ជំនាញរដ្ឋបាលព្រៃឈើស្រុកភ្នំក្រវាញ ខេត្តពោធិ៍សាត់បញ្ជាក់ថា ករណីភ្លើងឆេះឈើ និងរថយន្តជាច្រើនគ្រឿងនៅក្នុងបរិវេណនៃផ្នែករដ្ឋបាលព្រៃឈើក្រវាញ កាលពីថ្ងៃទី១៣ ខែមីនា នោះ គឺបណ្ដាលមកពីខ្យល់បក់នាំកម្ទេចភ្លើងដែលឆេះព្រៃនៅខាងក្រៅចូលទៅក្នុងបរិវេណ នៃរដ្ឋបាលព្រៃឈើនេះ។
នាយផ្នែករដ្ឋបាលព្រៃឈើក្រវាញ លោក ថន ប៊ុនថេត ថ្លែងនៅថ្ងៃទី១៥ ខែមីនា ថា ថ្នាក់លើរបស់លោកបានចុះមើលកន្លែងកើតហេតុផ្ទាល់ និងបញ្ជាក់ពីមូលហេតុភ្លើងឆេះរាលបណ្ដាលខូចខាតនេះដល់សាធារណជន ឬអ្នកសារព័ត៌មានរួចហើយ កាលពីថ្ងៃទី១៤ ខែមីនា។
លោកថា ពុំមានការលួចដុតបំបិទភស្ដុតាំងដូចការសង្ស័យរបស់អ្នកកាសែតមួយចំនួននោះទេ៖ «តាមពិតភ្លើងឆេះរាលពីខាងក្រៅមក! មេខ្ញុំបានបកស្រាយជូនរួចមួយសារហើយម្សិលមិញ (១៤ មីនា)។ ឆេះមានតែឡានចាស់បទល្មើសហ្នឹង ហើយឈើគ្មានទេ និយាយទៅមានតែឈើពុកៗចោលតាំងពីជំនាន់ណាមកហ្នឹង»។
ការបញ្ជាក់របស់មន្ដ្រីរដ្ឋបាលព្រៃឈើនេះ គឺបន្ទាប់ពីប្រភពនៅក្បែរកន្លែងហេតុការណ៍កើតឡើង និងអ្នកសារព័ត៌មានក្នុងស្រុកខ្លះបានផ្សព្វផ្សាយដោយសង្ស័យថា មន្ដ្រីជំនាញរដ្ឋបាលព្រៃឈើបានដោះគ្រឿងបន្លាស់ឡាន និងយកឈើល្អៗលក់ រួចប្រឌិតរឿងភ្លើងឆេះនេះឡើង។ ហេតុការណ៍ភ្លើងឆេះនោះបណ្ដាលឲ្យខូចខាតឡានម៉ាកកូរ៉េ និងកាម៉ារីចំនួន ២២គ្រឿង ម៉ូតូ ១គ្រឿង និងរទេះដឹកឈើចំនួន ៥គ្រឿង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។