ប្រជាសហគមន៍ការពារព្រៃឡង់ទាំងបួនខេត្ត នាំគ្នារៀបចំពិធីបុណ្យរំឭកគុណព្រៃឈើនៅក្នុងតំបន់ព្រៃការពារមួយនេះ ដែលនឹងចាប់ផ្ដើមចេញដំណើរពីថ្ងៃទី៩ កុម្ភៈ ហើយធ្វើបុណ្យកណ្ដាលព្រៃចំនួន ៤ថ្ងៃ និងត្រឡប់មកវិញនៅថ្ងៃទី១៤ កុម្ភៈ។ ការរៀបចំពិធីបុណ្យនេះ គឺដើម្បីបង្ហាញអំពីគុណតម្លៃព្រៃឈើ និងផ្សព្វផ្សាយឲ្យប្រជាពលរដ្ឋទូទៅកាន់តែយល់ច្បាស់ពីផលប្រយោជន៍ព្រៃឈើ ព្រមទាំងចូលរួមថែរក្សាធនធានមួយនេះឲ្យបានគង់វង្សសម្រាប់ក្មេងជំនាន់ក្រោយ។
ប្រជាសហគមន៍បញ្ជាក់ថា ព្រៃឈើ ពិសេសនៅក្នុងតំបន់ព្រៃឡង់ គឺផ្តល់ផលប្រយោជន៍ជាច្រើនដល់ប្រជាពលរដ្ឋ ពិសេសជនជាតិដើមភាគតិចដែលរស់ពឹងអាស្រ័យលើអនុផលធម្មជាតិ។
ផលប្រយោជន៍ទាំងនោះដូចជា រកវល្លិ ជ័រ ផ្ដៅ រកផ្សិត រកឃ្មុំ នេសាទ ដែលជាមុខរបរប្រពៃណី និងជាមុខរបរប្រចាំថ្ងៃរបស់អ្នកភូមិ។ ក្រៅពីនេះ ព្រៃឡង់ គឺជាកន្លែងមនោរម្យសម្រាប់សត្វព្រៃជាច្រើនប្រភេទកំពុងរស់នៅ និងជាផ្នែកមួយដ៏សំខាន់ដើម្បីទប់ទល់នឹងបម្រែបម្រួលអាកាសធាតុនៅពេលបច្ចុប្បន្ន។
បណ្ដាញស្នូលការពារព្រៃឡង់ខេត្តកំពង់ធំ លោក ម៉ិញ នី មានប្រសាសន៍ថា ប្រជាពលរដ្ឋនឹងចេញដំណើរដើម្បីរៀបចំបុណ្យរំឭកគុណព្រៃឈើនៅចំកណ្ដាលព្រៃឡង់ ចំណុចវាលម្រេងទន្សាយ ក្នុងទឹកដីខេត្តស្ទឹងត្រែង នៅថ្ងៃទី៩ កុម្ភៈ។ លោកបញ្ជាក់ថា កម្មវិធីបុណ្យនឹងធ្វើនៅថ្ងៃទី១០ ដល់ថ្ងៃទី១៣ កុម្ភៈ ហើយថ្ងៃទី១៤ កុម្ភៈ សហគមន៍នឹងចេញពីព្រៃមកវិញ។ សកម្មជនរូបនេះឲ្យដឹងថា កម្មវិធីបុណ្យរួមមានការសូត្រមន្តឧទ្ទិសកុសលផលបុណ្យ ដើម្បីរំឭកគុណបំណាច់ព្រៃឡង់ដែលបានផ្តល់ប្រយោជន៍ជាច្រើនដល់ប្រជាសហគមន៍ ពិសេសជនជាតិដើមភាគតិច។ ក្រៅពីនេះ មានសកម្មភាពបំបួសដើមឈើ និងមានធម្មទេសនាអំពីគុណប្រយោជន៍របស់ព្រៃឈើ ជាដើម៖ « ធ្វើហ្នឹងដើម្បីអភិរក្សព្រៃឲ្យនៅ ដើម្បីឲ្យដឹងដល់សប្បុរសជន អតិថិជនទូទាំងប្រទេសឲ្យដឹងថា ព្រៃឡង់គឺជាព្រៃរបស់យើងទាំងអស់គ្នា »។
ព្រៃឡង់ត្រូវបានរាជរដ្ឋាភិបាលសម្រេចដាក់ជាតំបន់ព្រៃជម្រកសត្វ កាលពីថ្ងៃទី៩ ខែឧសភា ឆ្នាំ២០១៦ ដោយមានទំហំផ្ទៃដីសរុបជាង ៤៣ម៉ឺនហិកតារ គ្របដណ្ដប់លើខេត្តចំនួន៤ គឺខេត្តព្រះវិហារ ខេត្តកំពង់ធំ ក្រចេះ និងខេត្តស្ទឹងត្រែង។
លោក ម៉ិញ នី បញ្ជាក់ថា គម្រោងធ្វើបុណ្យព្រៃឡង់ គឺមានមនុស្សចូលរួមប្រមាណ ២០០នាក់ ដែលមកពីខេត្តទាំងបួនជុំវិញព្រៃការពារមួយនេះ ព្រមទាំងអាជ្ញាធរពាក់ព័ន្ធផង។ លោកថាមូលហេតុប្រជាសហគមន៍នាំគ្នាប្រារព្ធពិធីបុណ្យនៅកណ្ដាលព្រៃឡង់ ព្រោះដើម្បីបង្ហាញពីសក្ដានុពលព្រៃឈើតំបន់នេះ និងបង្ហាញពីសកម្មភាពបទល្មើសមួយចំនួនដែលកំពុងកើតមាន។
