សកម្មភាពជួញដូរខ្សាច់នាពេលនេះបានថយចុះ ស្របពេលដែលក្រសួងរ៉ែ និងថាមពល បានចាប់ជនល្មើស ១៦នាក់ និងរឹបអូសឧបករណ៍ប្រើប្រាស់ខុសច្បាប់ ដូចជាសាឡង់ ទូក ម៉ាស៊ីនខូងខ្សាច់ ៦គ្រឿងទុកនៅតុលាការ។ ក្រសួងមួយនេះ ក៏បានជំរុញឲ្យអាជីវករ និងក្រុមហ៊ុនលក់ខ្សាច់ទាំងអស់ដែលគ្មានអាជ្ញាប័ណ្ណ និងអាជ្ញាប័ណ្ណហួសសុពលភាព ត្រូវទៅស្នើសុំអាជ្ញាប័ណ្ណតាមទម្រង់សិប្បកម្ម ឬអាជីវកម្មខ្នាតតូច មធ្យម និងខ្នាតធំ។
មន្ត្រីក្រសួងរ៉ែ និងថាមពល និងមន្ត្រីគ្រប់ខេត្តក្រុងប្រមាណ ៣០០នាក់ ប្រជុំគ្នានិយាយពីការចេញអាជ្ញាប័ណ្ណសិប្បកម្មរ៉ែសំណង់ មានខ្សាច់ ថ្ម ជាដើម ដើម្បីពង្រឹងការអនុវត្តច្បាប់ស្ដីពីការគ្រប់គ្រង និងការធ្វើអាជីវកម្មរ៉ែ។
រដ្ឋលេខាធិការក្រសួងរ៉ែ និងថាមពល លោក ឌិត ទីណា ថ្លែងថា ក្រសួងនេះនឹងផ្តល់លទ្ធភាពចេញអាជ្ញាប័ណ្ណអាជីវកម្មរ៉ែខ្នាតតូច ឬសិប្បកម្មរ៉ែទៅអាជ្ញាធរថ្នាក់ក្រោមជាតិ។ លោកថ្លែងយ៉ាងដូច្នេះ នៅក្នុងកិច្ចប្រជុំអំពីវិធានការ ដើម្បីពង្រឹងការអនុវត្តច្បាប់ស្ដីពីការគ្រប់គ្រង និងការធ្វើអាជីវកម្មរ៉ែ កាលពីថ្ងៃទី៧ ខែមេសា ឆ្នាំ២០១៥។
លោក ឌិត ទីណា ណែនាំថា មុននឹងអាជ្ញាធរខេត្តស្រុក និងមន្ទីររ៉ែ និងថាមពល អាចចេញអាជ្ញាប័ណ្ណអាជីវកម្មរ៉ែសំណង់ជាប្រភេទសិប្បកម្ម ឬអាជីវកម្មខ្នាតតូច ត្រូវសិក្សាពីផលប៉ះពាល់បរិស្ថាន សង្គម សេដ្ឋកិច្ច ជាមុនសិន។ ចំពោះការផ្តល់លិខិតអនុញ្ញាត (ខុសពីអាជ្ញាប័ណ្ណ) សុំធ្វើអាជីវកម្ម ដែលពីមុនអាជ្ញាធរឃុំ និងភូមិអាចចេញច្បាប់អនុញ្ញាតបាននោះ គឺមិនបន្តឲ្យចេញទៀតទេ សុំឲ្យអ្នកធ្វើអាជីវកម្មនោះស្នើសុំទៅការិយាល័យ និងមន្ទីររ៉ែ និងថាមពល ពិនិត្យជាមុនសិន។ ប៉ុន្តែបើសិនជាពលរដ្ឋចង់ជីកដីធ្វើស្រះ ឬលើកជាភូមិ ជាដើម ទើបអាជ្ញាធរភូមិឃុំមានសិទ្ធិអនុញ្ញាត តែហាមដឹកអាចម៍ដីចេញពីកន្លែងជីក៖ «គាត់ធ្វើនៅក្នុងផ្ទៃដីមួយដែលតូច យើងកំណត់ក្រោម ១ហិកតារ យើងកំណត់ដែរថាបើគាត់ធ្វើអាជីវកម្មនៅលើដីកម្មសិទ្ធិរបស់គាត់ អាហ្នឹងក៏ជាផ្នែកមួយដែលអាចធ្វើឲ្យគាត់ក្លាយទៅជាអាជីវកម្មសិប្បកម្មដែរ ប៉ុន្តែលើដីរបស់គាត់ក្រោម ១ហិកតារ ឬក៏ធ្វើនៅកន្លែងដែលក្រសួងយើងកំណត់ថា កន្លែងនេះអាចក្លាយទៅជាតំបន់ដែលគាត់អាចធ្វើអាជីវកម្មសិប្បកម្មបាន។ អ៊ីចឹងយើងនឹងមានការសិក្សារួមគ្នា ហើយយើងនឹងមានការកំណត់រួមគ្នា ហើយបើច្បាស់លាស់ គាត់នឹងចេញអាជ្ញាប័ណ្ណជូនសម្រាប់សិប្បកម្ម ហើយគាត់ពិនិត្យផ្ទាល់តែម្តង ហើយការប្រមូលសួយសារ ក៏ច្បាស់លាស់ដែរ»។
លិខិតប្រគល់សិទ្ធិរបស់រដ្ឋមន្ត្រីក្រសួងរ៉ែ និងថាមពល ចុះហត្ថលេខាដោយ លោក ស៊ុយ សែម កាលពីថ្ងៃទី១១ ខែមីនា ឆ្នាំ២០១៥ ជូនមន្ទីរគ្រប់ខេត្ត-រាជធានី ក្នុងគោលបំណងឲ្យធ្វើជាតំណាងក្រសួងនេះ សម្រាប់បំពេញកិច្ចការដោះស្រាយបញ្ហាទាំងឡាយទាក់ទងនឹងការប្រព្រឹត្តបំពានច្បាប់ស្ដីពីការគ្រប់គ្រង និងការធ្វើអាជីវកម្មធនធានរ៉ែនៅក្នុងរាជធានីខេត្ត នៅចំពោះមុខបុគ្គលពាក់ព័ន្ធ អាជ្ញាធរមានសមត្ថកិច្ច និងសាលាជម្រះក្តីគ្រប់ជាន់ថ្នាក់ ជាពិសេសធ្វើជាតំណាងដោយអាណត្តិនៅក្នុងការទាមទារដំណើរការរឿងក្តី ការដក និងការដាក់ពាក្យបណ្ដឹង ការផ្សះផ្សា ការប្ដឹងតវ៉ានានា ការការពារសិទ្ធិ និងផលប្រយោជន៍ស្របច្បាប់របស់ក្រសួងពាក់ព័ន្ធ និងបញ្ហាពាក់ព័ន្ធនៅចំពោះមុខបុគ្គលពាក់ព័ន្ធ អាជ្ញាធរមានសមត្ថកិច្ច និងសាលាជម្រះក្តីគ្រប់ជាន់ថ្នាក់ ដើម្បីពង្រឹងការអនុវត្តច្បាប់។
បន្ថែមលើនោះ រដ្ឋមន្ត្រីក្រសួងរ៉ែ និងថាមពល ចេញប្រកាសស្ដីពីការប្រគល់សិទ្ធិជូនមន្ទីររ៉ែ និងថាមពលរាជធានីខេត្ត ជួយពិនិត្យសម្រេច និងផ្តល់អាជ្ញាប័ណ្ណសិប្បកម្មធនធានរ៉ែ កាលពីថ្ងៃទី៣ ខែមេសា ឆ្នាំ២០១៥ កំណត់ឲ្យមន្ទីរទាំងនោះពិនិត្យទីតាំងសុំធ្វើអាជីវកម្មធនធានរ៉ែមានលក្ខណៈជាសិប្បកម្ម ត្រូវមានការបញ្ជាក់ និងឯកភាពពីអាជ្ញាធរស្រុកខណ្ឌ ដែលមានទីតាំងសុំធ្វើអាជីវកម្មនោះឋិតនៅ។ មុនចេញអាជ្ញាប័ណ្ណសិប្បកម្ម ត្រូវទៅអង្កេត និងវាយតម្លៃដល់កន្លែងស្នើសុំធ្វើសិប្បកម្មរ៉ែរយៈពេល ១០ថ្ងៃយ៉ាងយូរ ក្រោយពីទទួលពាក្យស្នើសុំ ហើយធ្វើរបាយការណ៍សន្និដ្ឋាន និងសុំការឯកភាពពីអាជ្ញាធររាជធានីខេត្តរួចហើយ ទើបអាចចេញអាជ្ញាប័ណ្ណសិប្បកម្មបានក្រោយរយៈពេល ៣ថ្ងៃយ៉ាងយូរ ក្រោយពីមានការឯកភាពពីអាជ្ញាធរថ្នាក់ក្រោមជាតិរួចនោះ។
ពន្យល់បន្ថែមលើនោះ លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល ឲ្យដឹងថា ការរៀបចំបែបបទ និងនីតិវិធីសម្រាប់ការផ្តល់អាជ្ញាប័ណ្ណនេះ យោងតាមប្រកាសលេខ៥២០ រ.ថ រ.ស ប្រក ដែលក្រសួងរ៉ែ និងថាមពល បានអនុម័តរួចហើយ និងដាក់ឲ្យអនុវត្តដើម្បីធានាថា ការធ្វើអាជីវកម្មរ៉ែសំណង់ ត្រូវបានអនុវត្តប្រកបដោយការទទួលខុសត្រូវ បង្កើតនូវផលប្រយោជន៍សេដ្ឋកិច្ច សង្គម និងបរិស្ថានបានច្បាស់លាស់៖ «ដោយឡែកចំពោះការធ្វើអាជីវកម្មខ្សាច់ពីការបូមខ្សាច់ពីស្ទឹង ទន្លេ យើងសង្កត់ធ្ងន់ទៅលើការពិនិត្យផ្នែកពាក់ព័ន្ធ ទៅនឹងលំនឹងផ្នែកជលសាស្ត្រ ដើម្បីកុំឲ្យមានបម្រែបម្រួលលំហូរជលសាស្ត្រ ដែលអាចនឹងបង្កឲ្យមានផលប៉ះពាល់បរិស្ថាន ជលសាស្ត្រ ជីវសាស្ត្រ នៅក្នុងទន្លេស្ទឹងនេះដោយធ្ងន់ធ្ងរ ការពារការបាក់ច្រាំង ការពិនិត្យទៅលើការថែទាំស្ទឹងទន្លេ ដែលជាកិច្ចការតម្រូវ ដើម្បីសម្រួលដល់ការប្រើប្រាស់ស្ទឹង ទន្លេ សម្រាប់គោលដៅផ្សេងៗក្រៅពីគោលដៅសម្រាប់ការធ្វើអាជីវកម្មរ៉ែខ្សាច់នេះ ការសម្រួលផ្លូវនាវាចរណ៍ ការដោះស្រាយបញ្ហាទំនាស់រវាងការធ្វើអាជីវកម្មនេះជាមួយនឹងការធ្វើចរាចរផ្លូវទឹក ការធ្វើនេសាទរបស់ប្រជាពលរដ្ឋដែលត្រូវប្រើប្រាស់ស្ទឹងទន្លេនេះ ដែលនៅទីតាំងជាមួយគ្នា ហើយនិងពិនិត្យទៅលើការរៀបចំគម្រោងអភិវឌ្ឍន៍សហគមន៍មូលដ្ឋាន»។
បំពេញលើពាក្យស្នើសុំធ្វើអាជីវកម្មសិប្បកម្មរ៉ែដែលអាជ្ញាធរខេត្តស្រុក និងមន្ទីរ អាចផ្តល់អាជ្ញាប័ណ្ណរ៉ែបាននោះ តំណាងអាជ្ញាធរខេត្តបន្ទាយមានជ័យ ខេត្តព្រៃវែង ខេត្តប៉ៃលិន សុំដាក់បញ្ចូលផលប៉ះពាល់ផ្លូវដែលដឹកជញ្ជូនរ៉ែ កំណត់ឲ្យក្រុមហ៊ុន និងម្ចាស់អាជីវកម្មត្រូវជួសជុលសងជាដើម៖ «ពេលទៅមើលហ្នឹងមើលភ្នែកទទេ ព្រោះមន្ត្រីរដ្ឋបាលមិនដឹងអាប់ស៊ីសអ័រដោនេកម្រិតណា ហើយជីកជម្រៅណា ឬក៏សំណូមពរឲ្យបោះបង្គោលដើម្បីងាយស្រួលក្នុងការឲ្យអាជ្ញាធរមូលដ្ឋាន មានមូលដ្ឋានក្នុងការសម្របសម្រួលដោះស្រាយជូនប្រជាពលរដ្ឋផង»។
បំភ្លឺតបទៅការលើកឡើងរបស់តំណាងអាជ្ញាធរច្រើនខេត្តនោះ លោក ម៉េង សក្តិធារ៉ា រដ្ឋលេខាធិការក្រសួងរ៉ែ និងថាមពល ប្រកាសថា មុននឹងផ្តល់អាជ្ញាប័ណ្ណអាជីវកម្មលើធនធានរ៉ែ ក្រសួងនេះកំណត់ឲ្យក្រុមហ៊ុនដាក់ប្រាក់តម្កល់ច្រើនលានរៀល ដើម្បីបង្ការការរត់ចោលការដ្ឋាន ឬអាជីវកម្ម។
ចំណែក លោក ឌិត ទីណា រដ្ឋលេខាធិការក្រសួងរ៉ែ និងថាមពល ឲ្យដឹងថា នៅក្នុងពេលដែលក្រសួងនេះមិនទាន់ចេញអាជ្ញាប័ណ្ណថ្មីដល់អាជីវករ និងក្រុមហ៊ុនដែលអាជ្ញាប័ណ្ណអស់សុពលភាពនោះ មន្ត្រីអធិការកិច្ចបានឃាត់ និងចាប់ខ្លួនជនល្មើសលួចបូមខ្សាច់ទន្លេចំនួន ១៦នាក់ សាឡង់ និងទូក ៦គ្រឿង ក្នុងនោះបញ្ជូនទៅតុលាការសាលាដំបូងរាជធានី និងខេត្តកណ្ដាល ហើយតុលាការបានទុកគ្រឿងចក្រ និងមធ្យោបាយដឹកជញ្ជូនខ្សាច់ចាប់បានទាំងនោះសម្រាប់តុលាការស៊ើបអង្កេតបន្ត៖ «តាំងពីចាប់បញ្ជូនទៅតុលាការចំនួន ៦សាឡង់ ហើយនិង ១៦នាក់នោះមក ការហៅមកទូរស័ព្ទចូលហ៊តឡាញ (Hotline) របស់យើង ៧២៧ គឺធ្លាក់ចុះតែម្តង លែងឮសូរហើយ ហើយបើសិនជាបងប្អូនអ្នកសារព័ត៌មានអាចមើលតាមទន្លេ ឃើញមានអ្នកណាលួចធ្វើនៅត្រង់ណាទៀតនោះ គឺ ៧២៧ យើងនេះទាក់ទងមកយើងចុះ ទៅភ្លាម»។
នៅរសៀលថ្ងៃទី៧ ខែមេសា នេះដែរ ក្រសួងរ៉ែ និងថាមពល បាននាំអ្នកសារព័ត៌មានចុះពិនិត្យទីតាំងដែលអាចផ្តល់អាជីវកម្មបាន និងទីតាំងហាមបូមខ្សាច់ទន្លេ ចាប់ពីតំបន់រកាកោង ស្រុកមុខកំពូល ខេត្តកណ្តាល ទៅដល់ទន្លេបួនមុខក្នុងរាជធានីភ្នំពេញ។
នៅក្នុងការយឺតយ៉ាវផ្តល់អាជ្ញាប័ណ្ណអាជីវកម្មខ្សាច់នេះ មានក្រុមហ៊ុនលាយបេតុងភាគច្រើនឲ្យដឹងថា ពួកគេកំពុងខ្វះខ្សាច់ ហើយវាធ្វើឲ្យបានប៉ះពាល់ដល់វិស័យសំណង់មួយចំនួន។ ដូច្នេះ ពួកគេស្នើសុំឲ្យក្រសួងរ៉ែ និងថាមពល ពន្លឿនការចុះសិក្សាផលប៉ះពាល់បរិស្ថាន សង្គម និងសេដ្ឋកិច្ច ដែលរំពឹងថាអាចចេញអាជ្ញាប័ណ្ណមុន ៣ខែទៅ ៦ខែ ដែលក្រសួងបានកំណត់ហាមបូមខ្សាច់ទន្លេខុសច្បាប់ បើសិនការសិក្សាផលប៉ះពាល់បរិស្ថាន សង្គម និងសេដ្ឋកិច្ច មិនទាន់បានចប់ទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។