ការ​អភិរក្ស​ព្រៃ​ធម្មជាតិ​នៅ​ឧត្ដរមានជ័យ​ទាក់ទាញ​ចំណាប់​អារម្មណ៍​ជាតិ-អន្តរជាតិ

ព្រៃ​ធម្មជាតិ​ជិត​ពីរ​ម៉ឺន​ហិកតារ​នៅ​ខេត្ត​ឧត្តរមានជ័យ ដែល​ត្រូវ​បាន​អភិរក្ស​និង​ដាំ​បន្ថែម ក្រោម​ការ​ផ្ដួចផ្ដើម​និង​ដឹកនាំ​របស់​ព្រះសង្ឃ​មួយ​អង្គ កំពុង​ទាក់ទាញ​ចំណាប់​អារម្មណ៍​ពី​សហគមន៍​ជាតិ​និង​អន្តរជាតិ។
ដោយ អ៊ួន ឈិន
2013-02-24
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ការ​អភិរក្ស​ព្រៃ​ធម្មជាតិ​មួយ​កន្លែង​នៅ​ខេត្ត​ឧត្តរមានជ័យ ជា​ការ​អភិរក្ស​ដែល​មាន​ទ្រង់ទ្រាយ​ធំ​ជាង​គេ​នៅ​កម្ពុជា គឺ​មាន​ផ្ទៃ​ដី​ព្រៃ​ទំហំ​ជាង ១៨.០០០​ហិកតារ (មួយ​ម៉ឺន​ប្រាំ​បី​ពាន់​ហិកតារ)។

ព្រៃ​អភិរក្ស​នេះ​មាន​ឈ្មោះ​ថា "ព្រៃ​សហគមន៍​សង្ឃ​រុក្ខ​វ័ន" ស្ថិត​នៅ​ចម្ងាយ​ជាង ៤០​គ.ម ភាគ​ឦសាន​នៃ​ក្រុង​សំរោង ខេត្ត​ឧត្តរមានជ័យ។

ព្រះ​មេគណ​ស្ដី​ទី​នៃ​ខេត្ត​ឧត្តរមានជ័យ ព្រះតេជព្រះគុណ ប៊ុន សាលួត ជា​ស្ថាបនិក​ព្រៃ​សហគមន៍​សង្ឃរុក្ខវ័ន មាន​ថេរ​ដីកា​ថា ដោយ​ព្រះអង្គ​ឈ្វេងយល់​ពី​សារសំខាន់​នៃ​ព្រៃឈើ​ចំពោះ​មនុស្ស​សត្វ និង​ធម្មជាតិ ព្រះអង្គ​បាន​និមន្ត​ស្វែង​រក​អន្តរាគមន៍ និង​បាន​អភិរក្ស​ព្រៃ​នៅ​តំបន់​នេះ ចាប់​តាំង​ពី​ឆ្នាំ​២០០១។

ព្រះតេជព្រះគុណ ប៊ុន សាលួត មាន​ថេរដីកា​បន្ត​ថា ថ្វី​ត្បិត​មាន​ការ​អភិរក្ស តែ​ប្រជាពលរដ្ឋ​ដែល​ធ្លាប់​រស់​នៅ​ និង​អាស្រ័យ​ផល​ពី​អនុផល​ព្រៃឈើ​ក្នុង​តំបន់​នេះ​ចំនួន ៩​ភូមិ ស្មើនឹង​ជិត ១០០​គ្រួសារ នៅ​តែ​អាច​ប្រកប​របរ​របស់​ពួក​គាត់​ជា​ប្រក្រតី គឺ​គ្រាន់​តែ​មាន​ការ​រឹត​បន្តឹង​មិន​ឲ្យ​មាន​បទល្មើស​ព្រៃឈើ​ប៉ុណ្ណោះ។

នាយក​មជ្ឈមណ្ឌល​ហ្វឹកហ្វឺន​ភាសា ខូអ័រ ប្រចាំ​ក្រុង​បាត់ដំបង លោក ស្រ៊ុន សុទិដ្ឋ ដែល​បាន​មក​ទស្សនា​ព្រៃ​សហគមន៍​សង្ឃរុក្ខ​វ័ន ថ្លែង​ថា បើ​មាន​ការ​អភិរក្ស​ឲ្យ​បាន​ច្រើន​ដូច​ការ​ផ្ដួចផ្ដើម​របស់​ព្រះតេជព្រះគុណ ប៊ុន សាលួត នោះ វា​នឹង​ជួយ​ទប់​ស្កាត់​ការ​បំផ្លាញ​ព្រៃ​នៅ​កម្ពុជា បាន​មួយ​ចំណែក​ធំ។

តំណាង​សហគមន៍ ហ្វ្រែនស៊ីស្កឹន មក​ពី​ក្រុង រ៉ចឆេស្ទ័រ រដ្ឋមីនីសូតា (Franciscan Community Rochester, Minnesota) សហរដ្ឋ​អាមេរិក ដែល​បាន​ផ្ដល់​ជំនួយ​ដល់​គម្រោង​កម្មវិធី​អភិរក្ស​ព្រៃ​សហគមន៍​សង្ឃ​រុក្ខ​វ័ន និង​ដែល​បាន​មក​ទស្សនា​ព្រៃ​អភិរក្ស​ដែរ អ្នកស្រី ម៉ាឡឹស ជែកស៍ (Marlys Jax) បាន​ឲ្យ​ដឹង​ថា អ្នកស្រី​បាន​ធ្វើ​ដំណើរ​ទៅ​ប្រទេស​ជា​ច្រើន​ទូទាំង​ពិភពលោក និង​បាន​ជួយ​ដល់​អ្នក​អភិរក្ស​បរិស្ថាន​នៅ​ក្នុង​ប្រទេស​ទាំង​នោះ។

