សង្គមស៊ីវិលដែលធ្វើការពាក់ព័ន្ធនឹងកិច្ចការពារបរិស្ថាន និងព្រៃឈើ ចាត់ទុកព្រៃឡង់ជាកន្លែងដែលបានផ្ដល់ជាជម្រក និងសេចក្ដីស្រឡាញ់សម្រាប់មនុស្ស សត្វ និងរុក្ខជាតិនានា។ ដោយមើលឃើញពីអត្ថប្រយោជន៍របស់ព្រៃឡង់ សង្គមស៊ីវិលបានផលិតស្នាដៃសិល្បៈចំនួន៥ ដើម្បីបង្ហាញពីកិត្តិសព្ទដ៏យូរអង្វែងរបស់ព្រៃឡង់កម្ពុជា។
ស្នាដៃសិល្បៈចំនួន ៥ ដែលផលិតបានរួមមាន ចំរៀងចាប៉ីដងវែងរៀបរាប់ពីព្រៃឡង់ចំនួន ៧បទ ច្រៀងដោយក្រុមសិល្បៈចាប៉ីអមតៈ វីដេអូចម្រៀងបែបសម័យយុវវ័យមានចំណងជើងថា "ជិះកង់" ច្រៀងដោយលោក ជីមី ឃីស (Jimmy Kiss) ផ្ទាំងរូបគំនូរនិយាយពី "លោកតាព្រៃឡង់" គូរដោយស្រ្តីខ្មែរម្នាក់រស់នៅប្រទេសអាល្លឺម៉ង ខ្សែភាពយន្តខ្លីដែលមានចំណងជើងថា "ព្រៃចុងក្រោយ" ផលិតដោយផលិតកម្ម ឃីត មេឌា (Kid Media) និងស្នាដៃទី៥ មហោស្រពព្រៃឈើកម្ពុជា។
ស្នាដៃសិល្បៈទាំង៥ បង្ហាញពីកិត្តិសព្ទព្រៃឡង់កម្ពុជានេះ ត្រូវបានបង្ហាញឡើងនៅក្នុងកម្មវិធីព្រឹត្តិការណ៍វប្បធម៌ ដើម្បីផ្សព្វផ្សាយអំពីព្រៃឡង់ដែលប្រារព្ធឡើងនាមជ្ឈមណ្ឌលវប្បធម៌បារាំង នៅថ្ងៃទី៩ ខែកញ្ញា។
ដោយមើលឃើញពីអត្ថប្រយោជន៍របស់ព្រៃឡង់ សង្គមស៊ីវិលបានផលិតស្នាដៃសិល្បៈចំនួន៥ ដើម្បីបង្ហាញពីកិត្តិសព្ទដ៏យូរអង្វែងរបស់ព្រៃឡង់កម្ពុជា។ប្រធានផ្នែកយុវជន និងព្រៃឈើរបស់គម្រោងគាំទ្រព្រៃឈើ និងជីវចម្រុះរបស់អង្គការវីនរ៉ក់អន្តរជាតិ (Winrock International) លោក ស៊ាត លីឃាង ឲ្យដឹងថា ស្នាដៃសិល្បៈទាំង៥នេះ ត្រូវបានផលិតនៅដើមឆ្នាំ២០១៦ ក្រោមជំនួយឧបត្ថម្ភពីគម្រោងព្រៃឈើ និងទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ (USAID) និងអនុវត្តដោយអង្គការវីនរ៉ក់អន្តរជាតិ។
បន្ថែមពីនេះ លោកថា គោលបំណងសំខាន់ផលិតស្នាដៃសិល្បៈទាំង៥ ដែលបង្ហាញពីព្រៃឡង់នេះឡើង ដើម្បីលើកកម្ពស់ការយល់ដឹងដល់ពលរដ្ឋខ្មែរឲ្យស្គាល់ពីសម្រស់ និងតម្លៃមិនអាចកាត់ថ្លៃបានរបស់ព្រៃឡង់ ដែលជាព្រៃចុងក្រោយរបស់កម្ពុជា៖ «យើងលឺតែព្រៃឡង់ តែអត់ដឹងថា សម្រស់ព្រៃឡង់យ៉ាងម៉េច មានអ្វីខ្លះ ប្រជាជនរស់នៅយ៉ាងម៉េច? ប្រហែលជាមិនសូវមានប្រជាជនច្រើនប៉ុន្មានទេ អ៊ីចឹងទើបយើងបង្កើតស្នាដៃសិល្បៈទាំង៥នេះដើម្បីអប់រំ»។
