ប្រជាសហគមន៍ព្រៃឡង់ខេត្តកំពង់ធំ បានចុះល្បាតព្រៃឡង់ ៤ថ្ងៃ ហើយរកឃើញបទល្មើសកាប់បំផ្លាញព្រៃឈើ រួមនឹងឧបករណ៍មួយចំនួនផង។ ប្រជាសហគមន៍អះអាងថា បទល្មើសព្រៃឈើទាំងនោះជារបស់មន្ត្រីមានសមត្ថកិច្ចនៅស្រុកសណ្ដាន់ ដោយមានមន្ត្រីអធិការស្រុកនៅពីក្រោយ។ យ៉ាងណា អធិការស្រុកបានបដិសេធការចោទប្រកាន់នេះ។
ប្រជាសហគមន៍នៅក្នុងឃុំសណ្ដាន់ ស្រុកសណ្ដាន់ កាន់តែបារម្ភនៅពេលពួកគេដឹងកាន់តែច្បាស់ថា អ្នករកស៊ីឈើខុសច្បាប់នៅក្នុងតំបន់ព្រៃឡង់ គឺជាមន្ត្រីមានសមត្ថកិច្ច ដោយអ្នកខ្លះជាទាហាន ខ្លះជាមន្ត្រីប៉ូលិសប៉ុស្តិ៍ ខ្លះជាកូនចៅរបស់អធិការស្រុកថែមទៀត។
ប្រជាសហគមន៍ឃុំសណ្ដាន់ ថ្លែងក្នុងលក្ខខណ្ឌមិនឲ្យបញ្ចេញឈ្មោះ ឲ្យដឹងថា ក្រោយពេលចុះល្បាតប៉ុន្មានថ្ងៃ គឺឃើញសកម្មភាពកាប់បំផ្លាញព្រៃឈើក្នុងតំបន់ព្រៃឡង់ ឋិតនៅក្នុងឃុំសណ្ដាន់ និងឃុំដងកាំបិត។ លោកបន្តថា មានកូនទាហានស្លៀកពាក់ឯកសណ្ឋានខ្លះ មានមន្ត្រីប៉ុស្តិ៍ខ្លះ ក្រោមហេតុផលថា ទទួលបានការអនុញ្ញាតដើម្បីកាប់ឈើយកទៅសង់ការិយាល័យក្នុងអធិការដ្ឋានស្រុកសណ្ដាន់ ប៉ុន្តែលោកថា ក្នុងលិខិតអនុញ្ញាត គឺមានភាពមិនត្រឹមត្រូវ៖ «ខ្ញុំឆ្ងល់ថា ត្រាអធិការវ៉ៃត្រា ហើយមានប៉ុងមានអីមាន ហើយស៊ីញេចៅហ្វាយស្រុកសរសេរដៃ ហើយស៊ីញេដៃទៀត»។
កាលពីថ្ងៃទី២ ដល់ថ្ងៃទី៥ មេសា ប្រជាសហគមន៍ការពារព្រៃឡង់ចំនួន ៤ខេត្ត នាំគ្នាចុះល្បាតក្នុងព្រៃ ហើយរកឃើញបទល្មើសព្រៃឈើផ្សេងៗគ្នា។ ក្នុងនោះ ខេត្តកំពង់ធំ រកឃើញគំនរឈើប្រមាណជិត ២០ម៉ែត្រគូប ម៉ាស៊ីនអារឈើ ៤គ្រឿង ហើយនៅល្ងាចថ្ងៃទី៥ មេសា ក្រុមប្រជាសហគមន៍យកវត្ថុតាងទាំងនោះជូនមន្ត្រីជំនាញ។
ឆ្លើយតបការចោទប្រកាន់នេះ អធិការនគរបាលស្រុកសណ្ដាន់ លោក អួង ម៉ូលី មានប្រសាសន៍ថា មិនមានមន្ត្រីក្រោមឱវាទលោកណាម្នាក់ពាក់ព័ន្ធរឿងនេះទេ ហើយកូនរបស់លោកក៏មិនមែនជាអ្នករកស៊ីឈើនោះដែរ។ លោកបន្តថា កន្លងមកខាងអធិការស្រុកធ្វើសំណើដើម្បីកាប់ឈើនៅតំបន់ជាយៗព្រៃឡង់ មកធ្វើការិយាល័យមែន