តំណាងសហគមន៍ និងមន្ត្រីបរិស្ថានខេត្តកំពង់ឆ្នាំង ស្នើឲ្យតុលាការពន្លឿននីតិវិធីចំពោះពលរដ្ឋដែលទន្ទ្រានកាន់កាប់ដីព្រៃរបស់រដ្ឋនៅក្នុងដែនអភិរក្សធម្មជាតិជើងលៀង ដែលពួកគេបានដាក់ពាក្យប្ដឹងកន្លងមកឲ្យបានឆាប់រហ័ស ដើម្បីទប់ស្កាត់បទល្មើសព្រៃឈើ។ តំណាងអយ្យការអមសាលាដំបូងខេត្តកំពង់ឆ្នាំង អះអាងថា ពលរដ្ឋ ២០នាក់ ដែលធ្លាប់ពាក់ព័ន្ធនឹងករណីនេះ កំពុងដំណើរការសាកសួរមុននឹងបញ្ជូនសំណុំរឿងទៅចៅក្រមស៊ើបសួរ។
ក្រោយពីមន្ត្រីបរិស្ថាន និងអាជ្ញាធរមូលដ្ឋានចុះអប់រំផ្សព្វផ្សាយពលរដ្ឋចំនួន ១២គ្រួសារ និងខ្លះតម្រូវឲ្យធ្វើកិច្ចសន្យាបញ្ឈប់ការកាប់រុករានដីព្រៃរបស់រដ្ឋនៅចំណុចចម្ការម៉ុច ភូមិកោះខ្ទម្ព នៃឃុំជៀប ស្រុកទឹកផុស នៅមានពលរដ្ឋខ្លះបន្ដសកម្មភាពដដែល។
ផ្ទៃដីសហគមន៍ទំហំ ២៦៨ហិកតារ និងព្រៃឈើ ប្រឈមនឹងការបាត់បង់ដោយសារតែពលរដ្ឋមួយចំនួនមិនគោរពច្បាប់ ហើយបន្តបំផ្លាញព្រៃ។
ប្រធានសហគមន៍តំបន់ការពារធម្មជាតិភ្នំជើងលៀង លោក អ៊ឺត អូន ឲ្យដឹងថា ពលរដ្ឋជាច្រើនគ្រួសារដែលធ្លាប់ទន្ទ្រានដីព្រៃចាប់តាំងពីដើមខែមិថុនា ឆ្នាំ២០១៦ បច្ចុប្បន្នបានបញ្ឈប់សកម្មភាពហើយ ដោយឡែកនៅតែឈ្មោះ យក់ បឿន ម្នាក់ប៉ុណ្ណោះដែលនៅទន្ទ្រានយកដីព្រៃដើម្បីដាំចេក។
លោកស្នើឲ្យតុលាការ ឬមន្ដ្រីបរិស្ថានទប់ស្កាត់ឲ្យមានប្រសិទ្ធភាពចំពោះការបំផ្លាញព្រៃសហគមន៍នេះ៖ «គេមករំលោភបំពានអ៊ីចឹងប៉ះពាល់ដល់សមាជិកសហគមន៍ខ្ញុំ។ ដូចជាបាត់ធនធានតំបន់ទេសចរណ៍ សហគមន៍ខ្ញុំបានដាក់ផែនការកុំឲ្យគាត់កាប់ធនធានធម្មជាតិ ហើយឲ្យប្រកបមុខរបរគាត់ឲ្យមកជួយដាំអីយកទៅក់នៅតំបន់ទេសចរណ៍»។
អាស៊ីសេរីមិនអាចរកប្រភពទាក់ទងលោកស្រី យក់ បឿន ដើម្បីឆ្លើយតបនឹងការចោទប្រកាន់នេះបានទេ នៅថ្ងៃទី១ ខែវិច្ឆិកា។ ប៉ុន្តែមន្ត្រីបរិស្ថានថា លោកស្រី យក់ បឿន នៅបន្តសកម្មភាពរុករានដីព្រៃ។