ប្រធានមន្ទីរបរិស្ថានខេត្តកំពង់ធំ លោក តុប កក្កដា មានប្រសាសន៍ថា លោកគាំទ្រចំពោះការលើកឡើងរបស់ប្រជាសហគមន៍ ពីព្រោះព្រៃឈើគឺពិតជាមានសារសំខាន់ ពិសេសសម្រាប់ពលរដ្ឋរស់នៅក្បែរតំបន់ព្រៃឡង់តែម្តង។ មិនតែប៉ុណ្ណោះ លោកក៏បានបញ្ជូនមន្ត្រីរបស់ខ្លួនមួយចំនួនទៅចូលរួមក្នុងពិធីបុណ្យរំឭកគុណព្រៃឡង់ជាមួយប្រជាសហគមន៍ថែមទៀត៖ « ខ្ញុំគិតថាការងារហ្នឹងគឺជាការងារសំខាន់សម្រាប់គាត់ ។ អ៊ីចឹងការចូលរួម និងការការពារបាន គឺជាការល្អ »។
ប្រធានមន្ទីរបរិស្ថានដដែលបញ្ជាក់ថា ក្នុងភូមិសាស្ត្រខេត្តកំពង់ធំ បច្ចុប្បន្ន បទល្មើសកាប់ និងដឹកជញ្ជូនឈើនៅតំបន់ព្រៃឡង់ គឺថយចុះច្រើន។ លើសពីនេះ ក្រោយពេលមន្ត្រីជំនាញបានដាក់កម្លាំងពិសេសនៅកណ្ដាលព្រៃ ដើម្បីឃ្លាំមើលបទល្មើសកាលពីចុងខែធ្នូ ឆ្នាំ២០១៦។ ក្រោយពេលកម្លាំងពិសេសត្រូវបានបង្កើតឡើង មន្ត្រីជំនាញចាប់បានជនល្មើសចំនួនបីនាក់ បញ្ជូនទៅតុលាការធ្វើកិច្ចសន្យាឲ្យបញ្ឈប់សកម្មភាពបទល្មើសចំនួន ១២នាក់ ពិន័យអន្តរកាលចំនួន ៤ករណី ដកហូតម៉ាស៊ីនរណារយន្តចំនួន ២៤គ្រឿង និងសម្ភារមួយចំនួនទៀត។
អ្នកសម្របសម្រួលលេខាធិការដ្ឋានបណ្ដាញការពារព្រៃឡង់ទាំង ៤ខេត្ត លោក សេង សុខហេង មានប្រសាសន៍ថា ពិធីនេះ គឺជាពិធីបែបសាសនា និងជាវប្បធម៌ប្រពៃណីរបស់ប្រជាជនរស់នៅក្បែរតំបន់ព្រៃឡង់ ដែលតែងតែប្រារព្ធជារៀងរាល់ឆ្នាំ ប៉ុន្តែពិធីបុណ្យធ្វើរួមគ្នាទាំង ៤ខេត្ត គឺធ្វើឡើងជាលើកទី២ ចាប់ពីឆ្នាំ២០១៣ មក។ លោកយល់ថា ពិធីនេះនឹងអាចមានប្រសិទ្ធភាពធ្វើឲ្យពលរដ្ឋផ្សេងទៀតកាន់តែស្រឡាញ់ និងយល់ពីតម្លៃធនធានព្រៃឈើ៖ « កិច្ចខិតខំប្រឹងប្រែងរបស់ប្រជាសហគមន៍ព្រៃឡង់រយៈកាលជាច្រើនឆ្នាំមកនេះ គឺឲ្ យច្បាស់ថា ពួកគាត់ពិតជាស្រឡាញ់ព្រៃឈើ ហើយព្រៃឈើនៅតំបន់ព្រៃឡង់ គឺពិតជាសំខាន់សម្រាប់ពួកគាត់ »។
លោក សេង សុខហេង ថាពិធីបុណ្យបែបសាសនានេះ គឺជាយុទ្ធនាការបែបអហិង្សាផ្សព្វផ្សាយឲ្យមានការចូលរួម និងគាំទ្រដល់សកម្មភាពការពារព្រៃឈើតំបន់ព្រៃឡង់។ លោករំពឹងថា ប្រជាពលរដ្ឋ ព្រមទាំងរាជរដ្ឋាភិបាល នឹងបានយល់កាន់តែច្បាស់ពីសារសំខាន់របស់ព្រៃឈើ ដើម្បីធានានិរន្តរភាពសម្រាប់ប្រជាសហគមន៍ផ្ទាល់ និងមនុស្សជំនាន់ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។