ប៉ុន្តែសកម្មភាពនោះ គឺបញ្ឈប់តាំងពីមួយខែមុនម្ល៉េះ ដោយមិនមានថវិកាសម្រាប់ជួលអ្នកដឹកជញ្ជូនឈើចេញពីព្រៃគ្រប់គ្រាន់។ ចំណែកបទល្មើសដែលប្រជាសហគមន៍រកឃើញ គឺខាងលោកមិនបានពាក់ព័ន្ធនោះទេ៖ «អានោះមិនមែនខាងខ្ញុំទេបាទ! ខ្ញុំអត់ដឹងទេនៅព្រៃឡង់ខាងលើនេះ។ ខ្ញុំសុំនៅខាងងៀវនោះទេ។ អាខាងដួងចែមដួងច័ន្ទអ៊ីចឹងអត់ដឹងទេ»។
ទោះបីជាយ៉ាងណាក៏ដោយ សកម្មជនការពារព្រៃឡង់ស្រុកសណ្ដាន់ ម្នាក់ទៀត លោក មីង នី អះអាងថា អ្នកធ្វើសកម្មភាពកាប់ឈើនោះ គឺត្រូវបានប្រជាសហគមន៍ស្គាល់ច្បាស់ថា ជាកូនរបស់អធិការស្រុក និងមានតួនាទីជាមន្ត្រីប៉ូលិសផង។ លោកបន្ថែមថា ចំណែកសកម្មភាពយកលិខិតអនុញ្ញាតដើម្បីកាប់ឈើធ្វើការិយាល័យនោះ គឺគ្រាន់តែជាលេសដើម្បីកាប់ឈើស្របច្បាប់ប៉ុណ្ណោះ ពីព្រោះកន្លងមកក៏ធ្លាប់មានក្រុមទាហានទៅកាប់ឈើដែរ ក្រោមហេតុផលថាយកឈើមកសង់បន្ទាយ ក៏ប៉ុន្តែសកម្មភាពកាប់ឈើ គឺអាចដំណើរការបានរាប់ខែ៖ «បាទ តាំងពីខែមួយ ១៥គូប ហើយខែបួនហើយ ហេតុអីមិនទាន់ហើយ។ បាទៗ នេះគ្រាន់តែជាលេសមួយទេ»។
សកម្មជនការពារព្រៃឡង់ដដែល កាន់តែបារម្ភខ្លាំងឡើងនៅពេលសកម្មភាពកាប់បំផ្លាញព្រៃឈើចេះតែកើតចេញពីមន្ត្រីសមត្ថកិច្ច ដោយចេះតែយកលេសថាមានច្បាប់អនុញ្ញាត ក៏ប៉ុន្តែធាតុពិតមិនមានភាពច្បាស់លាស់ឡើយ ហើយលោកយល់ថា រូបភាពនេះនឹងអាចមានបន្តទៀត។ លោកស្នើសុំឲ្យរាជរដ្ឋាភិបាល គប្បីទប់ស្កាត់លើបញ្ហាទាំងនេះ និងត្រូវប្រកាសជាសាធារណៈ ចំពោះការកាប់ឈើណាមួយសម្រាប់យកមកបម្រើផលប្រយោជន៍រួម ជៀសវាងផ្ដល់ឱកាសដល់មន្ត្រីថ្នាក់ក្រោមប្រព្រឹត្តបទល្មើស។
យ៉ាងណា អ្នកស្រាវជ្រាវបញ្ហាសង្គម លោកបណ្ឌិត កែម ឡី ដែលបានដឹកនាំក្រុមយុវជនចុះសិក្សាតំបន់ព្រៃឡង់កាលពីពេលកន្លងទៅ ធ្លាប់មានប្រសាសន៍ថា ការកាប់បំផ្លាញព្រៃឈើនៅកម្ពុជា គឺធ្វើឡើងជាលក្ខណៈប្រព័ន្ធ ពោលគឺមានទាំងការផ្ដល់ដីសម្បទានសេដ្ឋកិច្ច និងសង្គមកិច្ច និងការសហការគ្នាដើម្បីកាប់ឈើជាប្រព័ន្ធផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។