អនុប្រធានមន្ទីរបរិស្ថានខេត្តកំពង់ឆ្នាំង និងជាប្រធានដែនជម្រកសត្វព្រៃភ្នំឱរ៉ាល លោក បឿ ប៊ុនថន បញ្ជាក់ថា ខាងមន្ត្រីជំនាញបរិស្ថាន បានប្ដឹងឈ្មោះ យក់ បឿន ទៅតុលាការកាលពីថ្ងៃទី១៧ ខែមិថុនា ហើយមិនទាន់ឃើញចំណាត់ការអ្វីក្រៅពីកោះហៅពលរដ្ឋជាង ១០នាក់ ដែលលោកមិនបានប្ដឹងទៅតុលាការនោះទៅវិញ។
ចំពោះសកម្មភាពរបស់លោកស្រី យក់ បឿន កាប់ព្រៃបន្ថែមនេះ លោកបានរាយការណ៍ទៅព្រះរាជអាជ្ញាហើយ៖ «ដោយសាររឿងនេះវាឋិតនៅក្នុងចំណាត់ការរបស់តុលាការដូចជាពុំមានកិច្ចការអីយើងត្រូវធ្វើបន្ដទេ យើងគ្រាន់តែធ្វើឃ្លាំមើល ហើយរាយការណ៍ទៅតុលាការបន្ដទៀតថា តើសកម្មភាពរបស់ យក់ បឿន ធ្វើអ្វីបន្តទៀត»។
ព្រះរាជអាជ្ញារងខេត្តកំពង់ឆ្នាំង លោក គឹម ហុងសាន្ដ ថ្លែងថា មន្ដ្រីជំនាញបរិស្ថានអាចហៅពលរដ្ឋទៅអប់រំ ឬអាចចាប់ខ្លួនតែម្ដងក្នុងបទល្មើសជាក់ស្ដែងដែលរុករានដីព្រៃ ប៉ុន្តែជំនាញបរិស្ថានមិនទាន់បានរាយការណ៍មកខាងលោកដែលជាព្រះរាជអាជ្ញាកាន់សំណុំរឿងនៅឡើយ។
ចំពោះការកោះហៅពលរដ្ឋជាច្រើននាក់ដែលធ្លាប់ពាក់ព័ន្ធនឹងរឿងដីធ្លីនេះ គឺដើម្បីធ្វើសាក្សីក្នុងសំណុំរឿងនេះ៖ «កំពុងស្ថិតនៅក្នុងការអង្កេត អ៊ីចឹងខាងខ្ញុំនេះដោយសារនៅក្នុងរបាយការណ៍បរិស្ថានបញ្ជូនមកមានឈ្មោះច្រើន ដែលពាក់ព័ន្ធនឹងការហ៊ុមព័ទ្ធធ្វើជាកម្មសិទ្ធិផង និងការកាប់រានដីព្រៃផង។ អ៊ីចឹងហើយយើងត្រូវតែហៅពួកគាត់ទាំងអស់យកមកសួរនាំសិន»។
កាលពីថ្ងៃទី៩ ខែឧសភា ឆ្នាំ២០១៦ ប្រធានដែនជម្រកសត្វព្រៃភ្នំឱរ៉ាល ខេត្តកំពង់ឆ្នាំង លោក បឿ ប៊ុនថន បានធ្វើរបាយការណ៍កម្រាស់បីទំព័រជូនអភិបាលខេត្ត ដោយរៀបរាប់ពីកន្លែងកាប់ទន្ទ្រានដីព្រៃនៅតំបន់អភិរក្សធម្មជាតិចម្ការម៉ុច និងឈ្មោះអ្នកប្រព្រឹត្ត។ អភិបាលខេត្តកំពង់ឆ្នាំង លោក ឈួរ ច័ន្ទឌឿន បានធ្វើចំណារបីចំណុចលើរបាយការណ៍ ដើម្បីដោះស្រាយបញ្ហា គឺទី១ សូមឲ្យចាត់ការគ្រប់គ្រងដីនេះមកវិញឲ្យបានម៉ឺងម៉ាត់។ ទី២ បង្កើនកិច្ចសហការជាមួយអាជ្ញាធរអប់រំពលរដ្ឋបញ្ឈប់សកម្មភាពទាំងស្រុង និងទី៣ បើមានការកាប់រាន ឬមានការឈូសឆាយត្រូវបង្ក្រាបភ្លាមស្របតាមនីតិវិធី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។