័ព្ទលេខ ០១២ ៦៧១ ២២២ ដើម្បីលោកបញ្ជាទៅមន្ត្រីនៅមូលដ្ឋាន ឲ្យសហការចុះចាប់ឈើជាមួយសហគមន៍៖ «យើងក៏កំពុងរៀបចំដំណើរការរៀបចំធ្វើអនុក្រឹត្យមួយ ដើម្បីដាក់តំបន់ព្រៃឡង់ទៅជាព្រៃការពារ»។
តំណាងសហគមន៍ព្រៃឡង់ ខេត្តកំពង់ធំ លោក គឹម ឆេង ទូរសព្ទ័ប្រាប់ពីព្រៃឡង់ក្នុងស្រុកសណ្ដាន់ មកថា គាត់កំពុងដើរល្បាតប្រទះឃើញមានរថយន្ត និងរទេះច្រើនគ្រឿង កំពុងដឹកឈើមូល និងឈើអារចេញពីទីនោះ។ លោកសូមឲ្យរដ្ឋបាលព្រៃឈើ ចុះជួយគាត់ ព្រោះមន្ត្រីនៅថ្នាក់មូលដ្ឋានមិនបានសហការបង្ក្រាបបទល្មើសនោះទេ។ លោកឲ្យដឹងថា ក្នុងស្រុកសណ្ដាន់ មានក្រុមហ៊ុន ស៊ី.អ.ស៊ី.ខេ (CRCK) របស់វៀតណាម ទទួលដីសម្បទានពីរដ្ឋាភិបាលប្រមាណជា ៩.០០០ហិកតារ បានកាប់ព្រៃដឹកគគ្រឹកគគ្រេងទៅវៀតណាម ហើយបានដាំកៅស៊ូជិតពេញដីដែរ។ ចំណែកនៅម្ខាងស្ទឹងសែន មានក្រុមហ៊ុន ទ្រី ភាព កំពុងកែច្នៃឈើ ក្រៅពីនោះ មានរោងម៉ាស៊ីនកែច្នៃឈើ អារច្រៀកឈើ ដែលមានខ្នងបង្អែកជាមន្ត្រីថ្នាក់ធំ និងអ្នកមានលុយ មកកាងរោងម៉ាស៊ីននោះ៖ «ក្នុងថ្ងៃនេះ កាប់ថែមផង ដឹកឈើ អារឈើថ្មីហ្នឹងឯង កំពុងតែបន្តបន្ទាប់»។
វិទ្យុអាស៊ីសេរី មិនអាចទាក់ទងក្រុមហ៊ុន និងរោងម៉ាស៊ីនអារឈើ ដែលសហគមន៍ចោទនោះបានទេ នៅថ្ងៃទី២០ ខែមិថុនា។
នាយកប្រតិបត្តិអង្គការការពារធនធានធម្មជាតិ លោក ឈឹម សាវុធ ថ្លែងថា រដ្ឋបាលព្រៃឈើគួរតែចូលរួមឲ្យខ្លាំងក្លា ក្នុងការជួយទប់ស្កាត់ការបំផ្លាញព្រៃឈើ ព្រោះព្រៃឡង់កំពុងតែត្រូវបានគេទន្ទ្រានដឹកយកឈើធ្វើអាជីវកម្មឆ្លងដែន ដោយរថយន្តទំនើប រថយន្តច្នៃ គោយន្ត រទេះគោ ម៉ូតូ ដឹកចេញពីព្រៃឡង់ហូរហែស្ទើរពេញ ២៤ម៉ោង ពីតំបន់ទំរីន ភ្នំជី ស្រុករវៀង ស្រុកឆែប ស្រុកសន្ទុក ស្រុកសំបូរ ឆ្ពោះទៅភ្នំពេញ ទៅវៀតណាម ជាដើម៖ «បើគាត់អត់ទៅប្រមូលខ្លួនឯងទេ គឺមន្ត្រីជំនាញក្រោមអត់ធ្វើការទេ ហើយឈើនោះ គឺបានទៅដល់ដៃឯកជនទាំងអស់។ អ៊ីចឹងការកាប់បំផ្លាញព្រៃឈើក្នុងស្រុកខ្មែរ វាជាលក្ខណៈប្រព័ន្ធទៅហើយ គឺអត់ងាយទេក្នុងការបង្ក្រាបនោះ បើសិនជារដ្ឋាភិបាលខ្លួនឯងគ្មានវិធានការ គ្មានឆន្ទៈពិតប្រាកដក្នុងការបង្ក្រាបហ្នឹង ការនិយាយរបស់គាត់ហ្នឹង គ្រាន់តែជាការដោះសាមួយទេ វាគ្មាននរណាគេជឿបន្តទេឥឡូវនេះ»។
ដោយពុំអាចមានលំនឹងក្នុងការទប់ស្កាត់សកម្មភាពបំផ្លាញព្រៃឡង់ឲ្យមានប្រសិទ្ធភាព សហគមន៍ការពារព្រៃឈើមកពីខេត្តកំពង់ធំ ព្រះវិហារ ស្ទឹងត្រែង និងខេត្តក្រចេះ រួមគ្នាធ្វើសន្និសីទកាសែត ដើម្បីឲ្យរដ្ឋាភិបាលបានដឹងរឿងនេះ និងជួយសហការ។ សន្និសីទនោះ ត្រូវបាន លោក ឆេង គឹមស៊ុន ប្រធានរដ្ឋបាលព្រៃឈើដែលជំនាញការពារព្រៃ ប្រកាសគាំទ្រ និងពង្រឹងការសហការជាមួយសហគមន៍ ដើម្បីទប់ស្កាត់បទល្មើសបំផ្លាញព្រៃឡង់ និងព្រៃឈើក្នុងប្រទេសកម្ពុជា។
ព្រៃឡង់ ត្រូវប្រជាសហគមន៍ខេត្តចំនួន៤ ដែលមានផ្ទៃដីក្បែរព្រៃនោះ អះអាងថា បានរួមគ្នាការពារព្រៃពីទំហំជាង ៦០ម៉ឺនហិកតារ មកនៅត្រឹម ៤៨ម៉ឺនហិកតារ ដែលក្រសួងកសិកម្ម ទទួលស្គាល់។ បច្ចុប្បន្ន ព្រៃ ៤៨ម៉ឺនហិកតារនោះ កំពុងរងការហែកហួរព្រៃយកដីកាន់កាប់ផង និងកាប់បំផ្លាញដើមឈើធំៗយកលក់ផង ពាយព្រៃក្នុងមួយថ្ងៃប្រមាណ ២០ហិកតារ ដែលគួរឲ្យព្រួយបារម្ភពីផលប៉ះពាល់នៃការបាត់បង់ព្រៃឈើ ដោយសារគ្មានឫសជួយទប់ដី បណ្ដាលឲ្យមានការហូរច្រោះដី នៃទឹកភ្លៀង បង្កផលប៉ះពាល់ពីដីល្បាប់ បង្កកទៅក្នុងទឹកបឹងទន្លេសាប ធ្វើឲ្យត្រីងាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។