ទន្ទឹមគ្នានេះ អ្នកដឹកនាំខ្សែភាពយន្តខ្លីដែលមានចំណងជើងថា "ព្រៃចុងក្រោយភាគ២" លោក ភិជិត ឬទ្ធា លើកឡើងដែរថា ក្រោយការបង្ហាញភាពយន្តខ្លីនេះ លោករំពឹងថា ផលិតករ និងយុវជនដែលស្រឡាញ់ព្រៃអាចចាប់ផ្ដើមផលិតដើម្បីផ្សព្វផ្សាយពីមរតកព្រៃឡង់នេះ៖ «ខ្ញុំសូមលើកទឹកឲ្យយុវជន ពិសេសអ្នកដែលមានសាច់រឿង ឬចំណាប់អារម្មណ៍ក៏ដោយ ចូរនាំគ្នាផលិត និងចែករំលែកទាំងអស់គ្នាពីធនធានធម្មជាតិដែលយើងមាននៅតំបន់ព្រៃឡង់»។
ជាអ្នកចូលរួមមើលការបង្ហាញស្នាដៃសិល្បៈទាំង៥នេះ និស្សិតនៅវិទ្យាស្ថានភាសាបរទេស កញ្ញា ជឿន ចរណៃ យល់ថា ស្នាដៃទាំងនេះមានសារសំខាន់ណាស់មិនត្រឹមតែបង្ហាញពីសក្ដានុពលព្រៃឡង់ ប៉ុណ្ណោះទេ វាក៏អាចលើកទឹកចិត្ត និងលើកកម្ពស់ស្មារតីពលរដ្ឋឲ្យយកចិត្តទុកដាក់រួមគ្នាថែរក្សាព្រៃឡង់៖ «កម្រណាស់ដែលមានអ្នកទៅដល់ព្រៃឡង់ អ៊ីចឹងនៅពេលមានខ្សែភាពយន្ត ឬសិល្បៈបែបនេះ ធ្វើឲ្យខ្ញុំមានអារម្មណ៍រំភើបដូចបានទៅដល់ទីនោះ និងមានចិត្តស្រឡាញ់ព្រៃឈើនោះតែម្ដង»។
ព្រៃឡង់ត្រូវបានចាត់ទុកថា ជាព្រៃធំចុងក្រោយមានទំហំ ៣.៦០០គីឡូម៉ែត្រក្រឡា មានព្រំប្រទល់ជាប់ខេត្តចំនួន៤ គឺខេត្តកំពង់ធំ ក្រចេះ ស្ទឹងត្រែង និងខេត្តព្រះវិហារ។ កាលពីឆ្នាំ២០១៥ ទីភ្នាក់ងារសហរដ្ឋអាមេរិក សម្រាប់អភិវឌ្ឍន៍អន្តរជាតិ ប្រកាសថា ព្រៃឡង់របស់កម្ពុជា មានជីវចម្រុះដ៏សំខាន់បំផុតមួយក្នុងចំណោមតំបន់មានជីវចម្រុះសំខាន់ៗទាំង១០ នៅលើពិភពលោកដែលមានប្រភេទសត្វ និងរុក្ខជាតិកំពុងរស់នៅជិត ១ពាន់ប្រភេទ។ សង្គមស៊ីវិលអះអាងថា ពួកគេគ្រោងនឹងផ្សព្វផ្សាយតាមបណ្តាញសង្គមហ្វេសប៊ុក (Facebook) ព្រមទាំងចែកចាយទៅអង្គការក្រៅរដ្ឋាភិបាល និងប្រព័ន្ធផ្សព្វផ្សាយនានា ដើម្បីផ្សព្វផ្សាយពីស្នាដៃសិល្បៈទាំងនេះឲ្យបានទូលំទូលាយបន្ថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។