អ្នកស្រី ម៉ាឡឹស ជែកស៍៖ «មនុស្ស​បំផ្លាញ​បរិស្ថាន ហើយ​អ្វី​ដែល​គួរ​ឲ្យ​ចាប់​អារម្មណ៍​នោះ គឺ​ថា យើង​មាន​ពិភពលោក​តែ​មួយ​ជាមួយ​គ្នា។ ពិភពលោក​គឺ​ជា​លំនៅឋាន​របស់​យើង ហើយ​បើ​យើង​មិន​ខ្វល់ និង​មិន​ចាប់​ផ្ដើម​គិត​អំពី​ការ​ថែ​រក្សា និង​ប្រើប្រាស់​ពិភពលោក​ឲ្យ​បាន​ល្អ​ទេ​នោះ ខ្ញុំ​គិត​ថា យើង​កំពុង​តែ​បំផ្លាញ​ខ្លួន​ឯង​ហើយ»

តំណាង​សហគមន៍ ហ្វ្រែនស៊ីស្កឹន ម្នាក់​ទៀត អ្នកស្រី ចូស៊ីន វ៉ូក អាយុ ៩១​ឆ្នាំ ដែល​កំពុង​តែ​ឈរ​សម្លឹង​ព្រៃ​សហគមន៍​សង្ឃ​រុក្ខ​វ័ន តាម​ទ្វារ​រថយន្ត​ទេសចរណ៍ ដោយ​ភាព​ញញឹមញញែម​ផង​នោះ មាន​ប្រសាសន៍​ថា បញ្ហា​បរិស្ថាន​ជា​បញ្ហា​ដ៏​ធំ​សម្រាប់​ពិភពលោក ហើយ​អ្នកស្រី​ចាប់​អារម្មណ៍​ក្នុង​ការ​ចូល​រួម​រក្សា​បរិស្ថាន៖ «ការ​កាប់​បំផ្លាញ​ព្រៃឈើ​ជះ​ឥទ្ធិពល​អាក្រក់​ខ្លាំង​ណាស់ ហើយ​មិនមែន​កើត​មាន​តែ​នៅ​ក្នុង​ប្រទេស​កម្ពុជា​ប៉ុណ្ណោះ​ទេ។ ការ​កាប់​បំផ្លាញ​ព្រៃ​ឈើ​ធ្វើ​ឲ្យ​ដី​អស់​ជីជាតិ ធ្វើ​ឲ្យ​គ្មាន​អុកស៊ីហ្សែន​ក្នុង​បរិយាកាស និង​ធ្វើ​ឲ្យ​មាន​កំណើន​ឧស្ម័នកាបូនិច​ច្រើន​ពេក គឺ​វា​ធ្វើ​ឲ្យ​ប៉ះពាល់​ដល់​បរិស្ថាន​ពិភពលោក​ទាំង​មូល»

ជា​លទ្ធផល ព្រះតេជព្រះគុណ ប៊ុន សាលួត បាន​ជាប់​ជា​ជយលាភី​នៃ​អ្នក​ការពារ​ព្រៃឈើ និង​ជីវចម្រុះ​ពី​គណៈកម្មការ​រៀបចំ​កម្មវិធី​ពាន​រង្វាន់​គំនិត​ផ្ដួចផ្ដើម​អេក្វាទ័រ របស់​អង្គការ UNDP ប្រចាំ​ក្រុង​ញីវយ៉ក សហរដ្ឋ​អាមេរិក នៅ​ឆ្នាំ​២០១០។

ទោះ​យ៉ាង​ណា​ក្ដី ឧបសគ្គ​ក្នុង​ការ​អភិរក្ស រួម​មាន​ភ្លើង​ព្រៃ និង​ការ​ទាញ​យក​ផល​ពី​ព្រៃ​ដោយ​ខុស​ច្បាប់ កំពុង​ក្លាយ​ជា​ក្ដី​កង្វល់​សម្រាប់​អ្នក​អភិរក្ស។

ទាក់ទិន​នឹង​កាប់​បំផ្លាញ​ព្រៃ​ទ្រង់ទ្រាយ​ធំ​នៅ​កម្ពុជា ព្រះតេជព្រះគុណ ប៊ុន សាលួត និមន្ត​បញ្ចេញ​ទស្សនៈ​ថា ឈ្មួញ​ឈើ​និង​ឈ្មួយ​ដី​ផ្ដោត​តែ​លើ​ប្រាក់ គឺ​ពួក​គេ​គ្មាន​គំនិត​អភិរក្ស​អ្វី​នោះ​ទេ។ ចំណែក​ឯ​អ្នក​អភិរក្ស​ដែល​មាន​ឆន្ទៈ​បរិសុទ្ធ​វិញ ពួក​គេ​មិន​អាច​ធ្វើ​ជា​ឈ្មួញ​បាន​ឡើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល